اقتباس:
المشاركة الأصلية كتبت بواسطة سري جداا
متشكرة يا محمد
السلام عليكم
مش عارفة انا المفروض رقم كام بس هى المشاركة 130
مشكلتى ببساطة ان جوايا انسانة ضعيفة
مع انى باحاول دايما ابين عكس ده
اى كلمة بتحطمنى
بس بابين انى جامدة ومش بيهمنى حاجة
مثلا مع اصحابى لو حد اتريق عليا بتهريج عادى
باهزر معاهم واتريق انا على نفسى مفيش مشاكل
ومش بازعل ولا باحط ف دماغى
لمجرد ان دول اصحابى وباقبل منهم اى حاجة
بس لو حد تانى انتقدنى وماعرفتش ارد
باتخنق اوى وباتغاظ
دايما حاسة ان ماعنديش اى ثقة ف نفسى
ممكن دلوقتى بقيت احسن من قبل كدة كتير
لانى كنت كارهة نفسى ومش متقبلة شخصيتى وكنت انسانة انطوائية جداا
دلوقتى بقى ليا اصحاب كتير وبقيت انسى كتير الكلام ده
واحاول ابقى الانسانة اللى دايما بابينها للناس
نجحت ف ده جزئيا بس برضو كل فترة بتحصل مواقف تحسسنى تانى انى ضعيفة
ومش قد انى اعمل اى حاجة
ومن كتر التفكير باحس بصداع رهيب ومش باعرف انام غير وقت قليل وده مأثر على تركيزى
وعلى المذاكرة وكل حاجة تقريبا
برضو هاقول تانى ان ده بيحصلى لما اتعرض لمواقف معينة بتبقى بايخة شوية
وبتاخد وقتها وتعدى
حاجة تانية
اى حد بيعمل معايا اى حاجة باعديهاله وباحاول اقنع نفسى انى مش متضايقة
حتى لو فعلا حاجة ضايقتنى
وباجى ف وقت ابقى مش طايقة حد يكلمنى وبابقى عصبية
من كتر ما باضغط على نفسى
بييجى وقت واطلع نرفزتى ف اى حد
غالبا بتكون صاحبتى ومش بتتضايق لانها فاهمانى
حاجة تالتة
مش عارفة اعمل اللى بانصح الناس بيه
لما باتكلم مع حد ممكن يحس انى شخصية مثالية وعقلانية جدا
وعارفة الصح ف كل حاجة
بس لما باتصرف مش باعرف اعمل اللى انا شايفاه صح ده
مش عارفة امشى على نصيحتى
حاجة رابعة
على طول باخبى مشاعرى عن اللى حواليا
ممكن اكون متضايقة ومخنوقة وعندى حاجات كتير تاعبانى
بس على طول باضحك واهزر
باهرب من المشاكل دى بالهزار والضحك
ولو بان عليا انى متضايقة مش باتكلم مع حد بسهولة
اووووووف
لو كملت من هنا لبكرة مش هاخلص
لكن ده بيبقى العادى معايا لما تحصل حاجة تضايقنى لفترة معينة
عموما انا كدة ارتحت انى اتكلمت وفيه حد هايسمعنى
مع ان الكلام ده من الحاجات اللى دايما اهرب منها ومش باصارح نفسى بيها غير كل فين وفين
بس مرتاحة انى اتكلمت ولو على سبيل الفضفضة
عارفة ان فيه ناس ممكن تعرفنى
وعايزة منهم طلب واحد
انهم ينسوا اصلا ان الكلام ده طلع منى
عشان انا كارهة الجزء ده من شخصيتى |
السلام عليكم ورحمة الله وبركاته
أهلا وسهلا ( سري جداً .. 132 )
أجمل شئ إنك حسيتي بالراحة لما اتكلمتي
ومادام حسيتي بالراحة بعد ما اتكلمتي استبشري خير
مشكلتك مشكلة تراكُمات مش مُشكلة مُزمنة
يعني حلها سهل جداً إن شاء الله ولو مش حلها سهل جداً فهيبقي تأثيرها عليكي
ضعيف جداً جداً لحد تحسي فيه انها مش مشكلة أصلاً
بصي يا ( سري جداً .. 132 ) .. الحكاية معاكي إن انتي عملتي لنفسك صورة مثالية مُتكاملة
عقلانية بترفض المشاعر طالما غير موجه .. والصورة العقلية لما بتزيد بتعمل حاجز بين الإنسان وبين اللي بيتعامل معاهم يمكن أحيانا كانت بتحصلي فترة لغاية ما نجحت اني احاول أعمل توازن بين شخصيتي وعقلانيتي ومشاعري وأحاسيسي ..
انتي محتاجه كدا بالظبط .. انتي قطعتي شوط كبير في انك تظهري نفسك بعقلانية ومميزة بين الغلط والصح وده أثر علي طبيعيتك إنك اهملتي جانب من جوانب نفسك وهو المشاعر والأحاسيس .. ربنا يبارك فيكي يارب الرد مختصر لان يعتبر مش فيه مشكلة وانا حاسك انك حد كويس وعاقل هيقدر يقدر الامور ويصلح حياته
أتمني الإفادة