[محمد.فوكس]

شوف يا معلم .. انا بكلمك دلوقتي و انا كنت الصبح في امتحان كيمياء و الحقيقة محلتش حلو اوي يمكن انا مش مذاكر او الامتحان صعب مش عارف.
ببساطة انت عايز رأي الناس .. و انا عشان اقولك رأيي هحط نفسي مكانك.
انت ممكن تكون فكرت في كده لانك حسيت انك المفروض تدخل اعلى كلية في المجموع عشان تستفيد من كل درجاتك.
و ده فعلا وجهة نظر .. بس اتقد مش اي كلية مجموعها عالي شوية يبقى ده معناها انها احسن من اللي مجموعها اقل.
انا علمي يعني طلع عيني في مواد صعبة .. فعشان أستفيد بدراستي للمواد دي و ما كونش دخلت علمي عالفاضي يبقى ادخل كلية علمية .. لان سياحة و فنادق ممكن تدخلها من ادبي و اعتقد نفس المجموع اذا كانش اقل.
و انا معاك ان كلية العلوم صعبة و صعب تجيب فيها تقدير.
بس انت لازم تشوف انت تحب تدرس ايه ..او بمعني اصح عايز تبقى ايه .. لان طبعا دراسة سياحة و فنادق اسهل و الذ عشان لغات و مواد لطيفة كده انت مرتاح في كليتك ولا لأ ... و اكيد لو الموضوع على السهولة كان محدش دخل طب ولا علوم.. لكن دور انت تحب تكون ايه ... دي اهم حاجة..و لو روحت سياحة و فنادق هتكون مرتاح ولا لأ.
و في حاجة كمان .. انت شايف فرص عملك في المجالين ايه .. يعني لو ليك حد يشغلك في اي من المجالين اعتقد تبقى فرصة كويسة و تدخله.
و كمان البرستيج و اسم المؤهل دي حاجات ممكن ميكونش ليها قيمة بس ساعات بنحس انها ليها قيمة .. يعني لما تقول لاي حد انا في كلية كذا او معايا بكالوريوس كذا..بس طبعا دي آخر حاجة تفكر فيها.
الموضوع كله يعتمد على طريقة تفكيرك .. انت اللي يهمك ايه .. انت تستغل مجموعك اكبر استغلال.. ولا انك تدخل الحاجة اللي شايف انك هتقدر تشتغل بيها..و لا تدخل الحاجة اللي انت حاببها(مش الدراسة نفسها .. الوظيفة يعني على سبيل المثال تحب تكون موظف استقبال و لا كيميائي) .. و هل المنظر او البرستيج ليه فرق معاك؟
و طبعا لازم تصلي استخارة .. و تذاكر كويس السنادي في علوم عشان لو فكرت تكمل متكونش ضيعت السنادي.
و لسه انت قدامك و قت كبير تفكر فيه.
على فكرة انا عامل زيك بس مش بالضبط .. بفكر اقدم كلية عسكرية السنة الجاية مش عشان محبيتش علوم .. لا عشان بحب الكليات دي و في مواد علمية جت يا مجاتش اكمل في علوم ... المهم دي موضوع تاني و ليه ابعاد تانية مش مجاله دلوقتي.
فكر كويس يا معلم و ربنا معاك في اللي تقرره.
و بالمناسبة انت جامعة ايه؟