بوابة الثانوية العامة المصرية

بسم الله الرحمن الرحيم

أنا هحاول أختصر في الكلام عشان مطولش علي حضراتكم وأعطلكم
بناءً علي رغبة البعض كتبت هذا الكلام ..

عاوز قبل ما أبدأ بس أقولكم حاجة كلكوا عارفينها :: " الدنيا دي أحقر مما تتصور "
وانت بتحاول تحقق حلمك طبيعي تلاقي ناس بتكرهك ، طبيعي تلاقي ناس عاوزاك تفشل ، طبيعي تلاقي اللي بيحقد عليك واللي بيتمنالك الشر ، والي بيتخابث عليك .. نادرا تلاقي حد قلبه عليك .. متوقفش دايرة أحلامك عشان فلان أو فلانة بتكرهني أو عشان عاوزني أضيع ..
الساعات اللي بتفصلك عن تحقق حلمك موجودة في كل يوم .. اما تتماشي معاها وتضيعها وتضيع معاها حلمك .. وإما تستغلها بشده وتستغل كل لحظة وتوصل لحلمك ..
انتوا وصلتوا لمرحلة اليوم اللي بيفوت مبيرجعش ، والساعة اللي بتفوت مبترجعش وكلها شهرين وتعرفوا انتوا في كلية إيه ..
" الشهرين دول حياتكم "

انت عندك حلم .. حققه ،، متفوتش لحظة إلا ما تسعي ليه فيها ..
انت لو معندكش حلم أو يأست من تحقيقه ؟؟ عايش ليه ؟ فرحان بحياتك ف الوضع الركيك الممل دا ...

مين فينا متعبش فترة وزهق وقال والله ما انا مذاكر والله ما هعمل حاجة ـ وانا راضي باللي يجي ...؟ انا أولكم زهقت وتعبت فترة وقلت انا كدا استسلمت !!!
بس بعد كدا عرفت ان دا كله وهم illusion ويأس انا دخلته في دماغي وأقنعت نفسي بيه

عاوزك تعرف إن بخلاف إحياء الموتي .... لا يوجد مستحيل .. وأتحدي
المستحيل فكرة تكمن فقط في عقول الأغبياء ...
حاول مرة والتانية والتالتة .. اثبت للجميع ولنفسك أولا انت أد إيه عظيم وأد ايه تستحق

(( مذاكرتك طاعة . دعاءك طاعة . رضا أهلك طاعة ))
وما عدا ذلك شيطان عاوز يوقعك ..

اللي بيفكر يأجل السنة / لسه فيه وقت تلم وتجيب مجموع انت عاوزه .
اللي شايف انه خلاص مش لاحق حاجة ويأس / متستناش انك تثق في نفسك بعد كدا لو مفقتش م الوهم دا .

وربنا يوفقكم ...