انا حطيت رد بالابيض وكان المفروض انى اعدله لما افتح باليل
بس نسيت ..
هارد تانى
ماكملتش قراية كل الردود عشان الوقت
بس مش هاعرف ازود حاجة عن اللى اتقال
تقريبا هاقول نفس الكلام ..
المهم
هى فعلا مش حاجة سهلة انك تبقى حاطط قدامك هدف كبير اوى
وفجأة تلاقيه اختفى وخلاص مابقاش ينفع
خصوصا كمان لو كنت تعبت اوى عشان توصل للهدف ده
وبرضو ماوصلتش
طيب تعبك ده ضاع كدة عالفاضى ؟!
اكيد لا
عشان كدة على طول لما بتحصلنا حاجة مش راضيين عنها
بنقول قدر الله وما شاء فعل
ربنا عارف انك لما تحقق الهدف ده
مش هاتقدر تستمر فيه بشكل كويس
وانك لما تفشل فيه وتوصل لمكان تانى خالص غير اللى كنت عايزه
هاتنجح اكتر ف المكان ده
وهاتبقى مميز فيه اكتر من المكان اللى انت كنت عايزه من الاول
ربنا مش بيضيع تعب حد
وعسى ان تكرهوا شيئا وهو خير لكم
اقتباس:
ع سبيل المثال لو انا مثلا انا بنيت كل حاجه ع اساس اني اكون مهندس ومعرفشي اكون غير مهندس يعني بأشوف نفسي المكان دا وزاكرت واجتهدت يعني عملت كل حاجه ف سبيل الوصول للهدف دا تمام
افرض بقي حصل اللي انت مش تتمناه وما دخلتش هندسه لو حتكلم عليا انا حأحس اني انسان فعلا فاشل حاحس ان حياتي ممكن تتضيع او انا اللي ممكن اضيع علشان بجد حرام والواحد مش بيبقي عارف حيعمل ايه
|
وقتها هاتبقى حاسس بالفشل وان خلاص الحياة وقفت
ولو استمريت ف الاحساس ده كتير هاتفشل فعلا
عشان كدة
لو لا قدر الله حصل حاجة غير اللى بتتمناها
حاول تتكيف مع الواقع بسرعة
وماتخليش الحكاية تأثر عليك
ماتحطش ف دماغك اصلا ( الكلام اسهل من الفعل اكيد .. بس حاول )
واعرف ان ربنا مش بيقدر لحد حاجة وحشة
وطالما انت اتحطيت ف مكان
اكيد هاتقدر تنجز فيه كويس احسن من اى مكان تانى
ماحدش عارف الخير فين
ولا حد عارف ايه الكويس عشانه وايه اللى مش كويس
( ربى قدر لى الخير أينما كان وارضنى به )
يا سلام على العقل اللى انا فيه !!
اكيد اللى هايقرا الرد مش هايتخيل انا كنت عاملة ازاى من حوالى سنة بالظبط
---
بس يعنى الامتحانات لسة ماخلصتش
ايه التفاؤل ده
على كل حال ..
اقدر اقولك ان لما حد يبقى عايز كلية ومايجيبش مجموعها
اسهل شوية من انه يبقى عايز كلية وممكن يجيب مجموعها
بس مفيش امل يدخلها عشان ف محافظة تانية !!
مفيش حد بيعجبه حاله
وبعدين مفيش احسن من الغموض
تفضل قاعد مش عارف هاتوصل لايه
لحد ما النتيجة تطلع وتبدأ ف التنسيق
وبرضو ماتعرفش ممكن توصل لايه
باين عليا هاعمل الرغبات بنظام حادى بادى اصلا