بوابة الثانوية العامة المصرية

أصل الحكايه

هى مش ايدنا القصيره
ولا قله فى الفلوس
انما ازمة بصيره
ويا عله فى النفوس
خلت العالم فى حيره
من ضماير كَلها سوس
والحكايه بقت خطيره
العقول فيها تحوس
والبلاوى كمان كتيره
والحكومه لايصه لوص
واللى فوق اكلوا الفطيره
واللى تحت ف جوع يغوص
والغيلان شفطوا الخميره
وكنزوا الالماظ فصوص
عملوا كام صفقه حقيره
باعوا خيرنا بالرخيص
قعدوا يبنوا قصور فى جيره
لجل روحهم بالخصوص
والملايين الفقيره
سكنوا عشه حيطانها خوص
ناموا م الجوع ع الحصيره
يحلموا بلقمه و غموس
حتى انفارنا الاجيره
هجروا ارض سابوا فوس
بعد ما هدوا الحظيره
راح بقرهم والجاموس
والمصانع الكبيره
ضاع مكنها والتروس
ياللى سايقين المسيره
افهموا اوعوا الدروس
اجبروا النفس الكسيره
وارحموا الناس م العبوس
الحقوا الفرصه الاخيره
واخلعوا الناب و الضروس
دى البلد ماهيش فقيره
بس ناهبها اللصوص

دكتور
عادل عيد