اولا قبل مابدأ ..
الموضوع ده منقول من مدونة ( البتاعة ) لـ ( سمو الامير )
ودلوقتى اسيبكم مع الموضوع ..
حسنة قليلة تمنع بلاوي كتيرة ، إلهي ما يرميك في ضيقة يابني ، ربنا يكفيك شر ذلة النفس ، دنا غلبانة ومعايا خمس أيتام باجري عليهم ، إلهي ما يحوجك لحد أبدا قادر يا كريم
وغيرها وغيرها من الدعوات والاستنجدات اللى بتقطع قلوبنا وتخلينا نطلع الفلوس ونديهالهم واحنا عارفين كويس انهم بيعملوا كده كل يوم معايا ومعاك ومع أي حد بيقابلوه
ويجمعوا من هنا وهنا مش عشان يسدوا حاجتهم ويبعدوا نفسهم عن ذلة النفس زي ما بيقولوا
لأ ، دي عشان بقت مهنة فعلا وبتكسب كتير
وإحنا طيبين وبيصعبوا علينا وبنديلهم عشان اللى عند ربنا ما بيضيعش واهو كله بثوابه
أنا مقولتش حاجة ، كله بثوابه فعالا ، وإن شاء الله ربنا هايجازيك كل خير ويجعله في ميزان حسناتك
بس أنا جاي اتكلم عن فئة معينة مش كتير مننا شافوها ، هاحكيلكم عنهم وبعدين قرروا من فعلا يستحق مساعدتكم
اسمحولي ابتدي من الاول واقول ان جمعية رسالة وهي جمعية خيرية بتنزل قوافل في رمضان كل سنة ، القوافل دي بتكون فيها مساعدات للناس الفقيرة والمحتاجة والمريضة والناس اللى تستحق مساعدة فعلا
طبعاً أجدع ناس 
بس عشان المساعدات دي توصل للي يستحقوها فعلا لازم يحصل قبلها مسح كلي لكل المناطق دي ويتعرف فيها كل واحد يستحق المساعدة ولا لأ ولو يستحق ايه نوع المساعدة اللى يستحقها
أيون إسمه إستكشاف بنستكشف فيه الحالات علشان نعرف مين اللى يستحق المساعدة و محتاج ليها بشدة فى القرية اللى بننزلها
عمليات المسح دي أو الاستكشافات زي ما بنسميها احنا - بالنسبة للسنادي - بدأت من فترة كده وكان ليا الشرف إني انزل في عمليتين منهم وربنا يقدرني واعرف انزل الفترة الجاية
يعني اللى هاحكيهلكم هنا مواقف شفتها بنفسي أو حصلت لحد من اللى نزلوا معايا الاستكشافات ، مش من تأليفي يعني
1- ست كبيرة قاعدة لوحدها في البيت ، أولادها كلهم اتجوزا وسابوها ، الست دي محدش بيسأل عنها خالص ، لا ولادها ولا حد بيعبرها اصلا
ست فقيرة جدا ورغم كده قالت لنا انها مش محتاجة أي مساعدة من أي حد
أي نعم هي معندهاش ميه في البيت ويوم ما بتطلع تملي ميه من أقرب مكان ليها بتطلع ع الفجر تقريبا ، توصل للمكان اللى فيه الميه مش قبل الضهر ، بتملي جردل أو اتنين وترجع بيهم ، على ما توصل بيتها يكون العصر أذن ، شوية الميه دول ممكن يكفوها يومين
لغاية دلوقتي معرفش الست دي مصدر دخلها ايه وعايشة ازاي
لكن اللى قالتهولنا إن كل أمنيتها في الحياة إن حد يخبط عليها ويسألها ازيك عامله ايه ؟؟؟ حد يزعل عليها لما تموت ويقول الله يرحمها !!!
تقريباً إحنا لما بنخلص توزيع المساعدات و فى وقت عندنا بنقسم نفسنا مجموعات و بنعمل زيارات مسنين جوا القافلة نفسها يعنى جوا البلد لإننا لاحظنا إن 98% من المسنين وخصوصاً السيدات مش بيكونوا محتاجين ماديات .. كل إحتياجهم حد يخبط عليهم و يسأل على صحتهم و أخبارهم .. و بنلاحظ دايماً إننا لما بنقعد معاهم مش بيدونا فرصة نتكلم أو نسأل عليهم .. هما بيتكلموا من نفسهم و بجد كتير منهم بيمسكوا فيها و يبكوا لما نمشى .. ربنا يكون فى عونهم يا رب
2- واحدة تانية عندها 80 سنة تقريبا ، قاعدة في عشة صغيرة ، ممكن متاخدش بالك من العشة دي وانت ماشي لكن لو ركزت شوية هتلاقي إن العشة دي فيها واحدة عجوزة مبتقومش من ع السرير من كتر الأمراض اللى عندها ، ولاد الحلال حبوا يساعدوها راحوا عاملين لها (قعدة حمام أفرنجي ) جنب السرير بتاعها اللى مفيش عليه بطانية حتي
برده كان فى حالة زى دى راجل عجوز وعنده ربنا يعفينا شلل المهم طول عمره قاعد على السرير فى اوضة متر فى متر و عمره ماخرج منها حتى الحمام مش بيقدر يقوم الحمام .. حقيقى الاوضة كانت بشعة .. و فقير لدرجة إنه ممكن يقعد بالاسبوع مايلاقيش لقمة عيش و كان كل حلمه كرسى يخرج بيه من الاوضة !! .. ربنا يعفينا و يرحمنا برحمته
3- الحاجة نعيمة ، ودي من أغرب الحلات اللى شوفتها ، لأننا مش عارفين إزاي نوصلها ميه وهي معندهاش حمام أصلا
ده غير إن بيتها تحت الأرض !!! ده لو صح التعبير وقولنا عليه بيت
الحاجة نعيمة مصدر دخلها إنها بتطلع تشتري خضار وتبيعه والمكسب اللى بيطلع لها هو ده اللى بتجيب بيه أكلها
صادفت حالات كتير من دى .. تخيلوا بيروحوا عند الجيران علشان يقضوا حاجتهم .. و أتذكر حالة عجيبة جداً كانت أم و بنتين كانوا بيصحوا الفجر و يروحوا فى مكان مفتوح خاص بالماشية و بيقضوا فيه حاجتهم و بيفضلوا كده طول اليوم .. حرام ده ولا حلال؟؟!!
4- الحاجة راوية ، ودي قاعدة لوحدها بردو في بيت بناه ليها أهل الخير وجابولها أكياس شيبسي وتوفي ولبان عشان تبيعهم وتصرف على نفسها ، هي مش عايزه غير سماعة أذن عشان سمعها ضعيف جدا وعايزه راديو تسمع عليه قرآن !!!
ستات كتير برده بيطلبوا الطلب ده و سبحان الله ممكن تكون عندها بنت عايزة تتجهز و محرجة تقول عايزة أى حاجة أجهز بيها بنتى و تطلب راديو تسمع عليه قرآن علشان يبارك فى المكان
5- وهو مش موقف واحد ، لأ ده تقريبا حصل مع معظم الحلات اللى شوفتها وهو إنهم مش عارفين سنهم كام سنة بل وصلت ببعضهم إنهم مش حافظين أساميهم !!!
أه فعلاً فى ناس لا يعرفوا سنهم ولا أساميهم و يمكن اللى عندهم بطايق بيفضلوا يدوروا عليها علشان نعرف اسمائهم و سنهم لإن بدون الاسم وا لسن ورقة الاستكشاف ممكن لو الحالة محتاجة مساعدة مش هنعرف نوصلها لإننا مانعرفش اسم الحالة
بجد كان نفسي احكي كمان وكمان بس مش عاوز اكتر عليكوا واعتقد إن الحالات للى حكيت عليها تكفي عن الكلام اللى عاوز اقوله
اللى بيطلع صدقته للناس اللى قولت عليهم في الاول اكيد له ثوابه واللى بيطلع للناس التانيين بردو اكيد له ثوابه ان شاء الله
بس عاوزكوا تفكروا مين اللى فعلا يستحق مساعدتكم
كلمة أخيرة حابب اقولها ، وهي بخصوص معظم الشباب اللى زهق من الاجازة : انت عندك حق تزهق منها لأنك مش بتنوع فيها ، مقضيها شات وفيس بووك وأفلام ولعب وخروج ونوم
صدقني كده كده الاجازة هاتعدي ، وهاتيجي الدراسة وهاتعدي بردو وهكذا هتلاقي نفسك يوم عن يوم بتكبر وانت مش لاقي حاجة تعملها ونفسك تغير حياتك للأحسن
اعمل حاجة تنفعك او تنفع غيرك سواء في الدنيا أو في الآخرة
اتعلم برنامج جديد ومن خلاله طور قدراتك وانفع غيرك انك تعلمه ليهم
اقرأ كتاب وشوف تجارب غيرك واستفيد منها في حياتك
انزل الجمعيات الخيرية وساعد غيرك واستغل الطاقة اللى جواك في حاجة مفيدة
زور قرايبك وقوي صلة الرحم بينك وبينهم
خد بإيد صحابك والناس اللى حواليك لحياة أفضل
اغتنم صحتك قبل مرضك
غناك قبل فقرك
شبابك قبل هرمك
فراغك قبل شغلك
حياتك قبل موتك