كل جيل وله زمانه
إننا نقول على الجيل ده جيل فاشل كده لوحدها فده يعتبر خطأ - في نظري الشخصي -
ايوه ... احنا جيل فاشل في نظرهم لحاجات كتير هما تفوقوا فيها
دلوقتي بقى الواحد مبيعرفش يروح الشارع اللى جنبهم مشي في حين هما كانوا بيسافروا لوحدهم وفي سن صغيرة (وده مر بيها كتير )
بس برده دلوقتي مبقاش امان زي زمان والعملية مش سهلة
بقينا بنتدلع ونقول المناهج بتاعتنا صعبة وهما زمان مناهجهم كان اللى يجيب فيها 85% كان عبقري !!!
بس برده متوسط التفوق دلوقتي بقى من 100%
كانوا زمان بيشتغلوا حاجات مفيدة
الابن بيطلع يشارك ابوه في شغلته او يتعلم منه خبرات الحياة
دلوقتي بقى صايع في الشارع مش لاقي حاجة يعملها غير يقعد مع اصحابه
اصل بقت وظيفته الرسمية " عاطل "
والبنت كانت بتشارك امها في البيت وتتعلم خياطة شوية وطبخ شوية ومش عارف ايه
دلوقتي بقت البنت قليل بتشارك الام والبيت وبقت هي كمان في الشارع او بتدردش عالنت !!
مهي لازم تواكب العصر اللى خرجت فيه المرأة للعمل !!
في الحسابات وفي الاعمال وفي البيع والشرا تلاقي الاب شغال يحسب بدماغه
ويرجع البيت يسأل ابنه
15×10 بكام ؟
يقوله ثواني اجيب الآلة الحاسبة !!!!
معلش اصل دلوقتي بقى عندنا الرياضيات الحديثة اللى بتعتمد على الآلة الحاسبة ومش محتاجين نتعب نفسنا فيها
ييجي الأب يبعت ابنه يشتري 2 كيلو خضار ولا فاكهة من تحت
يقولو اصل مش بعرف "أنقِّي" الحلو من الوحش
يعني الكلام ده مش على كله بس في كتير كده
بس زي ما كل حاجة ليها عيوب ومميزات
الجيل الجديد برده فيه دلوقتي مميزات مش موجودة في اجيال سابقة
بقى دلوقتي الطفل يمتلك عقلية يمكنه بها أن يخاطب الكبار !!!
والامثلة كتيرة
تلقى العيل الصغير بيقول كلمة يدهش الوالدين إنه زي ده ممكن يدرك حاجة زي ده
ضيعنا وقت كتير على الكمبيوتر والبلاي ستيشن
بس ده هو بقت وسيلة الحياة في المستقبل
واللى ميعرفش حاجة عن الكمبيوتر لحد دلوقتي فعلاً بيتعب
وبشهادة المدرسين اللى اخدوا دورات الكمبيوتر حسوا فعلاً بقيمة الكمبيوتر وإنهم كانوا ظالمينه بإنه ملوش لازمة ولعب عالفاضي
بقى دلوقتي الطفل ليه القدرة إنه يقدر يلعب العاب games وصعبة ويكتشف اسرارها في حين الكبير ممكن ميعرفش يمشي فيها ازاي اصلاً
وطبعاً لما بيتعلم بعد كده الكمبيوتر بتكون مسكته ليها سهلة وبسيطة
العقلية دلوقتي بقت كبيرة جداً
وتفكير ناس دلوقتي مش زي زمان
بس محتااجين اللى يمهدلهم الطريق
وشوفوا الطلبة لما بيتفتح ليهم المجال بيخترعوا ايه
حالة الفشل ده بيبقى الشخص مجبر عليها
بس اكيد او كانت توافرت ليه ظروف زمان كان حيمشي فيها
والوحش في حاجة عنده ميزة في حاجة تانية
مفيش حيوان ضار كله ومفيش طعام نافع كله
|