|
رسالة من مواطن للحكومة
السلام ده جى طاير
جى حاير من مواطن عادى جدا للحكومة قبل مابدأ فى الكلام .. المواطن ياحكومة له سؤال لو حزام الصبر قرب ينقطع يا ترى .. تدونا غيره ؟ هوه ده الطلب الوحيد منكم يا سادة لجل ما كل واحد مننا يعرف مصيره لو وافقتم يبقى إحنا أى حاجة تتعمل فينا تجوز طالما كل حاجه بتتعمل دائما بنقول آمين ما فيناش من لوى بوز ولَّلا إيه رأى الحكومة ..! طيبين وغلابه احنا ليه نقول العيب عليكوا إحنا طبعا معيوبين مانتوا فاتحين البنوك للى ينهب حد حاشنا ؟ والبلد فاتحة حدودها للى يهرب يعنى إحنا لو فرضنا يوم هبشنا أو كبشنا مانكبشنا بس إحنا حظنا إن احنا بُلده الغلىَ عدى الحدود ..! حد قال إن الغلى كان قصد منكم ؟ دانتوا نيتكوا المساعدة بس طبعا للأسف الظروف ماهياش مساعدة يعنى مثلا .. تصرفوا ع اللى يعوز .. لا يجوز ماكفياكوا تفكروا فى الشعب كله كل واحد فى البلد مصروف له وجبة (مكرونة وزيت وسمنة وكيلورز ونص عدس) يعنى كشرى ناقصه إيه.. حبة طماطم تبقى صلصة والفطار والعشا معمول حسابهم (نص فول ) حتى ما بتنسوش مزاجنا شاى وسكر شاكرين ليكم جهودكم ماحنا أحسن م البلاد اللى عايشة فى مجاعة والعراق وغيرها ياما وللا إيه رأى الجماعة !! كل ده والفضل ليكم عدنا بنشوف الجثث مالية الشاشات بس بنشوفها بَّبلادة ماحنا عايشين فى سعادة كل واحد مننا ضامن رغيفه واللى يلحق فينا يلحق م الفقير ياكل ويسكت لو موظف يبقى حظه يا سعادته شهره عدى ال(100) جنية يكفو إيه ..! مش مهم بالقليلة كل يوم ياكل فلافل وللا يبقى يشوف له صرفة وللا حتى يبيع ضميره واحنا مالنا حاجة تقرف غيره كان يتمنى يبقى ف يوم موظف وانتوا شفتوا لما قلتوا يا وظيفة كل واحد فى البلد قدم لنفسه ويَّاابنه حد كان وصاه فى يوم إنه يخلف ؟ وانتوا دايما كنتوا لينا بتنصحونا ياجماعة صحصحوا ويانا حبة إحنا دايما فى زيادة . الشباب مالى البلد من غير جواز والجواز عايز شقق والشقق عايزة جهاز والجهاز عايز خشب والخشب جوه المعارض والمعارض بالفلوس والفلوس عند الغنى والغنى عايش فى فيلا فيلا فيها كل حاجة دش بيجيب من أوروبا واحنا نخطف" كابل" منه تلقى ناس صابغة شعورها والشباب مابيختشيش واللى نفسه يعيش يعيش واللى عايز يغتنى فيه ألف فرصة منها يعنى .. البنات تلبس مافيش وتروح تغنى أو بمعنى تانى أوضح حد يتبناها ترقص لحظة تبقى مليونيرة شد وش وشعر عيرة يوم وليلة .. تبقى دى النجمة الجميلة والصور تملى الجرايد يعنى بالعربى الفصيح انتوا مش هاتدادوا فينا اللى نفسه يشوف له شوفة يروح يشوفها والمبادئ طظ فيها واللى ماسك لسه فيها يْسيب شهادته يستلف من أى حد يعبِّى شنطة .. يلف بيها شنطة فيها كل حاجة حاجة يعنى صينى طبعا والرصيف من غير إيجار وان لمحت البَلدية شلها واجرى يمسكوك وتروح ضحية لف ع الناس فى البيوت ع اللى حالته زى حالتك واللى حالتك زى حالته يبقى يجرى .. يشوف له واسطة واللى له واسطة يدوس ع الناس برجله يعنى تبقى إيده طايلة أى حاجة تبقى لينا وف ثوانى تقوم تروح له هوه أولىَ الغلابة فى البلد ملهاش مكان هوه ده نهاية المطاف هوه ده نهاية الكلام وللا إيه رأى الحكومة فى الكلام ده . " من ديوان " خيانة " الصادر عام 2005 توزيع جريدة الجمهورية علاء عيسى عضو اتحاد كتاب مصر أهلا بكم هنا |
أستاذ علاء حضرتك كلامك طول عمره معروف بالمصداقية
و حضرتك من القلائل فى هذه البلاد من اللذين جمعوا ما بين النقد و الأدب اسمحلى لن أعلق على كلماتك لأنى أصغر من ذلك بكثير |
بجد فى قمه الروعة والجمال سلمت يمناك و دمت لنا مبدع |
الحكومه معدش عندها دم ونايمه فى الدره خلاااااااص
|
جميلة جداً
وتم تعديل الرابط مخالف |
hالإخوة الأفاضل
الى كل من زار مواضيعى شكرا لكم الفاضل أ. مصطفى اولا شكرا لك اخى ثانيا لا أدرى كيف ان هذا الرابط مخالف انه رابط مدونتى الخاصة واوادخل على اى منتدى انا مشارك فيه ستجده اسفل توقيعى وعموما شكرا لك وأعتزر على وقتى ووقت المنتدى تحياتى وفرصة سعيدة سلام وفى النهاية اكرر شكرى لكل من قرأنى |
اقتباس:
بندق وكل عام وانت بخير ومواضيعك كلها روعة |
الحقيقة مش لاقية التعليق المناسب اللي أقدر أعلق به على قصائد حضرتك
ما شاء الله كلها رائعة و و أكيد مستنيين المزيد من ابداعات حضرتك |
اقتباس:
تحياتى |
اقتباس:
طالما كده يبقى لازم حد يكون صاحى ولا هانام كلنا ونسيب البلد هههههههههههه تحياتى |
| جميع الأوقات بتوقيت GMT +2. الساعة الآن 03:40 PM. |
Powered by vBulletin® Version 3.8.11
Copyright ©2000 - 2025, Jelsoft Enterprises Ltd.