سؤال بخصوص عدد السنوات التي يحق للطالب التقيد بالصف الثالث بالثانوية العامة
 

اربع سنوات وتفصيلهم كالآتي ،،،، سنتين مقيد بالمدرسة ،،،،،، وسنتين منازل ،،،،،،

ثلاثة فقط يا افندم
سنتين انتظام و واحدة منازل
او واحدة انتظام و اثنين منازل
او الثلاثة كلهم منازل في حالة تجاوز الطالب نسبة الغياب و فصله و تحويله منازل

أستاذ نصر فؤاد اربع سنوات وليس ثلاث ولو مع حضرتك دليل الثانوية العامة هتلاقي الكلام ده

اخوك محمد حسن من لجنة النظام والمراقبة

ماشي يا استاذ محمد
على فكرة انا باتكلم على النظام القديم وكان بالفعل زي ما انا قلت لان الطالب كان بياخد فرص كتيرة في سنة ثانية ( المرحلة الاولى ) اما المرحلة الثانية ثلاثة سنوات زي ما انا قلت
اما النظام الحديث فهو اربعة سنوات زي ما حضرتك تفضلت

و انا فهمت ان اللي بيسال عن العدد احتمال كبير يكون من النظام القديم

على فكرة اخوك مرشد تعليمي و كل عام و انتم بخير

انا عايزة اعرف ايه نظام المنازل دا, انا كنت مأجلة من سنة دخلت مادة واحدة هي الفرنساوي بس ...و السنادي دخلت عربي و انجلش و فيزيا و جيت ف الكيميا سبتها و مشيت محلتش حاجة و ماعرفش هكمل الباقي ولا لأ, انا عايزة اعرف لو استنيت السنة الجاية هيحصل ايه ..انا مش عايزة ادخل دور تاني عشان ماخدش نص الدرجة و اللي فهمته اني هتحول منازل لإن دي هتبقى تالت سنة ليا بس عايزة اعرف ضروري جدا انا كدا هاخد الدرجة كاملة ف اللي همتحنه السنة الجاية و احتفظ بدرجاتي الفعلية ف اللي خلصته خلاص و ماينقصش مني حاجة خالص ولا هيحصل ايه؟ و التنسيق هتأثر فيه و مايبقاش ليا مكان فعلا؟ ولا ايه اللي بيحصل بالظبط و ادفع مصاريف مدرسة ولا اتعمل ازاي ولا مع مين انا فعلا ماعرفش اي حاجة و محتاجة مساعدة, يا ريت الرد عليا ف اسرع وقت و شكرا

عادي تقعدي في البيت و تذاكري لغاية شهر فبراير مع بداية الترم الثاني تروحي المدرسة و تقابلي المرشد التعليمي هيطلب منك شوية اوراق هتجيبيها من الادارة التعليميه و المديرية في المحافظة التابعة لها و هيطلب حوالات بريدية من مكتب البريد ايضا
و تدفعي رسوم الاستمارة 102 جنيه و تكتبي استمارة
و بالتوفيق

على فكرة هتحتفظي بدرجاتك و مواد السنة الجاية تاخدي درجتها كاملة و مفيش مصاريف لانك هتبقي منازل و هتدفعي رسوم استمارة اكتر من المنتظمين
و ورقك هيتصحح مع المنتظمين عادي و التنسيق هتدخلي مع الدور الاول عادي

انا اصلا يحق ليا ادخل دور تاني السنادي؟ انا مادخلتش غير دور اول السنة اللي فاتت ف مادتين بس واحدة نجحت فيها و التانية لأ, يعني غبت ف اكتر من مادتين و قريت ان ماكنش يحق ليا دخول دور تاني السنة اللي فاتت, يا ترى ليا السنادي ولا ماليش و نص درجة برضو ولا لازم اعيد السنة ولا ايه بالظبط؟؟؟ شكرا جدا بجد و معلش هتعب حضراتكم معايا بس عايزة اعرف ف اسرع وقت هعمل ايه....

انتي كده سايبة اكتر من مادتين يبقى لا يحق لك دور ثاني

طب انا اسفة جدا هسأل تاني... انا لما اجي اتخرج من ثانوية هتخرج من مدرستي و ابقى اسمي من مدرسة كذا ولا ايه النظام؟؟؟؟ يعني انا اصلا مش هادفع مصاريف يبقى ماليش دعوة بالمدرسة ولا ايه, احنا ماكنوش بيرضوا يعملوا الاستمارات للي مش دافعين مصاريف كاملة ! ف انا مش فاهمة انا كدا ماليش مكان ولا هتخرج من ايه... اسفة جدا متقلة عليكم

أنت نجحتي فى إيه السنة اللى فاتت?

عموماً ... الطالب الراسب فى مادتين فقط أو أقل من حقه دخول الدور الثانى بنصف الدرجة فقط فى مواد الرسوب... أما الطالب الراسب فى ثلاث مواد أو أكثر بما في ذلك المواد التى لا تضاف للمجموع فله حق الإعادة في مواد الرسوب فقط بالدرجة الكاملة مع الإحتفاظ بدرجات المواد التى كان قد نجح فيها...أما بالنسبة لحالتك لو رسبت فى أكثر من مادتين سوف تحولين إلى طالبة منازل .. تعملى استمارة فى المدرسة بدون دفع مصروفات دراسية ولكن بتدفعى رسوم الامتحان 102 جنيه ... وتستلمى رقمك من الإدارة التعليمية وكذلك نتيجتك .. وتسمى طالبة منازل إدارة كذا التعليمية وتنسيقك عادى مع زميلاتك فى سنة نجاحك