[alexboy88]

يا بلدي فكي إيدي م اللي في إيديا

يا بلدي شيلي الغيامة من على عينيا

يا بلدي سيبي لساني نفسي أصرخ وأقول ..حرية

يا بلدي هعيش فيكِ وأموت ولا عمرك هتحسي بيا

خليتي فرعون يحكم عليا بالإعدام

يا بلدي والضرب في الميت حرام

وأنا مت بيكِ مت ليكِ ..وعمري ما عشت ليا

لحد إمتى يا بلدي هفضل فيكِ عايش أسير عايش سجين وسجني حدودك

لحد إمتى يا بلدي هتباع فيكِ بتمن رخيص من اللي من غير تمن راح وباعك

لحد إمتى لما آجي أبكي عليكِ ..

أخاف وأروح وسط الظلام ..

تحت السلالم ..

بين الحيطان..

وأوشوش نفسي يا رب انتقم من جلادك

يابلدي ..لوهتسبيني مش هسيبك

لو هتبيعيني مش هبيعك

لو إعتقلوني ..

لو عذبوني وكهربوني

لو خرسوني ومن الحلم منعوني

ولو حتي قتلوني ولا بالحيا دفنوني

هفضل فاكرلك إني أكلت من أرضك

وشربت من نيلك..ويوم ما أموت هتغطى بترابك


medo_alex