بصوا يا جماعة
انا امتحنت التاريخ ف دور مايو 2008
وفعلا الامتحانات القديمة ماكنتش بانقص فيها اكتر من نص درجة او درجة بالكتير اوى
وف امتحانى نقصت كتيير جداا ( 10 درجات ونص )
عشان كذا سبب
اولا :
اعتمدت كليا على مذاكرات الدرس وماكنتش بابص ف كتاب المدرسة
واكتشفت قبل الامتحان بفترة بسيطة جدا ان المذاكرات ناقصة حاجات كتير
ف قولت لنفسى خلاص اللى حصل حصل .. وبرضو ماحاولتش اعمل حاجة ايجابية واذاكر من الكتاب
او ادور عالنقط اللى مش موجودة ف المذكرة واذاكرها
وده خلانى مرعوبة من الامتحان وعملى حالة قلق غير طبيعية
لدرجة انى فكرت مادخلش الامتحان
بس والدتى رفضت طبعا
وكان معاها حق ..
---
ثانيا :
اول ما مسكت ورقة الاسئلة بصيت عشوائى كدة على كام سؤال
ولما لقيت ان فيه حاجات غير مباشرة ومش واضحة
وخصوصا سؤال الاختيار من متعدد ( الاجبارى ) اللى عمرى ما هانساه
بتاع حرب اكتوبر استمرت كام يوم والاجابة كانت 23 يوم - اول مرة اشوف المعلومة دى كانت ف الامتحان -
وكذلك سؤال ف الـ صح او خطأ مع التعليل
حسيت باحباط وتنحت ف ورقة الاسئلة لمدة ربع ساعة وكنت على وشك انى اعيط
بس حسيت بالوقت لما لقيت المراقبين الاتنين بيبصولى باستغراب
لانى ماكنتش فتحت ورقة الاجابة حتى
وابتديت احل بسرعة ومن غير تركيز - بسبب القلق اللى عملته لنفسى -
وبالتالى حتى الاسئلة السهلة جاوبت فيها اجابات ناقصة !!
---
ثالثا :
المستر كان طول السنة يقولنا
مش بيسأل على تواريخ ف الامتحان
وف 26 امتحان ثانوية عامة ماسألش على تواريخ غير 3 مرات بس
وبرضو سلبية منى ماكنتش باحفظ تواريخ طول السنة
وجيت حفظتها ليلة الامتحان لاول مرة
روحت ف الامتحان لقيته طالب تاريخين ف المقارنة وعملت الاتنين غلط مع انى كنت فاكراهم بس عدم تركيز
---
رابعا :
المستر كان بيقولنا على حاجات كتير مش مهمة واقروها بس
خصوصا ف الباب الـ 13
وانا عملت كدة فعلا
وده برضو خلانى افقد الثقة ف مذاكرتى
لما لقيت ان اصحابى مع مدرسين تانيين مذاكرين الحاجات دى كويس جدا
وعلى قد ماقدر حاولت اذاكر الحاجات دى ف فترة المراجعة
بس يأست وماكملتهمش
---
خامسا :
فضلت مطبقة ليلة الامتحان ومانمتش ولا نص ساعة
وده خلانى بقيت مش قادرة افتح عينيا لما وصلت لنص اللجنة كدة تقريبا
وبرضو ده كان اهم اسباب عدم التركيز
بالرغم من انى شربت قهوة الصبح قبل مانزل وباليل عشان اقدر اسهر
---
سادسا :
كان عندى قبل امتحان التاريخ 8 ايام ونص - لانى خدت التاريخ ف سنة تانية -
حسست نفسى انهم كتير وده خلانى اضيع وقت
---
سابعا :
كنت باحبط نفسى باسلوب غبى ف الفترة اللى قبل امتحان التاريخ
وده اللى خلانى مش طايقة ابص ف المذكرة
وادق تعبير للى كان بيحصلى ف الوقت ده
انى كنت باراجع تاريخ - غصب عنى -
آسفة يا مستر مروان لو مكانش المفروض اكتب الكومينت ده
بس انا نقصت 5% من مجموعى بسبب التاريخ وكان زمانى جايبة 98%
طبعا .. قدر الله وما شاء فعل .. وانا واثقة ان ربنا كتبلى ده لانه افضل ليا
بس حسيت انه لازم اقول الكلام ده لطلبة التاريخ السنة دى
عشان يتجنبوا اخطائى
ويا ريت حضرتك ماتحذفهاش - بعد اذنك -
ربنا معاكم ويوفقكم جميعا
فى رعاية الله ،