شوقى للكلام
واشتقت ليكى زى شوقى للكلام
اللى وحشانى حروفه
مشتاق أشوفه
باتمنى يرجع
واتمنى أرجع
يرجع كلامى يونسك ياذكرى حلوه
مش لاقيها
مش لاقى فيها أى حاجه أفتكـــــرها
هيا وغيرها
كل اللى فاكره كان سكوت
زى سكوتى
كل اللى فاكره الأسئله
والاجابه مش واحده عندك
مش فاكر غير سؤال
والسؤال عنى كفايه
والسؤال عندى بدايه
والبدايه والنهايه وجهين لعملـــه
مشتاق لجمله
من غير اشاره
محتاج أزعق
محتاج ابيع كلام كتيـــــــــر
ولو بالخساره
ماسمعشى غير كلامى
ياللى طول عمرى باسمع فى السكوت
واعيش واموت
وانا قلبى خايف منك قوى
بعد ضربة موت وصابت
وفضلت ساكت
واسكت قوى
مش فهلوى
انا أصلى حابب إنى ساكت
واحضن سكوتى
من زمان
واشتاق إليكى زى شوقى للكلام
مليون سلام
محمد على