النصر جاى
لما الرصاص طالنى
قتلنى
كتبت بحروف دمى
حرفين
وقعت قنابل شتت
بددت اللى كتبته
(غين و زين )
القنابل الفوسفورية
اللى نازلة فينا تقتل
اللى طايحه تجرى ورانا
تجرى العيال
مش خايفه منها
العيال مش خايفه موتها
العيال خايفه لترحل قبل ما تشوفكيا غزه
رافعه راسك
قبل ما تدوسى اللى داسك
كل القنابل
والقذائف
والشظايا
ف قلوبنا ترسى
ترسم فى لوحة الوطن
حبك يا غزه
أرسم بدمى عيون حبيبتى
تجرى عروقى
شايله شوقى
تبعت رسايل للعرب
ياناس يا هووه
كل طفل عندكم فى حُضن أبوه
واحنا عرايا
واحنا ف صدورنا كوم رصاص
احنا خلاص
حبة جماجم
مرميه فى وسطك يا غزه
مش لاقيه قبر يضمنا
مش لاقيه دنيا لحلمنا
ضاقت بنا
كل الطرق
تاه بعضنا
مش لاقى بعضه
غصن الزتون
مش لاقى أرضه
ومعادنا فوق
عند جنة ربنا
والنصر جى
--
محمد على يناير 2009