***من فضلكم
***دام عزكم
***حبة حياة ...
***حبة هوا
....
يجعل بيوتكم بالهوا ديما عمار
يامحسنين
........
مبقولش نفسي ف لقمه حاف
او حتي محلول للجفاف
انا نفسي اتنفس هوا
اشم مرة شئ نضيف
حلمي مايوصلش لرغيف
موصلش حلمي للمحال
انا اصلي عايش لاحتمال
........
انا لية يكرمني الإله
وتمنعوا عني الحياة ؟؟؟؟؟
.....
من فضلكم
دام فضلكم
نفسي ف امل
اعيش عليه
او اموت عليه
نفسي في نفس يملاني روح
نفسي ف هوا غرقان طموح
......
يامحسنين
لله بقول حبة هوا
فرصة ياعالم... تخفيضات...اوكزيونات
الدنيا دي فرصة سماح
إن مت يبقي الوقت راح
ومش ها خاف .. ومين يخاف ؟؟؟؟
هاامسك في رقبة
أي مخلوق ف السما
حرمني نعمة ربنا
..
انا كلي مؤمن بالقيامة
وبالحساب
مؤمن بإن العدل فوق
هايجيبلي حقي
زي مايقول الكتاب
الحق بقي قبل اما اموت
والحقني
ف النفس الاخير
حبة هوا حبة حياة
....
سايق عليكوا المصطفي
حبة دفا
حبة وفا
حبة حلال
سايق عليكوا السيدة ويا الحسين
يامحسنين
لله بقي
حتي الشحاته بقت شقا .... ؟؟؟؟؟؟؟
يجعلها بيضا ع الكريم
اسود من الليل الغطيس
علي كل من فيكم لئيم
......
شحات
وطالع زي جده وزي ابوه
الاسم تور
وبرضه لازم تحلبوه
هو انتوا ايه
مش زينا برضك بشر
ولاانتوا من طينة رخام
تتنفسوا
واحنا حرام
تتبجحوا ... تترحرحوا
تتبحبحوا
واحنا اللي بنشد الحزام !!!!!
........
يامحسنين
لوكان صحيح فيه محسنين
انا ليا ف الدنيا سنين
شايل ف قلبي مظلمة
كل الاماني مضلمه
كل الاماني مضلمه
منقول
اهداء لكل الاداريين