[احمد رضا]

السلام عليكم ورحمة الله وبركاته
أهلا وسهلا بيكِ يا أخت ( سري جداً .. المشاركة رقم 77 )
في البداية مشكلتك لا تقل إرهاقاً وتعباً عن مشكلة سري جداً اللي قلبك
فكلاكما نوع من أنواع الرِهاب او الــ phobia لكن نتائج كل منهم بتختلف

تعالي كدا نعرف كام حاجة هنستخدمهم واحنا بنتكلم عن مشكلتك

القلق : شعور بعدم الاستقرار والخوف من المستقبل
الشك : التردد في تصديق ما غير مرئي ( المسقبل وما إلي ذلك ) وسوء الظن بالآخرين وعدم الثقة بالنفس

تعالي نعمل ميكستشر كدا بين ده وده .. هيدينا نتيجة وهي ( الصراع النفسي أو المرض النفسي ) ..
دي مقدمتنا

تعالي بقي نقسم الأفكار :-

* حالة من الرهاب الإجتماعي
* اللجوء للتحدث من خلف ستار
* تردد وعدم القدرة علي اتخاذ القرار
* إحباط ويأس وتشاؤم
* انعدام الثقة بالآخرين وإنعدام الثقة بالنفس
* الوسواس بالموت

:: حالة من الرِهاب الإجتماعي ::

اللي بتعاني منه يا أخت ( سري جداً ) هو حالة من حالات ( الرِهاب الإجتماعي ) الناتج عن الإنطوائية اللي انتي ذكرتيها في كلامك يمكن حالة الانطواء مش بتحصل من الباب للطق لكن دي حاجة انتي اتعرضي ليها ما بين سن 5 لـ 6 سنين اثناء بناء شخصيتك في طفولتك وبالتالي فحصل ثغور في شخصيتك أدت ان مع اول صِدام بالواقع حصلتلك أزمة نفسية عكرت صفو حياتك .. لذلك فعشان نسد الثغور دي لازم نتعامل معاها بحذر ونسدها بحاجات هتيجي أثناء رؤيتي لحل المشكلة ..

:: اللجوء للتحدث من خلف ستار ::

ودي اللي لجئتلها من خلال استخدامك للعضوية دي وانا أعتقد انك ممكن تكوني كلمتي ناس ع النت بردو عن جزء بسيط من مشاكلك وخصوصا مسألة ( الثقة ) لذلك فانتِ لسه مفقدتيش الثقة الكاملة في الناس وإلا أصلا إيه اللي خلاكي تحكيلنا طالما انتي مش بتثقي في الناس هتتقبلي الإرشاد او حل مشكلتك ازاي من ناس مش بتثقي فيهم وده شئ جميل اوي وهيساعدك وهيساعدنا .. وصراحة ً انا مستبشر خير فيك بجد .. لو عاجبك حكاية ( سري جداً ) أنا أو أي حد مستعد يسمعك لآخر مشكلة عندك ونقعد نفكر ونتناقش سوا لغاية ما نوصل لحلول ( وسد الثغور ) كلها اللي ممكن تكون حصلتلك في شخصيتك

:: التردد وعدم القدرة علي اتخاذ القرار ::

سبب التردد بيقي ممكن يكون حاجة من الحاجات دي .. اما عدم الثقة بالنفس وبالقدرة اللي جوانا .. او عدم الثقة في الظروف .. او عدم الثقة في الشخص اللي مرتبط بيه القرار .. المهم انها مسألة عدم ثقة .. ودي هنتكلم عنها في النقطة اللي بعد الجاية .. اما التردد فعايزك تعرفي حاجة مهمه جداً حالتك طبيعية جدا ً جداً جداً جداً في النقطة دي خصوصاً لانك لازم تحطي في الاعتبار ان انتي في ( سن مراهقة ) وهو الخطوة التالته تقريبا ً في مراحل النمو ودي بيحصل فيها تغيرات كتيرة جداً وخصوصا نفسية وانفعالية وفي أواخر المراهقة ( السن اللي انتي فيه ) بتبقي فيه مرحلة انتقالية وصلة ما بين المراهقة والرشد ودي بقي بينتقل الإنسان فيها من أقل استقرارا في الشخصية لأكثر استقرار ومن الأقل للاكثر في أغلب القضايا اللي كان بيواجها .. لذلك فلازم تتعاملي مع الفترة دي كمرحلة انتقالية هتفوت عن قريب ان شاء الله وهتلاقي وجهه نظرك للحياة كلها اختلفت وان شاء الرحمن الحياة كلها تبقي جميلة وتقدري تتعاملي معاها بشكل سليم ..

:: إحباط ويأس وتشاؤم ::

شئ طبيعي ناتج عن الوحدة والإنطواء فالإحباط واليأس والتشاؤم معناهم كلهم سلبي ومعني سلبي هو عدم وجود جانب مؤثر بالإيجاب وهو التفاعل الإجتماعي يعني هما نتائج طبيعية لكن خلي بالك دي ألأعراض الأولي للإكتئاب يعني لو فضلتي كدا هتلاقي نفسك فعلا وصلتي لحالة من الاكتئاب وهيبقي فيها العلاج صعب وهياخد وقت ومجهود أكبر فعشان كدا لازم تتفاعلي مع المجتمع وتقربي من الناس الكويسين واللي الناس بتزكيهم .. صاحبي الكويس هيعرفك ع الكويس ..

:: إنعدام الثقة بالآخرين - وإنعدام الثقة بالنفس ::

دي مشكلة عند المعظم .. وفعلا في مجتمعنا الحالي والناس اللي موجودين دلوقتي لازم الإنسان يبقي حرييص لكن المثل بيقول ( حَرّصْ ) ولا تخونش .. تعرفي بما إنك مؤمنة ومستبشر فيكي خير الرسول - صلي الله عليه وسلم - قال ايه .. قال " إذا قال الرجل هلكَ الناس فهو أهلكهم " صدق رسول الله صلي الله عليه وسلم .. شوفتي التعميم في الحكم بيفسد الناس .. معاملة الناس انهم غير جديرين بالثقة بيخليهم فعلا غير جديرين بالثقة .. وبعدين لما بقولك ثقي بالناس مش معني كدا انك تبقي شفافه قصاده لكن مش تسلبيه الثقة كامله لانك مترضيش ان حد يرميكي بالإتهام ده من غير ما تعمليله حاجة .. اهو نفس الشعور بردو بالنسبة للناس .. اتعرفي علي الناس والله هتكسبي كتير بس الناس الكويسين والكويسين هتلاقيهم في الطريق الصح .. هتلاقيهم معاكي في الدروس اللي بتحضريها هتلاقيهم في المسجد هتلاقيهم في الأماكن الثقافية الدينية وما إلي ذلك من الأماكن اللي ممكن تحسي فيها بالخير .. كمان كنت عايز أكلمك عن نقطة مهمة جداً الغموض ترجمة صعبة علي مخ بعض الطوائف .. تعرفي انا يمكن عشان غامض في بعض الجوانب فيه بعض الطوائف كدا بتتهمني بالغرور وده للأسف جهل منهم بطبيعة الغرور .. هما بيعتبروا أي حد مختلف عنهم او ليه رؤية مختلفة يبقي مغرور مش عايز يبقي زيهم يعني .. فهماني .. فاوي تشغلي بالك بالكلام ده .. رغم انه كان بيتعبني بس بقيت بحاول اقلل الكلام ده عشان هما بقوا بيعيشوا حياتهم وبيأثروا علي نفسيتي فياريت متشغليش بالك بالكلام ده .. وتخلي عندك ثقة بنفسك .. وثقة قوية كمان والثقة دي هتيجي بقربك من ربك لما تقعدي تناجي ربنا وتوصليله ثقتك بيه هيخليكي تثقي بنفسك .. نقطه كنت هنساها .. قابلي الاساءة بالحسنة ومتشغليش بالك استخدمي مبدأ " انما نطعمكم لوجه الله لا تريد منكم جزاءاً ولا شكوراً " الآيه دي اول مرة اقرأها كنت في القطر وحسيتها اوي سورة الإنسان علي ما أذكر وهتأكد عشان مبقاش بألف

:: الوسواس بالموت ::

ده نتيجة طبيعية لحالتك بردو لانك بقيتي تشوفي الخلاص الوحيد من اللي انتي عيشاه هوا الموت وفكرتك عن الموت فكرة ضعيفة وقوية في نفس الوقت .. فاللي خلاكي تفكري في الموت مش انك رايحة لربنا لاء بالعكس هو تعريف عقلك الباطن ان الموت هو حالة سكون في المشاعر وسكون في الانفعالات وسكون في كل حاجة وانتي بتدوري علي الاستقرار فاستقرارك شيفاه في الموت .. لذلك فياريت متفكريش في كدا دلوقتي لسه الحلول قداك كتييير لما تستنفذيها ياستي ابقي فكري في اللي انتي عيزاه .. وعلي فكرة مجرد اليأس من الحلول ده معناه الكفر خلي بالك ( ولا تيأسوا من روح الله إنه لا ييأس من روح الله إلا القوم الكافرون ) فعشان كدا دايما دوري علي حلول ودايما توجهي لربنا .. فيه نقطة تانيه عند التفكير بالموت وهو ان صاحبتك راحت في الطريق ده واعتبار ان صاحبتك دي كويسة وراحت في الطريق ده فمن كتر ثقتك فيها اعتبرتي ان نفس الطريق هو انها رايحة طريق كويس زيها يعني .. بالرغم من ان فكرتي عن الموت انه مؤلم للغاية لان الإنسان ممكن يعيش الموت وهوا حي مش شرط فناء الجسد بس ..

ربنا يبارك فيكي يارب ويعينك واحنا كلنا اخواتك يا ( سري جداً ) وتحت امرك دايما ولو احتجتي أي حاجة انا موجود وكلنا موجودين في رعاية الله