[nooreyes]

الموضوع مش حكاية ندم وللا مش ندم
كل واحد كان مقدر له شئ وحصله
اللى دخل تربية وتعليم او ازهر مينفعش يندم او يقول اتظلمت
بس كل واحد يشوف المميزات والعيوب للمكان اللى هو دخله
مش عشان يقلل من شان الازهر
لا
عشان لو حد من المسئولين قرأ كلامنا احنا طلاب الازهر اللى متربيين فيه وعارفين كل كبيرة وصغيرة ممكن يصلح اللى احنا عانينا منه
بصراحة
دخولى الازهر هدم شخصيتى
والسبب فى كدة مش ان اهلى ظلمونى لما دخاونى ازهر
ومش تقليل من الازهر
بس العاملين فيه مش بيراعوا ربنا فينا وفى شغلهم
انا كنت فى ابتدائى الاولى على محافظتى
وفى اعدادى كمان
انا دلوقتى فى تالتة ثانوى وجالى احباط من كل حاجة
اولا مش بنام طول الليل افضل اذاكر وتانى يوم فى الامتحان الاقى البنات بيدخلهم ورق متجاوب فيه الامتحان كلوا
ودة مش بيحصل فى معهدى بس
دة فى كل محافظات الجمهورية واتحدى اى حد يقول كلام غير كدة
انا مش هقدر اجيب الكلية اللى بتمناها فى الوقت اللى بنت مبتعرفش تكتب اسمها هتجيب طب بدون تعب
باختصار الغش وعدم الضمير واضح ودى اول حاجة

تانى حاجة التفرقة بين الولاد والبنات
البنت تجيب مجموع نفس مجموع الولد هو يدخل كلية ممتازة وهى بنفس مجموعه تدخل كلية اقل
وغالبا بتكون ذاكرت وتعبت اكتر من الولد

غير كدة مفيش كليات غير فى اماكن ومحافظات معينة
نتبهدل لما نروح كليتنا

وحاجات تانية كتير

انا محبطة بطريقة رهيبة
وخايفة جدا من السنادى وعارفة انى مش هجيب مجموع كويس
بسبب حاجات كتير خارجة عن ارادتى غالبها كانت بسبب وجودى فى الازهر
ومتاكدة مليون فى المية ان التصحيح بيكون فيه ظلم لانى جربت قبل كدة
المدرسين بيلفوا الورق مش بيعلموه وهما قالوا كدة بلسانهم
حسبى الله ونعم الوكيل

وزعلانين عشان بنتكلم وبتقولوا بنقلل
خلينا نتكلم يمكن دى حاجة تريحنا رغم انها مش هتغير حاجة من الواقع اللى احنا فيه

بجد بشكر اللى فتح النقاش دة

ويارب الاجيال اللى بعدنا تعيش ايام احسن من اللى عشناها وتكون نفسيتهم احسن من الدمار اللى جوانا دلوقتى

ربنا يهدى الجميع