|
(( ماتوا الرجالة فى حرب 1973 ))
بسم الله الرحمن الرحيم
كنت بسمع الكلمة دى كتيييييييييير اوى بس مفهمتهاش غير النهارده بجد (( ماتوا الرجالة فى حرب 1973 )) بجد والله العظيم شئ محزن جدا مصر واللى اولادها كانوا معروفين بالجدعنة والاخلاق والرجولة معرفش ايه حصلهم النخوة انعدمت مبقيتش تلاقى راجل فى الزمن ده والموقف ده حصلي النهارده كنت راكبة الميكروباص عودة من الجامعة وبعد رحلة شاقة فى المترو وحصل شد ما بين اتنين .. واحدة كبيرة فى السن قد جدتى ،، والتاني راجل عادى الخناقة كانت ما بينهم هما الاتنين فقط لا غير الست دى قاعدة جنبى معرفش فجأه لقيت شاب عمره ما بين ال 20 و ال 25 قام شاتم الست دى شتيمة قذرة :mellow: قامت الست شاتماه شتيمة اقذر :mellow: قام قالها ....... ده يبقي جوزك قامت قالتله بس يا ...... يا ابن الـ ........ لقيت الراجل قالها متغلطيش ف امى ده انا هربيكى والاقى الراجل نزل فى الست ضرب والناس تهدى فيه وهو لو طال يخرملها عين كان عمل الست مسكتتش وهاااات يا صويت و قلعت النضارة وشمرت اكمامها و فضلت تضرب فيه وتشتم انا كنت جمبها كل اللى قدرت اعمله انى مسكتها بجد وكنت بشدها وكنت عمالة اقول اعوذ بالله من الشيطان الرجيم واقولها اهدى يا امى الست كانت عمالة تقولى حاسبى كده بس بجد مكانش ينفع اسيبها كانت هتتبهدل :( المهم الواد مسبهاش واول مرة ف حياتى اسمع واحد بيشتم ف دينه .. ايه ده هو فى ناس كده بجد :mellow: وبما ان الرجالة كانت ماسكة ايده لقيت الراجل طالع برجله معرفش ازاى و هات يا ضرب ف وشها و ف جسمها بجد كان نفسي اخد الست دى ف حضنى انا مش عارفة ازاى فى بنى ادم كده انا راجعة البيت وايدى واقفة تماما مش قادرة احركها و مليانة كدمات زرقة والله وخربشة فما بالكوا بيها وهى انسانة كبيرة فى السن والبنى ادم ده مش راضي يعتقها هل بجد وصلت بيه البجاحة لكده ؟ فعلا انا مستغربة اوى وحزينة اوى اوى اوى والست بعد ده كله لما هديت فضلت تحسبن وتعيط وانا اقولها معلش يا امى حقك عليا يا امى والاقى الحقير ده نازل عليها ضرب تانى انا بجد معرفش اتكلمت ازاى بس لقيت نفسي بقوله ميصحش كده ع فكرة عيب اوى اللى انت بتعمله ده :angry2: كل اللى انا فاكراه انى لقيت ناس بتضحك عليا الحمد لله ان الواد مقلبش عليا :mellow: بس قسما بالله انا فعلا كان نفسي انزل فيه ضرب وخاصة اننا كنا اتعلمنا ان فى كذا منطقة ضعيفة فى الجسم بتضعف اللى قدامك اوى وممكن كمان تخدره لمدة بس لو الضربة طلعت صح بس بجد كنت خايفة اوى الست وهيا بتعيط جنبى والناس ماسكة الراجل بجد صوتها والبهدلة اللى شافتها والله خلونى اعيط جنبها اكيد الناس دى مش بشر عادية مينفعش ده يكون انسان والله انا مش مصدقة ان ده حصل ولو حد كان حكهولى مكنمتش هصدق انا اعرف ان مش من الرجولة ولا الدين ولا الاخلاق ولا اى الانسانية انى امد ايدى ع واحدة وكمان كبيرة فى السن !!!!!! لا تعليق (( فعلا لقد استنوق الجمل !! ) |
فعلا يا براءة دول مش بشر
يعنى فين الرجولة لا حول ولا قوة الا بالله ده بدل ما يحامى عنها و يقول دى ست كبيرة فعلا خلاص الرجالة ماتوا و انتى عملتى اللى عليكى بس نقول ايه لا حياة لمن تنادى |
ولد اخو صاحبتى فى اولى اعدادى
بيحكيلى بيقولى المدرس بتاعى ضربنى قمت شتمته :mellow: اعصابي باظت يا جماعة خلاص :mellow::mellow: |
شكرا يا شيرين ع ردك
والله والله ايدى واجعانى يا شيرين فما بالك بيها انا عمالة افكر بجد يا ترى الست دى عاملة ايه دلوقتى ؟؟؟؟ |
اللهم لا حول ولا قوة الا بالله
|
لا حول ولا قوة الا بالله
اللهم اهدى شباب المسلمين |
اقتباس:
|
والله يا رحمة شكلي انا اللي هتخانق معاكي :stickjo4::stickjo4: مش معني ان الجملة دي بتنطبق علي عدد كبير من الشباب يبقي معني كدا انها علي كل الشباب الشيخ عمر عبد الكافي قال جملة عجبتني اوي ان اي راجل يمد ايده علي بنت او ست دي مش اسمها رجولة دي اسمها ذكوره والمقصود ان صفة الرجولة اتشالت منه اللي كان بيضرب الست دا مش راجل بكل المقاييس والمفروض ان الناس مكنتش تحوشه المفروض كانت تضربه لحد لما يفوق او يتكسر والله حصل قبل كدا اني شديت مع واحده و هي غلطت فيا وكنت علي اخري وهضربها بس سبتها ومشيت واحد من صحابي من كتر ما هي مزوداها قالي المفروض كانت تتضرب دا حتي في الدين الرسول صلي الله عليه وسلم لما كان بيضرب زوجاته كان بيضربهم بالسواك وعلي الرغم اني حاسس ان الست عملت حاجه جامده في الواد دا بس برضو دا ميبررش ان الواد دا مش راجل علي فكره كانت هتبقي في زعله بسبب اسم الموضوع دا لولا اني عارف انك متضايقه من الموقف وممكن تكوني بتكتبي وانتي متعصبه لان الموقف اكيد طبعا مش سهل وعلي العموم ربنا يهدي العيال دول ويبقوا رجاله او ياخدهم لانهم مش هينفعونا بحاجه |
اقتباس:
شكرا ليكى :) |
عشوائية
هي دي الكلمة اللي تلخص الحالة اللي احنا عايشين فيها في مصر عشوائية في السلوك وانعدام في الاخلاق العربيات اللي ماشية في الشارع والناس اللي حواليها العمارت اللي طالعة في العلالي والناس اللي جواها باختصار بقينا عايشين في عشوائية احساس عام بالظلم والقهر والكبت عايز يتفرغ |
اقتباس:
ما انتوا بتمسكولنا ف دى حاطة مكياج ودى بتضحك ازاى وانتوا والله اول ناس عاوزين يتعاد صياغتكوا وتربيتكوا من جديد مش اقصدك يا عادل انا عارفة انك انسان محترم بس بجد انا مستغربة اللى حصل ده جدااا جدااااااا مكنتش اعرف انها وصلت لكده :confused: وبعدين الست مقربتش منه ده الواد اتحمق للراجل اللى الست دى بتتخانق معاه ما هو لو كان فى راجل واحد اساسا فى العربية دى مكانش ده كله حصل لا وف الاخر السواق وقف الميكروباص قلت ف بالى هينزل الشئ ده لقيته رايح يقول للست عيب متشتميش انتى ست كبيرة :confused: وبعدين هتزعل منى ليه ده واااقع :angry2: انا متضايقة اوى :( |
اقتباس:
مش عارفة ليه من ساعة ما دخلت علوم وانا فهمى بطئ :confused: شكرا يا احمد شكل كلامك كبير الصراحة :mellow: |
اقتباس:
|
انتى عارفه ايه يا رحمه اللى بيعجبنى فى مواضيعك
انها يوميات يعنى انتى الحاجه بتحصلك فى يوم وبعدين ترجعى تعمنلى عليها موضوع فى المنتدى بجدحاجه جميله جدا وده اكبر ضمان على ان موضوعاتك مش مكرره يا ريتكلنا نبقى زيك ندخل فى الموضوع بقى انتى بصراحه حرقتى دمى وانا بحب اكون موضوعى على قد ما اقدر يعنى انا حاليا نفسى اعرف الولد ده شتمها ليه خلاص مش هنعرف وعمرنا ما هنعرف ما علينا الست بترد عليه كده ازاى يبقى الاتنين شلق طبعا حقها تدافع عن نفسها لكن يا ريت الواحد لوحاسس انه هيتبهدل ما يدخلش نفسه مع عالم زباله فى مواقف مالهاش لازمه عموما يا ستى انا حاسس انكلامى مش مترتب ومالوش معنى علشان كده انا هنصحك انتى وخلاص يا رحمه احناطبعا عارفين مهاراتك فى الكونغفو بس اعملى دايما حساب لانك بنت محترمه فى حالك دول عالم ولا مؤاخذه يعنى مع بعضيها خدى نفسك على جمب ومالناش دعوه بالعالم دى انا لو اختى مكانكوعملت زيكهزعقلها انا ايش يضمنى رد فعل بنى ادم سافل بيتخانق مع واحده فى سن امه على واحده قداختى اكيد العن واضل سبيلا يبقى انتى تاخدى بعضك كده وتقومى اصلا من المنطقه دى موضوع جميل جدا بس صدقينى الرجاله ايام السبعينات ما كانوش رجاله قوى زى ما انتى فاكره اللى كانوا عايشين فى مصر ما كانوش الجيش المصرى اللى حرر سينا بس الوحشين والكويسين موجودين فى كل مكان واضح انى طولت عليكى اسف وده ان مجرد راى |
عارفه يا رحمه أنا لو مش بثق فيكى كنت قولتلك إنتى كدابه بجد أنا مش قادر أتخيل المنظر وبعدين دا مترو يعنى أمه لا إله إلا الله راكبه محدش قام عرفه مقامه لما مد إيده على ست بجد أنا عاوز أدعى عليكى لأن الموضوع ده نكد عليا |
| جميع الأوقات بتوقيت GMT +2. الساعة الآن 02:54 PM. |
Powered by vBulletin® Version 3.8.11
Copyright ©2000 - 2025, Jelsoft Enterprises Ltd.