[أسيل رزق]

المشاركة الأصلية كتبت بواسطة تسابيح النجوم

بصوا بقي ياجماعة أنا مش بحب

الا اني اطول ع الناس
اوعوا تفهموني صح
هم 2 مشكلة وصلحوا
هطول براحتي بقي
ع العموم انا مكتبش بسري جداااا
مش عارفة
بس الموضوعين عادي مشكلة عادية
كان نفسي اقول الكلام دا في الواقع
بس مش هقدر
فمكن النت يسمح لي اني اقولها وبصراحة كمان
غير اني محدش يعرفني اهم حاجة
رغاية
(1) مشكلة حياتي بجد
هي أخي الصغير (مش صغير اوي يعني )
هو في 3 ابتدائي وانا في 3ث
انا وهو ع طول في مشاكل مع بعض
ودايما بيعمل الحاجة اللي تنرفزني
حبا في نرفزتي (هي دي الاخوات ولا بلاش )
وطبعا انا الكبيرة
يعني لما بقلب بقلب جامد
وبصراحة بتعصب بقي
مش تعرفوا ايه اللي بيحصل
اكيد طبعا انا اللي بنتصر عليه في الاخر وبينضرب يعني
انا بقي عمري في حياتي
ما حولت اتكلم معاه ولا حتي اسمعله
لان تصرفته كلها بضيقني انا بحبه والله العظيم جدا جدا جدا وكثر كمان
محدش يعرف اللي في القلب الا ربنا
دا اخوية ونفسي يكون احسن واحد في الدنيا دي كلها
بس بتصرفته دي مش بعرف اتحكم في اعصابي
عشان كدا ناس كثير بتقول اني مش بحبه
وانا مش عارفة ليه بحاول ادمهم اثبت
كدا مع اني اللي في قلبي حاجة مختلفه اوي
وهو دماخه تحس انها بتشرد كدا وبيقعد يسأل
اسئلة تخوف عن العفاريت والجن وحاجات غريبة
وبيصدق اللي بيقوله وعمري في حياتي
ما فكرت بتفكيره وبحس ان دماخه فاضيه
وهو بقي بيحب العنف اوي وعايز اي حد يطلع فيه الحاجات دي
ومش بيحب المذاكرة (طالع لواحدة كدا اخته)
مع انه ذكي جدا ما شاء الله عليه
ومش بيحاول خالص انه يستغل ذكائه دا
عايز حياته كلها تبقي لعب وخلاص ومشاهده افلام العنف
بصراحة انا نفسي اقرب منه جدا
ونكون اصدقاء اكيد
مش كل لما اعمل كدا ولا افكر يعمل حاجة مش تخليني اسيطر ع نفسي فقلب عليه
ونفسي اغيره طريقة حياته كلها
وتبقي ع مزاجي لان شايفه
له حياته افضل مليون مرة من حياته دي
تفتكره اعمل ايه؟؟؟
معلش رغيت كثير بس فعلا دي اكبر مشكلة ممكن تصدفني في حياتي
بصى هى تشبه لمشكلتى مع أختى و مشكلة أخويا مع أختى دايما بتدخل فى اللى ملهاش فيه وبتعمل اللى ينرفزنا و إحنا معاها جامدين أوى و هى اللى بتضرب فى الآخر نفس كلامك بالظبط مع إننا بنحبها جداً .. و اللى بنعمله دا غلط كبير فى حق إخواتنا و هنحاسب عليه حساب عسير أقولك ليه
لإن العنف ضدهم بيصنع جواهم العدوانية ضد الأخرين و بيكون شخصية عصبية متشددة و فى نفس الوقت بتكون شخصية غير هادفة وتافهه زى ما بيقولوا و دا اللى بيزود المشكلة تعقيد لإننا كل لما نشوف تصرف تافه أو مستفز بنعاقبهم أكتر و كل ما العقاب يزيد كل ما شخصية الأخ بتبقى سيئة جداً .. بيبقى عدوانى عصبى ذو عقلية مريضة و العنف من الكبير على الصغير بيخلق جواه كرهه للكبير طيب هتقولى انا بحبه علشان كده بعاقبه على افعاله الغير مقبولة طبعاً دا أكبر غلط لإنه مش فاهم إن ده غلط اللى هو فاهمه إن اخته بتضربه على الفاضى و المليان علشان بتكرهه مش بيفكر إن الضرب معناه تربية لكن بطبيعة الانسان من صغره لما بيشوف عنف أو ضرب بيعرف إنه شىء غلط و شر فا بتتكون جواه الكراهيه و الحكاية دى مش سهلة أبداً لأنها بتزيد لما الصغير يكبر يفضل يعمل أى شىء علشان يضمر أخوه أو أخته لا قدر الله
فا الموضوع كبير جداً .. و حقيقى شىء صعب تغييره محتاج وقت كبير جداً
بصى مهما كانت درجة شقاوته أو أفعاله الغير مقبولة فا كلمة حلوة أو بوسة أو حتى كيس جيلى كولا ابو ربع جنيه ده كافى إنه يحنن قلب الطفل و هو لسه صغير يعنى ممكن تشكليه و تخليه يحطك جوا قلبه
خديه على إنه أخوكى الكبير مش الصغير .. دايماً حطى فى بالك كده و كل ما يعمل حاجة تضايقك اندهيله و كلميه أكنك بتكلمى حد كبير و فهميه بهدوء غلطه و اضربيله امثله يعنى مثلاً هو فرقع صاروخ فى الشقة قوليله الصاروخ ده ممكن النار بتاعته تمسك فى السجاد و تولع السجادة و الشقة تتحرق ومانلاقيش مكان نعيش فيه لا قدر الله يعنى .. بمعنى فهميه خطورة أفعاله و بما إنه 3 ابتدائى و العيال اليومين دول متشردين فا هيفهم بسرعة علشان متعود يشوف حاجات فيها عنف فى التليفزيون والكلام ده .. و على فكرة فى دراسة أثبتت إن مش معنى إن الطفل بيشوف حاجات فيها عنف أفلام وكارتون وكلام من دا يبقى هو هيكون عنيف بالعكس لما بيكبر بيكون عاقل الكلام الفاضى ده بيكون تأثر فى طفولته مش أكتر
فا حاولى ماتدققيش على أفعاله و سايسيه خديه على قد عقله يعنى و خلى كلامك الموجه ليه مش بصيغة أوامر لكن بصيغة نصح و خوف عليه و حاولى تقوليله دايماً أنا بحبك و يا حبيبى و يا روحى و الكلام الحلامنتيشى ده
و خلى عندك فى الدولاب علبة لبان أو بسكوت كل ما ينرفزك فى حاجة تكلميه بهدوء وتديله واحدة و لما يغير فعل وحش انتى كلمتيه عليه و بقى كويس اديله مكافأة حاجة حلوة أو جنيه من مصروفك ( طبعاً مفلسة .. نفسى أشوف حد فى المنتدى ده معاه فلوس .. عالم عجيبة )
و على فكرة الطرق دى جبتها من كتاب اسمه هكذا يصبح الطفل قائدا كتاب تحفة وجربتهم على اختى و بيجيب نتيجة كويسة الحمد لله

كفاية رغى حبه كده و أكمل