[أسيل رزق]

ايه اكتر قسم بتحبيه فى المنتدى ؟
العام و التنمية البشرية والمطبخ ( بالترتيب كده )

يتحاربى عشان احلامك ولا سيباها و زى ما تمشى و خلاص ؟
زمان كنت بحارب بس دلوقتى تعبت وسيباها زى ما تمشى

موقف صعب كشفلك عن حقيقة ناس كنتى مخدوعة فيهم
جه فى بالى موقف طويل اوى مش هقدر أحكيه .. بس إكتشفت إن واحدة كنت فاكراها صاحبتى كذبت عليا و قالت كلام مش ظريف عليا من ورايا .. ربنا يهديها بقى
حاجة بتحاربى عشان تفضل معاكى
أصحابى

سؤال رفيع : ايه سبب كرهك ليا فى الاول
دا إنتى كنتى رخمة .. مسحتيلى كل مواضيعى القديمة أكتر من 8 مواضيع يا مفترية دا لولا إنك بنت وربنا كنت بهدلتك ساعتها بس أنا فوتها بمزاجى .. ونقلتيلى موضوع احترس الرجولة ترجع إلى الخلف لقسم جرس الفسحة .. مسحتى أول مواضيعى وحذف نهائى وشفت موضوع منهم عضو منزله من كام يوم إفتكرت اللى عملتيه فى مواضيعى كل ده و عايزانى أطبطب عليكى .. كنتى مشرفة فاشلة .. بس ده ما كنش كره لإنى عمرى ما كرهت حد الحمد لله .. بس ده كان غيظ وخنقة ولو كنت بكرهك ماكنتش إحتكيت بيكى ولا كلمتك
و يا ترى الاحساس ده اتنقلك من حد و لا هو كدا لله فى لله
الحمد لله مش بقتنع بإحساس حد أو بكلام حد إلا لما بشوف بنفسى

الحاجات دى تمثلك ايه ؟
الارض بنتولد عليها وبنموت عليها
السما خيال واسع وتأمل بلا حدود
البحر كحياتى كل موجة هى لحظة مريت بيها او موقف حصلى
الزحمة شىء خنيق ومُزعج
الهدوء شىء جميل ولطيف ويحمل معانى الراحة
الخيال حاجة كويسة بس بيودى فى داهية أحياناً
الطيبة مش نافعة فى الزمن بتاعنا ده
الوفاء قلب صافى

انا شقية ولذيذة وبحبك جداً و نفسى أشوفك علشان أضربك ( من غير سبب )

ايه اجمل هدية جاتلك ؟
هدايا أخويا كلها حلوة أصل ذوقه حلو وعارف بحب إيه ..
و ايه الهدية اللى نفسك فيها و عايزاهى من مين ؟ اوعى تقولى انا اصلى مفلسة
قلوب كل الناس وتقريباً صعبة شوية الهدية دى
يا ترى ايه اللى بيدور فى بالك و انتى لوحدك؟
حاجات كتير دا أنا بحاول ماقعدش لوحدى كتير.. بفضل أفتكر مصايب ومشاكل وأعااااااااااااايط
مين اصحابك من المنتدى ؟ و برة المنتدى ؟
كل البناتيت أصحابى .. برا برده كل البناتيت أصحابى
بتجيبى الشخصيات اللى فى موضوعك دى منين ؟

سر المهنة يا لوحى
ممكن تغشيشينى الصورة الجاية ؟
تؤتؤ
يا ترى لو زعلتى من حد بتعملى ايه ؟
بخلى ليلته أسود من شعر راسه:abdoog8:
فى الحقيقة لو حد من أصحابى قلبى رُهيف خالص بصالحهم بسهولة و ببقى ساعتها عيوطة خالص .. لكن لو حد تانى بفهمهم غلطهم لو مافهموش يحبطوا راسهم فى أجدع حيطة
ايه الحاجة اللى انتى مقصرة فيها اوى ؟
حالياً مذاكرتى

امتى كانت اسوء فترة فى حياتك ؟
الفترة اللى أول مرة أتغش فيها فى واحدة صحبتى أو بالتحديد أنتيمتى .. ومن ساعتها ونسبة ثقتى فى أصحابى أو فى الآخرين لا تتعدى ال 40%
انا عايزة بقى تقوليلى موقف محرج اخر حاجة ( اجبارى )
لا مايصحش آخر حاجة .. كفاية اللى قلته بلاش طمع ..
امتى احلى وقت فى حياتك ؟
لما بكون قاعدة ادام البحر
يا ترى معاكى رصيد كام ؟؟؟
وانتى مالك يا رخمة .. مش فاهمة بتجيبوا الحقد والغل ده منين(إكمنى غنية وانتو شحاتين بتفتروا على أسيادكم ..أوباش )
طبختى قبل كدا ؟
اه بس لما أكون مضطره ، مش بدخله إلا إذا حكمت الظروف .. أخرى ادخل أكل وأخرج
طب كام مرة كل اللى عندك فى البيت اتنقلوا للمستشفى بسبب اكلك ؟
ألفاظك زى وشك .. يا بنتى دا أنا أستاذة طبيخ
اختارى 3 اعضاء و 3 عضوات تقولى فيهم رايك بجد
قلت رأيى فى ناس كتير قولى انتى حد تانى وانا اقولك
ايه اكتر اسم بتحبى تتنادى بيه ( اكيد هيبقى انتى يا زفتة )
هو أنا زيك لا إيه .. ماما بتقولى على طول يا ياسمين( محدش يقول إيه اللى جاب مها لياسمين هو كده ) ولو عايزة حاجة ضرورى بتقولى يا سمتمتى ..بابا بقى يا مها او موها .. أخويا بلاش نتكلم عنه
مين الانسان اللى كنتى فاهمة انة وحش اوووووووى وبعد كدة عرفتى انة انسان كويس؟ ( غيرى طبعا ) والعكس؟
زوبا كنت بحس إنها سوسة على الآخر بس طلعت طيبة على الآخر
مين اكتر شخصية فهماكى بجد ؟
أسيل

كده تومام على الآخر شلت كله اللى جاوبت عليه قبل كده

ومنتظرة أى سؤال من أى حد وأنا فى الخدمة