أنا عن نفسى كان عندى أيام راحة 24 ساعة و مع إحترامى لدكتور أحمد بس مفيش حد بيقدر يذاكر كل يوم أكيد بتيجى لحظة ملل للشخص و بيكره فيها إنه يفتح كتاب .. غلط طبعاً إن مايكنش فى يوم كامل من غير مذاكرة بس مش مرة فى الأسبوع يعنى .. أكيد كل شهر مرة مثلاً و بسم الله ما شاء الله الأعياد و المناسبات كتير أوى فى السنة يعنى أنا ماكنتش بذاكر إلا آخر يوم فى العيد الصغير و الكبير و رمضان أكيد مذاكرته بتكون أى كلام مش مذاكرة ثانوية .. الراحة من المذاكرة موجودة و لازم تكون موجودة بس مش نذاكر يوم و نقعد من المذاكرة يوم .. الهدف من يوم الراحة ده عدم الشعور بالملل من المذاكرة .. أنا كان ليا واحدة زميلتى شاطرة جداً فضلت طول السنة تذاكر و ماكنتش بترتاح أبداً و جت فى شهر 4 حست بملل فظيع و مابقتش تذاكر زى الأول و ماجبتش المجموع اللى كانت عايزاه
يوم الراحة مطلوب و يفضل يكون فى المناسبات علشان مايكنش فى تقصير فى متابعة الدروس و يكون في خروج أو تغيير جو بعيد عن المذاكرة
لكن لو حسيتى بملل فى يوم وسط دراستك و دروسك ممكن تكون مذاكرتك على خفيف يعنى تقرى درس أو تحلى كام مسألة كده على الخفيف أو تذاكرى أكتر مادة بتحبيها علشان الملل يروح من عندك
و ربنا يوفق الجميع