مواطن مصري بسيط اسمه "رمضان سيد" وجّه مناشدة واستغاثة إنه عايز يعالج 3 من أولاده اللي بيعانوا من أمراض متعددة وجت الاستجابة فوراً وبسرعة أكبر بكتير مما يتخيل الراجل الطيب ده وأمنيته الوحيدة من الدنيا بفضل ربنا اتحققت!.. إيه الحكاية؟..
عم "رمضان" بيشتغل حارس أمن في واحدة من الشركات.. عنده 47 سنة وعنده 6 أولاد فيه منهم 3 من ذوي الاحتياجات الخاصة.. بنته الكبيرة "دُنيا" عندها 21 سنة وبتاعني من ضعف السمع وعصب العين ومحتاجة عملية زرع قوقعة.. ابنه "سيد" عنده 19 سنة وبيعاني من ربو شعبي وثقب في القلب وقصور في وظائف الرئة، وبنته "نجاة" عندها 11 سنة في خامسة إبتدائي وعندها كهرباء زايدة في المخ وإفراط زائد في النمو.. عم "رمضان" عمل استغاثة قال فيها إن مفيش عنده غير أمنية واحدة وهي إن أولاده التلاتة يلاقوا رعاية صحية خصوصاً إن ظروفه مش هتمسح إنه يوفرلهم ده..
الرئيس "عبدالفتاح السيسي" في لفتة إنسانية معتادة فوراً وبمجرد ما تم عرض الاستغاثة وجّه بعلاج أولاد عم "رمضان" على نفقة الدولة وتم بالفعل نقلهم من خلال عربيتين إسعاف مجهزين لمستشفى معهد ناصر لإجراء الفحوصات واتخاذ الإجراءات الطبية اللازمة..
الرئيس كمان وجّه بتوفير كل احتياجات الأسرة وتقديم الدعم اللازم ليهم بكل صوره.. عشان كده وزارة التضامن الاجتماعي استخرجت بطاقات الخدمات المتكاملة للأبناء المرضى والحصول على نسبة العجز المقررة، ووزارة التموين استخرجت بطاقة تموين للمواطن..
دي مش أول مرة نكتب عن المواقف النبيلة للرئيس واستجابته لطلبات ناس بسيطة، ومش هتكون آخر مرة.. ثواب جبر الخاطر بيبقى من ربنا مش من الناس، وجزء كبير من كرم ربنا على مصر سببه المواقف الإنسانية اللي بنشوفها كتير الفترة الأخيرة وفيها جبر لخواطر المصريين.. تحيا مصر.
#بالعامية_المصرية
__________________
ابتسم ... كن متفائلا ... وقل الحمد لله 
|