خوف نعمه ... لو عطيته حجمه
نقمة لو ضخمته ... وبالغت فيه
الخوف الصحى رادار يحميك .. انذار مبكر بمشكلة قادمة
الخوف المرضى .. رعب وتعجيز واستسلام للخطر
عايز تتخلص م الخوف الاسود ؟
اعمل لنفسك دراسه هاديه فى خطوط عريضه :
* هل هى عقدة من زمن الطفولة ؟
أصل فيه ست بيت لو طلع لها فى المطبخ صرصار تصرخ وتلم الجيران ولا يشغل بالها كابل الغسالة العريان والكهربا واصله220 ؟؟
*هل هو قلق واقعى ؟ والله لو البيت قايل فعلا للسقوط يبقى خوفك واقعى مش " أوهام طفوله " !
* طب هل هو قلق مبالغ فيه يمكن البيت متاسس ميه ميه بس محتاج شوية ترميم ؟
اما الخوف م الموت فعيب قوى يمنعك من سفر أو يحرمك قطع " الكيكة " ب
" السكينه " .. الموت له ميعاد " فاذا جاء اجلهم لا يستاخرون ساعه ولا يستقدمون " .
وأوعى تخلى بينك وبين الشجاعه طريق مسدود ..
الشجاعه صحيح موهبه زى الخط والرسم والصوت لكن اكتسابها فى الامكان :
*جرب تبص من سطح عماره عاليه .
*جرب الوقوف على سفح جبل .
* اقرا كتير فى كتب القادة والابطال .
*قرب من زمايلك أصحاب الشجاعه فى الخير والجرأة النظيفة .
*سيب الزحمه وخليك فى الطريق الخالى .
* وأخيرا حاول تمشى لوحدك فى الظلام .. ومتخافش مـ الحركة اللى هناك
.. دا مش حرامى .. ولا " عفريت " ؟