بصراحة من فترة نفسى اكتب الرسالة دى

بس كنت بعالج مرارتى من الانفقاع عقبال السامعين

هتقولولى يا مواطن واية الى فقع مرارتك

هقولكم طبعا وانا اقدر اخبى عن جروبنا حاجة

خير اللهم اجعله خير

قال اية كنت راكب فى المترو ولقيت جنبى واحد بيقرا فى جرنال

فعملت عبيط وقعدت اقرا بنص عين الاخبار المكتوبة

وقال اية الاقى فى الصفحة الاولى فى الجريدة الرسمية الاولى خبر بيقول

مظاهرة تقيمها فتيات الطبقة الراقية

قلت اكيد عايزين يقيموا مظاهرة علشان احساسهم بان النبى اتهان

ولا علشان الناس الى فوق تتلحلح شوية وتشوف حل لقضية القدس

اللى حمضت من الانتظار فى الملفات

ولا حتى تشوف حل لمطبات الشوارع ولا الغلاء

ولا فاتورة التليفون الجديدة ولا يمكن لتحرير العراق المغتصب ارضة ونسائة

ولكن فوجئت انى مواطن مش عايش فى الدنيا

وانى متاخر تلاتة مليون سنة على الاقل عن الاحداث الجارية

ورحت ضارب بعينى فى السطر الاولانى فى الخبر اقرا بقى

وقلبى فرحان ان تحرير المراة جاب فايدة

الخبر بيقول اية

فتيات الطبقة الراقية فى مصر عاملين المظاهرة بالعربيات بتاعتهم

ورافضين اى واحدة تروح من غير عربية

قلت وماله هما برضة الطبقة الراقية

مش معقول هيبقوا زينا ويمشوا على رجليهم

وكمان دول بنات يعنى السترة ليهم افضل جوة العربية

علشان الطوب والدبش واى خناقة فى المظاهرة برضة

ولان الموضوع منظم ودى صورة مصر قدام العالم

فلازم نبقى عالم شيك افهموها بقى

بكمل بقية الخبر لقيتهم كاتبين

على كل فتاة تشترك فى المظاهرة انها تجيب اتنين بوستر للنجمين

قلت نجمين اية يكونش مصر بقى فيها وكالة فضاء زى ناسا بتاعة ماما امريكا

قعدت اضرب اخماس فى اسداس

وقلت اكيد الموضوع لية علاقة بخسوف الشمس ولا كسوفة اللى حصل

واللى احتفلوا بية

بانهم جابو رقاصة ترقص فى مرسى مطروح وقت الكسوف ولاالخسوف

ففهمت لية الشمس اتكسفت

بس الصراحة مش عارف اية علاقة الهشك بشك بالكسوف الشمسى

المهم رخمت على الراجل صاحب الجرنال

وركزت بعينى فى الصفحة علشان افهم لية المظاهرة

تتوقعوا بقى ليييييييييييييييييية المظاهرة

اقولكم ولكن خلو بالكم

قسم المرارة المفقوعة مليان على الاخر بالشعب المصرى والشعوب المجاورة

فكل واحد يحافظ على مرارتة

تصوروا السبب الرهيب

فتيات الطبقة الراقية تقيم مظاهرة بالسيارات امام القسم

المحجوز فية المطرب الشاب تامر حسنى والمطرب هيثم شاكر

بعد ان ثبت ان احدهم زور شهاداته الرسمية والاخر هارب من التجنيد ومزور الشهادة

ويشترط لحضورالمظاهرة ان تاتى الفتاة بالسيارة

وان تلصق بوسترين للنجمين على الزجاج الخلفى للسيارة

واى فتاة لن تفعل هذة الشروط لن يعتبروها متظاهرة معهم

انتهى الخبر

اة والله العظيم مش بهرج ولا بكدب

مصر ام الدنيا يا نااااااااس

كفاياكم رجعية وتخلف

ان مكانش هيتظاهروا علشان تامر حسنى هيتظاهروا علشان مين وعلشان اية ؟

الله يخرب بيوتكم

نفسى افهم اية الى هيحصل فى المظاهرة دى ؟


هيرعبوا قوات الشرطة بالكلاكسات ويعملوا بيب بيب ؟؟؟

وهتافات ياى ياى تامر ياى ياى هيثم هيا دى المظاهرات ؟؟؟

حتة عيل تافة والتانى اتفه منه يتعمل عليهم كدة ؟؟؟؟

هيا دى القضايا الى شاغلة عقل بناتنا ؟؟؟؟؟

هيا دى البنات الى مفروض هتطلع وتربى اجيال زى صلاح الدين ومحمد الفاتح ؟؟؟؟

هيا دى البنات الى مفروض نص المجتمع ؟؟؟؟؟؟؟؟؟

خلاص بقى تامر حسنى وهيثم والى على شاكلتهم ابطالنا ؟؟؟؟؟؟؟؟؟

انا متصور منظر قوات الشرطة المساكين

وهما بيتحدفو بالبسكويت الى بيعور

كانت الاصابات بالغة خاصة من البسكويت الى محشى عجوة كان فتاك

انا بحب بعض اغاني تامر لكن الحق حق
انا نفسي اعرف ليه المظاهرات دي علي ناس المفروض انها تتعاقب
المظاهرات تبقي علي واحد زي ايمن نور المظلوم الي اتطس 5 سنين ظلم
وربنا علي المفتري والحكومه

لقد اضحكنى كلامك كثيرا

ولكنه ابــــــــــكـــــــــــــــــانـــــــــى .......................... أكثر

حسبنا الله ونعم الوكيل

فعلا دى حقيقه لو رحت انت مثلا نادى الاهلى هتلاقى البنات هناك بينظوا الحملات دى ويخرجوا من بوابه النادى ويكملوا المسيره



عادى يعنى


سلام

هم يضحك وهم يبكى
بنات فاضيه

بنات اخر زمان

احنا فى زمن العجيب

في هذا الحالة نقول الجملة الشهيرة
يبقى أنت أكيد في مصر

دى بنات فاضية والله

فعلا التفاهة زادت الايام دى اوى .....

شكرا على الموضوع المضحك والمحزن فى نفس الوقت

لا تعليق.

اللى يشوف (مصيبه) غيره تهون عليه (مصيبته)

والله شكلهم حلو وهما بيهتفوا

توتو ثومه توته ثومه

ادى التقدم ولا بلاش !!!!!!!!!!!!!!!!!

يا جماعة عادي دي الحاجات دي بقيت عادية في بلدنا
حسبي الله ونعم الوكيل

انا سمعت حد بيتكلم عن النادي الاهلي
احنا بنتكلم في حاجه وانت بتكلم في حاجه تانيه
انت شكلك زملكاوي تعبان

بالله عليك يا شيخ انا مرارتى ملتهبة
ومش بتتحمل الاخبار دى

انا كنت فاكرة ان الموضوع ده في مدرستي بس



وعلى فكرة انا زميلاتي زعلنين موت عشان تامر واللي عمالة تعيط عشانه



ولا كأنه شهيد من شهداء فلسطين





وانا كمان مررتي مفقوعه من زمان ومازالت

هيزعله علي ايه الحق حق
يزعله لو هو مظلوم

لا حول ولا قوة الا بالله



..........