إهداء
أهديها إلى التى علمتنى أبكى
مقدمة-
تلاقينا فى زمن ليس زمننا واعترفنا ثم اتفقنا على أن نفترق لنتلاقى فى عالم لا يمنعنا فيه مانع نتلاقى بعد ما عز علينا اللقى فى زمن كله فراقافترقنا عشان أقابلك وأحلف انى لسه بحبك
=====
فراق اللُقى
ونفترق تانى بإيدينا
ونتفق
ان الفراق يبقى لقى والحب باقى
والاشتياق مزروع ف جوه القلب
بستان محبة وعشق
مالى عمرنا
وعمرنا ما يوم هاننسى بعضنا
وعمرنا ما يوم تقف دقات قلوبنا
أصل احنا دوبنا
وبقينا واحد
نهرب ونتباعد لجل أما نرسى
والذكرى مرسى
يوم ما نشط تشدنا
وقلوبنا سايعه بحور هوانا
عطشانه يا قلوبنا لبحور لقى
والميه ف إيدينا واحنا العطشانين
حرمنا نفسنا علشان مانبقى لبعضنا
كتبنا بايدينا نهاية فرحنا
قصة هوانا وحبنا
علشان نصيبنا والقدر
عايزنا نبعد
أبعد كتير م الحقيقة
وم الخيال
عمر المحال ما يضمنا
وتهدنا نظرات عيونا
يهزنا سؤالنا عنا
وانده عليكى وسط الليالى العتمه
ألقى عنيكى منورين
ألقى الإيدين اللى كانوا مشبكين
ما ارتاحوا يوم لما سابوا بعضهم
وف قلبهم راحت حرارة قربهم
واتبدلت بحرارة الفرقة
واتعذبت قلوبنا فى الغربه
قلتى لازم نفترق
وقلوبنا تنسى وتحترق
مالقيتش حل للقى غير الفراق
يمكن أقابلك
فى البعاد
يمكن أنولك
جو حلم باحلمه طول الليالى
والحلم غالى
ضامم حبيبتى
وافضل أغنى الماواويل
واقول يا ليل
ويامين يصبرنى
فين لما كنتى تغيبى عنى
ألقى دموعى ليل نهار بتناديكى
إيه اللى صبرنى كدا
مش عارف أبكى
جفت دموعى
وأصبحت مرسال هوى
والهوى صابنا خلاص
والخلاص هو ان نبقى لبعضنا
كل اما افتكر نظرات عنيكى
التقى العقل تايه
والتقى القلب متشوق لقربك
والتقى القرب راكب مهرته شارد بعيد
والتقى البعد عنك زى نار
نار بتكوى القلب ليل أو نهار
والتقى فوق الشفايف طالعة كلمة
راسمة بسمه
بتقول تعالى
افتكر عهد الفراق
وان لازم نفترق علشان ما نبقى
أرجع لنفسى وانزوى
واحلم كمان
وافضل أشوفك فى المنام
أحلم كتير
وأفضل أطولك
وافضل أخونك
علشان مانتقابل هناك
خليكى عايشة بالفراق
أنا ليلى وياكى
ياللى قلتى نفترق
لجل اما نبقى
الفرقة باقية واللقى ماسك قلوبنا