الله يكرمكم ساعدونى
 

خضتني يا ريس برضو كدا

ابراهيم ابوليفه حضرتك بتكلم بالطريقه دى ليه ثانيا حضرتك ايدك فى المية مش مقدر ولا حاسس بحاجة رغم انك تلاقيك جايب 50 فى المايه وعلى العموم الف الف شكر

اللي حصل ان الاستاذ ايمن كان رد علي حضرتك طبعا ظهر عندي استاذ ايمن نور والعنوان ارجوكم ساعدوني فتحت العنوان علاطول لقيت الاستاذ ايمن منزل التنسيق بتاع المعاهد وكدا
فكتبت التعليق للاستاذ ايمن ومعرفتيش احذفه لان انا فعلا جايب 50% وماليش في التكنولوجيا تحياتي

اتمنى ان حضرتك متكنش مضيق بس فعلا الواحد مضيق من النظام التعليمى الفاشل اللى فعلا بيضع فرص علينا كتييييير فى تحقيق الحلم وانا كنت مضيق جدا فوق ما حضرتك تتصور فتقبل ذلك بصدر رحب وشكرا لزوقك العالى يا فندم

ولا يهمك بس انا هاقولك ع تجربتي انا كنت بحب الانجليش من ثانوي كنت عاوز ادخل السن او اقتصاد وعلوم سياسيه جبت مجموع تربيه ومكنتيش عاوز اطلع مدرس ونفسي كان واخداني لحقوق مكنتيش عارف انا فين ومين وليه وازاي كمراهق في بدايه حياته مش عارف يلاقي نفسه فين ابويا صمم ادخل تربيه علشان امر التكليف طبعا دخلت قسم انجليش وخلصت الاربع سنين بتقدير جيد والحمد لله اتعينت بعد الجيش لكن برضو لسه مكتشفتيش انا ايه رموني في مدرسه الزراعه وتبعد عن بلدتي 35 كيلو متر قعدت ف المدرسه دي 15 سنه مش بدرس حاجه لان الطلبه هناك مبيعرفوش عربي اذاي هتدرسلنا انجليش يا مستر المهم قعدت عاطل 15 سنه بس استفدت حاجه المكتبه بتاعت المدرسه كانت فخيمه فيها كميه كتب محترمه المهندسين اللي معانا في المدرسه كان بيقولولي انتا شغال هنا قاريء وبس كان بسمونا مدرسي المواد الثقافيه المهم الفيسبوك بدأيتسلل الي وكنت من مجاهدي الكيبورد في 25 يناير وقامت الثوره وبسببها اتنقلت من الزراعه لمدرسه ثانوي في بلده بجوار بلدتي قولت للموجهه العام انا منفعشي في ثانوي عام انا ليا 15 سنه في الزراعه مش هتستفيدوا مني في حاجه قالتلي معنديش غير كدا قولت ماشي بدال ما اسافر كل يوم 35 كيلو الطلبه في البلد دي ساعدوني كتير لانهم كان علي درجه عاليه من الذكاء اكتشفت اني ما نسيت اللغه وكمان اكتشفت اني عندي القدره علي جذب الطلاب حواليا طبعا دول نوعيه مختلفه من الطلبه
المهم علشان ما اطول عليك وتستفيد من تجربتي لحد هنا وما استفدت حاجه من مهنتي غير حب الطلاب ودا اعظم شيء لدواعي امنيه اتنقلت لبلدي برضو الطلبه حاوطوني وبدا الاطراء والتحدث عن القادم الجديد
وكاريزمته وذكائه وطريقته لكن تاتي الرياح بما لا تشتهي السفن بدأت الحقد يدب في النفوس وعانيت في بلدتي ومدرستي من حزب اعداء النجاح مكنش عندي حاجه اعبر فيها عن نفسي وافكاري الا الفيسبوك ودي بقي المرحله الحقيقيه في حياتي بدأت اكتب عن تجربتي الشخصيه في المدرسه وبدأ الناس تستحسن اسلوبي في الكتابه وانا لا ادري انا هناك من يتابعني لاحظ ان سني وقتها كان 39 صدفا علقت علي كذا بوست علي الفيسبوك لصديق لا اعرفه واتضح فيما بعد انه اكبر كاتب روائي ومسرحي وحاصل علي جائزه الدوله التقديريه واذا بهذا الصديق يحادثني ع الخاص ويقول في ما لم اسمعه من قبل وانني صاحب قلم ورساله واسلوب وطلب مني ان اكتب مقال في خلال اسبوع وفعلت ونشره في مجله تصدر بالعربيه في الولايات المتحده ورقيه والكترونيه وكشف عني غطائي ككاتب وبعضهم يقول مبدع وبعضهم يقول رائع وخلافه واكتشفت نفسي في سن الاربعين واصبحت كاتبا في عده مواقع وصحف وطبعا بوابتنا العزيزه
بكتب بالانجليش وهي حبي الاول من الثانويه العامه بكتب في السياسه ودي الكليه اللي كنت عاوز ادخلها وطبعا لان قلمي حراق ومشاكس تعرضت للنيابه الاداريه والتحقيقات عده مرات ومارست معهم حبي لكليه الحقوق
المهم بقي هستفيد ايه من كل الهري دا
انك تدور ع موهبتك نظامنا التعليمي مش فاشل انا متأكد من دا علي سبيل المثال كورس الانجليش اللي بدرسه مليء بتلخيصات لروايات عالميه دا غير القصص الخاص بالصفوف التلاته لكن الفرق انها تدرس بطريقه خاطئه
دور علي موهبتك شوف بتحب ايه كتير من الناس بتشتغل في غير تخصصها وبرعت فيه وتفوقت وسابت التخصص بتاعها