[جمال سراج]

شوف يا احمد
انت عامل ايه الاول
ان شاالله تكون بخير
انا معرفش انت عندك كام سنة الاول
بس عاوز اقول حاجة يا احمد
صحيح ان الحب مش عيب ومش حرام يا احمد
بس اى حب تقصده
الحب اللى مش حرام ومش عيب هو الحب المشروع- يعنى الصحيح
مش ان ولد يمشى مع بنت شوية ويهيم فيها غزل وشوق وبعدين يروح لغيرها
انت عارف ان الاختلاط اللى ملوش لازمة حرام اصلا يعنى طالما مش فى شغل او دراسة او كدا يبقى مرفوض وفى اى اختلاط اصلا فيه قواعد واصول وعرف وشرع
سيبك من اللى بيقول طب هتجوز ازاى اذا محبتش
يا سيدى اى حد الوقتى يقدر يختار شريك او شريكة حياته بالاصول ( مش فيه زمالة - قرابة - جيرة - عمل ) اى نوع من الارتباط الحقيقى الصحيح بما لا يخالف الشرع
وبعدين الشرع بيقول شوفها وشوف وشها واديها يا احمد ( بس كدا) مقالش امشى معاها وحط ايدك على كتفها وزى ما بنشوف الايام دى
هى دى بقا المسخرة
واشمعنا الدين قال وشها واديها ( لان الوجه عنوان الجمال ) اعتقد ان انت ممكن تدرك الجمال من هنا مش بالهمسات واللمسات والصمت الرهيب
يعنى يا احمد انت ترضى تتجوز واحدة زى بتوع الحاوى كل يوم عرض ازياء مسخرة غير التانى وعماله ترقع فى وشها بوية وحاجات من اللى بيقولوها دى
طب خلى واحدة تغسل وشها كدا وشفها ( يمكن تتقرف والله منها)
انما الطبيعى دايما فريش يا احمد
وبعدين هل واحدة زى دى اللى بتمشى كل يوم مع واحد هتكون امينة على بيتك ومالك واهلك ( استحالة)
وزى ما البنت مطلوب منها سلوك محترم - الولد او الشاب بردو لازم يكون محترم واللى ما يرضهوش لامه او اخته او زوجته ميرضهوش لحد تانى
وصدقنى مثلا لو اى شاب من اللى بيمسكوا فى ايد البنات او يحلق عليها من كتفها - لو حد منهم شاف اخته مثلا فى الوضع دا هيفور دمه وهيغلى
يبقى ليه اصلا الغلط
يا احمد بلاش نقلد الغرب الفاشل المحبط فى الغلط وهما اصلا بيحسدونا على اللى احنا فيه والله
انت عارف نسبة الولاد اللى بدون نسب بتوصل كام فى بعض الدول - حاجات الواحد بيخاف اصلا لما بيقراها
دينا ما سبش حاجة الا لما وفاها
يبقى نعود نفسنا اصلا على حب الله وحب الخير وحب العمل واتقان العمل
يعنى لو طالب اتقن عملك ذاكر يعنى ولو فى اى عمل اتقنه
واعرف ان الزواج دا رزق
والبنت بردوا تعرف كدا
ولو محترمة ومؤدبة اكيد رزقها هيكون كويس وربنا هيوعدها بابن الحلال اللى يقدر يكون اسرة صحيحة ويتحمل المسئولية
الصحابة كانو بيستخبوا عشان يشوفوا وش اللى هيخطبوهم مكنوش بيمشوا معاهم على الكورنيش او يزوغوا ويروحوا السيما
هو مش الرسول قال للراجل اللى يخطب واحدة ( انظر اليها )
وبردوا قال لها انظرى اليه فانه احرى ان يؤدم بينكما ( او كما قال صلى الله عليه وسلم)
اوعى تفتكر انى متخلف او رجعى او متشدد او اى حاجة
بالعكس انا لفيت وشفت كتير وزرت بلاد باوربا وعربية ولكن من خبرتى بالحياة ادركت فعلا انه لا يصح الا الصحيح وانه الحمد لله على نعمة الاسلام وكفا بها نعمة
ربنا يوفقك يا احمد وكل الشباب والشابات للخير ويهدينا جميعا للخير
ومتاسف لو كان كلامى موجه لشخصك - انا كلامى عام لكل الشباب بس ربما جه عن طريقك ردا على موضوعك الجميل والهام

دمت بكل خير وتقبل تحياتى
وتحياتى واحترامى للجميع