عشش الغلابة
 

خالتي أم أحمد حبت تعمل حتة عشة في نجع حلولة

جابت طوبة وكمان طوبة وحاولت تعمل أي محاولة

جه بوكسين وشالوها اتنين من بعد عذاب ومحايلة

قال إيه سرقت مترين وتعدت علي أملاك الدولة

وجابولها فاتورة بالإزالات غير المصاريف والعربيات

ووقفلها ضابط ابن ذوات يحصر ويعد تعديات

والحي طلب صلح ودمغات علشان طوبتين وثلات خشبات

وأنا خالتي أم أحمد عملت إيه؟ علشان تسمع كل الإهانات

أمال مكتوب ليه في الجرنان عن واحد خد ألفين فدان

وسرق بنكين في سنة ألفين ومحدش عارف له عنوان

وكمان مكتوب عن تاجر غاز له فلة وقصر في كل مكان

معرفش أراضي الدولة لمين ولا مين له حق ومين غلطان

خالتي أم أحمد عندها أحمد أحمد كان عسكري في الجيش

أحمد حارب حرر سينا أحمد كان في الوحدة شويش

راح القسم وسأل الضابط إيه جريمتنا؟ قاله مفيش

أمك سرقت أرض الدولة ولازم تعمل بصمة وفيش

أحمد قال إحنا سوابق علشان أمي بقالها سنين
بتوصيني أخاف علي بلدي وتوصيني أبقي أمين

كل جريمة أمي يا باشا إنها زي المصريين

كل الحاكم ما يقول كلمة كل الشعب يقوله آمين

بص يا باشا اسجن أمي واسجن أبويا وخالي وعمي

مساجين برة ومساجين جوه ليه هتنرفز واحرق دمي

أنا مسروق والعيلة مسروقة ليه بالعشة حازود همي

مش مستهلة عذاب ومناهدة ولا مستهلة تعكنن أمي

ابداع\ سيد أحمد الهمشري