(علوم طبيعة) Vs (علوم جيولوجية) ارجوكم كل طلبة علوم يدخلوا
 

السلام عليكم
الحمد لله رب العالمين أنا تقريبا بقيت طالب في علوم الاسكندرية بعد ما كنت طالب في علوم المنصورة مش فاضل غير اني الاقي اسمي في الكلية ان شاء الله.
المهم.. دلوقتي بقى متاح ليا القسم اللي انا كنت عاوز ادخله و هو الدرجة الخاصة الكيمياء المتفرعة من العلوم الطبيعية(و الدرجة الخاصة يعني اللي يجيب تقدير يدخلها و بتكون اكتر تركيز على التخصص يعني هنا هيكون التركيز على الكيمياء فقط).. يعني عشان ادخله يبقى اختار دلوقتي علوم طبيعية.
بس أنا سمعت كلام في المنتدى و بره المنتدى على ان العلوم الجيولوجية و اللي بيتفرع منه في الدرجة الخاصة "الجيوفزياء" .. القسم ده سمعت عنه انه بيخرج مهندسين بترول او حاجة قريبة جدا من كده اذا كانش هو مهندسين بترول فعلا.
و انا اطلعت على المواد اللي بيدرسوها في القسم ده من اول سنة لآخر سنة و لقيت ان المواد اللي بيدرسوها فعلا تقيلة و مهمة جدا و اسمائها كبيرة " رصد تثاقلي - رصد سيزمي - رصد حاسب -جيولوجيا بترولية.. و حاجات كتير تانية".
ده خلاني الاقي ان مش بعيد ان اللي يدرس المواد و المواضيع دي كلها يبقى مهندس بترول.
ده غير ان جريدة المصري اليوم في ايام التنسيق تطرقت في موضوع عن كليات القمة تطرقت الى قسم الجيوفيزياء في كليات العلوم و اعتقد ان في حد نقل الكلام ده و جابه هنا في المنتدى و كان مضمون الكلام أن
القسم ده بيخرج مهندسين بترول و بيبقوا ليهم خبرة في أشياء اكثر من خريجي البترول و التعدين لأنهم بيدرسوا أشياء لا تدرس في كلية البترول و التعدين. و أن شركات البترول "تتهافت"على خريجي هذا القسم و تتعاقد معهم من خلال الكلية قبل تخرجهم و مرتباتهم تكن بالعملة الصعبة او عموما تكون مرتبات عالية.
و برغم الكلام اللي بسمعه عن ان الجيوفيزياء بيلاقوا شغل على طول و الشركات بتخطفهم لكن مينفعش اختار على اساس كلام أنا مش متأكد من صحته خاصة ان قطاع البترول فرص الشغل فيه دلوقتي قليلة و في وسايط و كلام من ده.
الكلام ده خلاني ابص على القسم ده و أحتار بينه و بين الكيمياء.
طبعا قسم الكيمياء يدرس فيه جميع انواع الكيمياء (كمياء عضوية - كيمياء غير عضوية - كيمياء فيزيائية - كيمياء حيوية - كيمياء تحليلية)دهغير ان كل فرع في دول عامل زي الرياضة 2,1 يعني في كيمياء فيزيائية 1 ,2 و اكيد ان بكده يبقى فرص عمله كتيرة و مجالاتها واسعة جدا.
في حين ان الجيوفيزياء ناقصة فرعين من الكيماء هم(الكيمياء الحيوية - الكيمياء غير العضوية)
و على فكرة العلوم الجيولوجية برضه ممكن تطلع على الدرجة الخاصة من الكيمياء بشرط التقدير طبعا و الجيوفزياء برضه تقدير.
بس الاحتمال اللي لازم احطه في اعتباري انه وارد لاقدر الله اني مجبش تقدير و في الحالة دي لو أنا علوم جيولوجية هدخل كيمياء-جيولوجيا ولو علوم طبيعية هدخل كيميا فيزيا و بعدها في سنة رابعة هبقى رياضيات-كيميا
و على فكرة برضه انا احترت بين الاقسام الفرعية كتير يعني لقيت ان في اقسام برغم ان مالهاش فرص عمل الا انها قيمة و ممكن الواحد يعمل ابحاث فيها و دراسات عليا و يبقى معيد فيها يعني مثلا الفيزياء و خاصة مادة الفيزياء النووية و المفاعلات و طبعا دي من علوم طبيعية
و قسم الحاسب الآلي مواده صعبة و قيمة جدا و ليها فرص عمل و اللي بيتخرج منه بيبقى اسمه مبرمج او مصمم
و بيني و بينكوا انا الجيوفيزياء دخلت في حساباتي لأني اكيد كان نفسي في لقب مهندس او العمل في مجال شبه الهندسة فأنا بدور على الاقسام اللي تشبه لأقسام في هندسة مع اعتزازي طبعا بكليتي
يعني انا بحاول اجمع بين القسم القيم علميا و اللي ليه فرص عمل... وعلى فكرة ممكن حد يدخل قسم ملهوش فرص عمل و ميلاقيش فرص عمل بس يبقى معيد و بعدين دكتور و باحث و الشغل كمان في معهد البحوث
فأنا محتار جدا ( علوم طبيعية ) ولا (علوم جيولوجية)و تبقى مجازفة يا تصيب و ابقى مهندس بترول و باخد مرتب محترم يا تخيب و ابقى خريج قسم جيوفيزياء قسم محترم لكن مش لاقي شغل في تخصصي او مش لاقي شغل خالص؟؟؟؟؟؟؟
أنا خدت رأي زميل لنا و صديق ليا هو (اسلام) و عايز اعرف أراء كل زمايلنا.
آسف اني طولت بس انا كان قصدي احط المعطيات كلها قدامكم.
مستني الرأي عشان في خلا اليومين الجايين هختار القسم.
السلام عليكم..

وعليكم السلام ورحمة الله وبركاته

طب الف مبروك مقدما :)

اه انا اعرف انهم بيشتغلو فى شركات البترول والتعدين وفى مراكز الرصد ...
وحكاية المواد التقيله مش عارفه الحقيقه بس الدكاتره فى الجامعه بيقولو ان الشعبه دى اسهل شعبه فى علوم ..
وانها ليها مستقبل حلو زى ما انت سمعت ...

فعلا المقال دا تقريبا جابه علومجى هنا وقريته
كمان سمعت حاجه من يومين انهم قرروا عدم بناء اى مبنى الا لما يشوف الارض اللى هيتبنى عليها واحد جيولوجى ...

كلامك بقا كله اللى جاى بياكد ان مش فى حاجه سهله ولا حاجه صعبه حسب فعلا على قد اجتهاد كل واحد ،،،، وان فرص العمل موجوده ومش موجوده وكلها ارزاق من عند ربنا

فالمهم انك تدخل اللى بتحبه واللى ارتاحتله عشان تجيب تقديرات كويسه و تتفوق فيه باذن الله وتلاقى فرص عمل كويسه ان شاء الله

صدقنى والله ابن صاحب بابا كان جايب مجموع هندسه وحاسبات وكان جايب فى الرياضه 50 من 50 ساب دا كله ودخل علوم ومنشن على قسم رياضيات وانه يكون معيد عشان بيعشق الرياضه بطريقه فظيعه ....

وطبعا مش تنسى تعمل استخاره وتدعى ربنا ديما انه يكتبلك اللى فيه الخير ان شاء الله

ايوة يعني من كل اللي انا كتبته ده .. نصيحتك ليا ايه؟

مانا قولتلك تختار اللى حابه عشان تمشى كويس فيه وبعدين تلاقى فرصة العمل الكويسه ..

بص انت لو حابب دراسة معينة يبقى تدخل القسم اللى بتدرس فيه الحاجة دى
انما لو مش حابب قسم معين توكل على الله وادخل جيوفيزيا
انا داخل قسم جيوفيزيا وسمعت الكلام ده كله وسبتها على ربنا

وحاسس ان ربنا هيوفقنى ان شاء الله
ومسالة الشغل بتاعة ربنا وربنا يرزقنا ويرزقك

انا اكيد حيرتكوا .. عشان انا زي ما تقولو مش هاين عليا اسيب اي قسم كل قسم في حاجة حلوة.
و يا احمد انت عارف ان الجيوفيزياء لازم تجيب تقدير امتياز لأن الاقبال عليه كبير فالعدد بيعلي التقدير.
و هو كلام جريدة المصري اليوم انت شايف انه صح و معقول ولا ايه؟
و لو الواحد لاقدر الله ماجابش تقدير يدخله الجيوفيزياء لأنه (درجة خاصة) او كيمياء خاصة برضه او جيولوجيا خاصة برضه لو مجبتش تقدير الدرجة الخاصة يبقى هتدخل جيولوجيا-كيميا ده بالنسبة للعلوم الجيولوجية.
و العلوم الطبيعية لو ماجبتش تقدير الكيميا (درجة خاصة) يبقى هتدخل كيميا فيزياء
و احتمال اننا ما نجبش التقدير واقعيا وارد .
فهل الكيميا-فيزيا (من علوم طبيعية) احسن ولا جيولوجيا-كيميا(من علوم جيولوجية)؟
بالحق انت جامعة ايه يا احمد؟
و بالنسبة لـ y u n a انا مشكلتي اني حابب كله.
و كنت عايز افكركوا بحاجة.
تعرفوا فيلم "احنا بتوع الاتوبيس" فيه عادل امام قال انه خريج علوم قسم جيولوجيا .. و قال كمان انه مهندس جيولوجي.
هل ممكن ناخد لقب مهندس جيولوجي؟

الفرق ايه ؟؟ فى كلمة مهندس يعنى ؟؟

تقريبا اه خريج جيولوجيا اسمه جيولوجى او مهندس جيولوجى ...

كلمة مهندس يستحقها خرجي بعض اقسام العلوم .. خصوصا ان برغم ان كليات الهندسة واخدة كل الاقسام بتاعت علوم وعاملها قسم هندسي يعني انا متعجب من الهندسة الكيميائية لأن الكيميا دي بتاعتنا احنا.
بس بقى مفيش حاجة امسها هندسة جيولوجية يبقى اكيد من علوم.
حضرتك قولتي بيولوجي يبقى اكيد انتي علمي علوم .. أنا كنت فاكر ان علوم طبيعية للعلمي رياضة بس و الجيولوجيا هي القسم المشترك.
و بالنسبة لموضوع ان جيولوجيا-كيميا احسن من كيميا فيزيا.
هو حضرتك اصلا ناوية على قسم من العلوم الطبيعية؟
و مفكرتيش خالص في الجيولوجيا؟

__________________

'طبعا كل الكلام اللى اتقال فى الجريدة ده سليم لان قسم الجيوفيزيا ده يعتبر من احدث الاقسام فى كليات العلوم
دلوقتى وممكن لو جبت فيه تقدير عالى تشتغل فى شركة بترول كانك معاك هندسة وتعدين السويس وزى ما انت قلت الجيوفيزيائى ممكن يعرف اكتر من مهندس بترول بتاع هندسة وتعدين السويس
وبالنسبة لحتة الاختيار بين الكيميا-فيزيا (من علوم طبيعية) او جيولوجيا-كيميا(من علوم جيولوجية) فده انت اللى تحدده على حسب ميولك ولكن خلى كلى طموحك انك لو دخلت لازم تتفوق فيه ان شاء الله
وانا يا محمد فى علوم عين شمس الفرقة الاولى قسم جيوفيزيا :)

................

ايوة لو خلصت القسم الجيوفيزيا بتقدير عالى ممكن تشتغل فى شركة بترول وتبقى مهندس بترول زى ما الجريدة قالت وممكن فعلا الشركات بتطلب عدد من الطلبة الممتازين فى قسم الجيوفيزيا من الكلية وتتعاقد معاهم قبل ما يخلصوا الدراسة زى ما الجريدة قالت وحكاية الشغل دى زى ما قلتلك حاجة بتاعة ربنا متفكرش فيها كتير وتتعب نفسك سيبها على ربنا وخلاص
وحكاية الجيولوجيا بترول دى انا معرفش القسم ده لانه تقريبا مش عندنا فى الكلية بس فى الغالب هيبقى الدراسة فيه زى الدراسة فى الجيوفيزيا فمش هتفرق كتير


والله بقى دى حاجة انت اللى تختارها برغبتك و لتانى مرة هقولك اختار اكتر حاجة بتحبها وكمل فيها

بيدرسوها فعلا تقيلة و مهمة جدا و اسمائها كبيرة " رصد تثاقلي - رصد سيزمي - رصد حاسب -جيولوجيا بترولية.. و حاجات كتير تانية".


فعلا الاسماء لذيذه يامحمد .... يامحمد المواد لو كانت بالاسماء كانت الرياضيات تبقي اسهل ماده...واللغه العربيه تقي اصعب....علي العموم ماشي اقولك انا بقي حاجات في الكيمياء والميكرو اصعب من الأسماء دي.....bacteriology >>>analytical>>>>actinomistat



وانا قبل كدا كان ردي كيمياء.....شغل الكيمياء كتير.....وتقدر كمان تشتغل بالكيمياء في شركات بترول ....وتكرير البترول لازم ليه شغل كيمياء.....انما شركات الأدويه مش لازم ليها شغل جيوفيزياء.....محمد التردد هيتعبك أوي في حياتك العمليه....وخد خبره الأكبر منك عن ثقه...زي قريبك المهندس الكيميائي ده...واسال اي حد اتخرج من علوم هتلاقي 98% منهم هيقولولك كيميااااااااء......وال 1% هيقولك فيزياء و 1% هيقولك جيوفيزياء بقي وعلوم فضاء وغيره.....وللمره التانيه بقولك شغل الكيمياء كتير....وربنا يوفقك....