سامحونى
لأن دى من يوميات النكد اليومى
ميركل مستشارة ألمانيا قلبها كبير
صعبنا عليها فبعتت لنا منحه لعمل مشروع صرف صحى بالقرية
ومع ان عندنا مشروع صرف صحى بجهود اهالى القرية وكان شغال ميه ميه
لكننا فرحنا وقدرنا ألمانيا ومصر للعمل العظيم
فى البداية قالوا لنا التوصيل ببلاش فقلنا الله عليكم تسلم إيديكم
لكن فجأة لقينا شركة المياه والمحليات جايين يعملوا مقايسات وفرض فلوس خيالية علينا
فقلنا لازم نحترم حكومتنا ودفعنا ويعلم ربنا إزاى دفعنا ومنين
الرائع فى الأمر جه المحافظ والسفير الألمانى ومجموعه من مستشارى الشركه الألمانية والمصرية وافتتحوا المشروع وسط بهجة هستيرية من الكل
الأروع إننا بدأنا الحفر للتوصيل على المشروع الجديدفوجدنا أن غرف المشروع أعلى من غرف الصرف للبيوت متر وأكثر
يعنى اللى اتعمل لهم المشروع مش عارفين يستفادوا منه
وكان رد مهندسى الشركه المصرية المسئوله عن المشروع
احنا خلصنا المشروع وسلمناه ومفيش حل غير انكم تغيروا السباكه فى الدور الأول للبيت أوتعلوا البيوت لتصل لغرفة الصرف أو تلغوا السكن فى الأدوار الأولى
طب بزمتكم لو ميركل اتصلت وسألت عن أخبار المشروع تنصحونا نرد عليها ونقول لها إيه ؟
نحن فى مصر كلنا نحمل دكتوراه فى إهانة بعضينا والضحك على بعضينا
والوهم الكبير لما تتوهم إن فيه حد فى البلد كلها هيسأل فيك ويحس بيك
احمد ربنا انك عايش
__________________
الحمد لله
|