[هانى الشرقاوى]

المشاركة الأصلية كتبت بواسطة igita

منتظرين تعريفك لنفسك

حاضر
انا اسمى محمد
مصرى
مسلم اتولدت فى اسرة مسلمة تدين بالمذهب السنى فى البداية انا كنت زيهم لانى طالب ازهر بس بعد بحث طويل وقراءة تقريبا فى كل الاديان اقتنعت بفكر معين واعتقدته هو الصواب وانا ما زلت عليه
مستعرب مش عربى
أفريقى

معارض فى حزب شباب مصر وكنت أحد محررى الجريدة الالكترونية بس استقلت منها وبقيت كاتب عادى فى الجريدة صعب اوى انك تكون بتحرر مقالات لناس كبار اوى زى اللى كانوا بيكتبوا فى الجريدة حسيت انى واخد منصب مش من حقى يعنى ايه طالب عنده 18 سنة يحرر لناس معظهم حاصل على درجة الدكتوراه وبعدين كانت الامتحانات قربت وكنت بضيع وقت كتير اوى فيها فطلبت منهم انهم يشوفو حد مكانى وفعلا كان
وفى عالم النت أنا فرد من جروب شباب 6 ابريل

شاركت فى مراكز وجمعيات متعددة من جمعيات المجتمع المدنى

اما فى المجال الرياضى فانا بلعب كرة السلة وكنت لاعب فى فريق المقاولون واحيانا بلعب كرة قدم وبعشق الركض ...الجرى لمسافات طويلة ...
وفى الفترة الاخيرة لفت انتباهى المنتخب المصرى والدورى المصرى ولقيت نفسى بروح كتير أوى الاستاد ....ومن غير اى ضرب أنا زملكاوى

بحب كل الناس
معنديش أولويات فى التعامل مع البشر ميفرقش معايا الشخص اللى انا بتعامل معاه دينه ايه وده كان سبب فى تكوين صداقات عديدة مع يهود ومسيحين وبعض الملحدين واخيرا شاب من صعيد مصر يدين بالبهائية

شايف نفسى ليبرالى ومقتنع بفكرة العلمانية المؤمنة مؤمن بمبدأ المواطنة اللى تنبنته الدولة أخيرا
موافق على التطبيع مع اسرائيل بس يكون التطبيع من كلا الجانبين لان التطبيع من جانب واحد ضعف وموافق على اقامة دولة اسرائيل وجنبها فلسطين طبقا لحدود 67
أما من الناحية الاقتصادية ف أنا جاهل شوية فى المجال ده ومعجب فى النظام اللى قامت عليه اقتصاد دول زى الهند والصين وماليزيا وكوريا ....الدول من فترة قريبة كانت دول معدمة بالنسبة لمصر ...وازاى حولوا انفسهم من دول مستهلكة الى مجتمعات منتجة