[Rien]

من غير سلام ولا كلام
عشان انا مش طايقة نفسى ومش قادرة استحمل اكتر من كدة
شوفتو الجدول ؟ اكيد طبعا آه
بجد ده غباء !!
مش معقول اللى بيحصل ده
ازاى هانلحق نراجع الجيولوجيا ف يومين
واحنا هانكون سايبين المادة بقالنا شهر ومش باصين فيها
دانا لما باسيبها اسبوع بالاقينى ناسية ومش فاكرة حاجة
لا وعلمى رياضة كمان ربنا معاهم بجد مش عارفة هايعملوا ايه
خصوصا اللى واخدين علم نفس
عندهم قبل الانجليش فرق يوم واحد
وبعد الفيزيا يوم فاضى
تانى يوم جبر
تانى يوم علم نفس
تانى يوم ميكانيكا
بقى الكلام ده يرضى ربنا ؟!
حرام اللى بيتعمل فينا ده
حرام حرام حرام
BRB
اما اروح ارمى نفسى من البلكونة وارجعلكو

***
حلو التعقيد اللى فوق ده
اى خدمة مش حارماكو من حاجة
اسلم بقى ..
مساء الخير او صباح النور .. اى حاجة تيجى معاكو
يا رب تكونو كويسين ومبسوطين ومش متضايقين ولا مخنوقين
دلوقتى يا شباب احنا النهاردة كام
1 / 5
يعنى قدام كل واحد فينا قبل الامتحان 43 يوم
الجدول واتحط
ومفيش واحد شوفته مبسوط من الجدول
وماتتخيلوش اننا لما نقعد نحرق ف دمنا ونتضايق
هانلاقى اونكل يسرى جاى يقولنا
" سورى يا جماعة انا اسف .. حطوا الجدول اللى انتو عايزينه بنفسكم "

ولا هنلاقى نفسنا صعبنا عاللى حاطين الامتحان
ويقولوا " اما نغيرلهم الامتحانات اللى اتحطت بقالها اكتر من 3 شهور
ونديهم امتحانات خفيفة ولذيذة
عشان حرام .. كفاية عليهم الجدول الظالم ده "

مفيش حد هايتضر غيرنا
ومفيش حد اعصابه هاتبوظ غيرنا
ومفيش حد دمه هايتحرق غيرنا
ونبقى ولا عارفين نراجع ف الشهر ده
ولا ف ايام الامتحانات
والنتيجة معروفة

***
يا جماعة الدفعات اللى قبلنا مكانوش احسن مننا ف حاجة
ولا كان ليهم دماغين واحنا لينا دماغ واحدة
برضو جاتلهم جداول مقرفة وامتحانات زى الزفت
وحققوا اهدافهم ودخلوا كلياتهم
لمجرد انهم عملوا اللى عليهم
وراعوا ربنا ف اللى بيعملوه
واللى ماعملش كدة خسر هدفه وابتدى يحاول يدور على هدف تانى من جديد
احنا قدامنا 43 يوم
بالنسبة للى واخدين جيولوجيا .. من دلوقتى مايخلوش نص كلمة تفوتهم ف المنهج
كذلك باقى المواد
اعملوا اللى عليكو ف كل حاجة
وركزوا اوى اوى ف المواد اللى مضايقاكو ف الجدول
بحيث ان ايام الامتحانات تلاقوا نفسكو بتنجزوا ف المراجعة
وبجد حالات النسيان دى بتجيلنا كلنا
نحس اننا مش فاكرين ولا كلمة
بس قدام ورقة الاسئلة كل حاجة بتطلع
خليكم ايجابيين واتعبوا ف الشهر ده اوى اوى
عشان نفسكم
واكيد الكلام ده ليا وليكو وللدفعة اللى بعدنا واللى بعدها
اللى برضو هايجيلهم جدول وحش
ويعملوا زينا بالظبط

انا دلوقتى مش مستنية نقاش ف الموضوع بجد
بالرغم من انى حاطاه ف العام
انا باكتب الكلام ده
عشان احتمال يكون سبب ان حد يبقى ايجابى ويحاول من جديد
يا جماعة دول 43 يوم
ده احنا عبرنا ف 6 ساعات شوفوا بقى هاتعملوا ايه ف 43 يوم

واللى شايف انى غلطانة ومش بافهم
يا ريت يحتفظ برأيه العظيم لنفسه
ويحرمنا منه

***
وآسفة انى طولت
بس كان لازم اقول كل ده وحاولت اختصر على قد ماقدر
لانى رغاية طول عمرى طبعا
سلامو عليكو