[zeinab youssef]

يا جماعة اللى ما يعرفش يقول عدس
البيانات دى لا هى سرية ولا حاجة أظن أغلبنا جاله مراقبة وراح مراقبته وعارف ان كل مدرسة فيها كنترول فى هذا الكنترول يا إخوانى لازم أوراق الإجابة تتظرف فى أكثر من مظروف بمعدل 50 ورقة تقريبا فى كل مظروف وممكن أقل أو أكتر حسب التقسيمة اللى يشوفها اللى ماسك الكنترول وبعدين يا حضرات الأظرف دى تتحط فى شوال ومعها بعض الأوراق بتبين أرقام الجلوس من كام لكام ومين اللى غايب فى اللجنة يعنى اللى موجود فى الصورة الأولى وبعدين يتلف على الشوال سلك وفى نهاية هذا السلك يوضع الكارت اللى حضراتكم شايفينه فى الصور الأخيرة ويتبرشم السلك علشان يبقى يفتحه بتاع الكنترول الرئيسى واظن سيادتكم شايفين البرشمة على أحد الكروت وبعدين فيه عربية بتلف على المدارس التابعة لها تاخذ الشوال ده وطبعا لازم واحد من المدرسة بيروح مع الشوال لحد الكنترول الرئيسى الشخص ده بيكون هو ده عمله فى اللجنة انه يوصل الشوال كل يوم فيروح حضرته يسلم الشوال يروح يلاقيهم فى الكنترول الرئيسى مستنيين حضرته يقطعوا السلك ويعدوا الورق ويتأكدوا من الأوراق المكتوبة ويعرفوا مين حضر ومين ماحضرش وبعد كده يبقى الورق ده مالهوش أى لازمة يحرقوه يقطعوه يرموه فى الزبالة يمسحوا بيه شوية شاى وقعوا يبيعوه بالكيلو أو حتى يدوه لأى عربجى يمسح بيه .... عين حماره هما حرين
وعلى فكرة يا جماعة انا مش بأقول الكلام ده من فراغ انا اشتغلت فى كنترول المدارس وكتبت الورق ده كتير قبل كده وبرشمت الشوال وكان ساعات بيحصل اخطاء أثناء الكتابة كنا بنقطع الورقة ونكتب غيرها واحنا عارفين ان الورق ده مهمته تنتهى بعد تسليم الشوال
وأظن أنا قلت فى أول كلامى ..... اللى ما يعرفش يقول عدس
ولو الجريدة دى عندها أوراق ذات قيمة تفرجنا ..... وعجبى