فيه امتحانات السنة دى عجبتنى وامتحانات لا
يعنى الجيولوجيا عجبنى فيه انه مش سطحى ومش بيقيس مستوى الحفظ زى كل سنة
وفرق كويس بين الطالب الفاهم والطالب الحافظ
علم النفس كان تافه جدا بدليل انى قفلته
طبعا انا كنت مبسوطة بكدة
لانى ماكنتش باحب علم النفس
واعترف انى طول السنة ماكنتش باذاكره بضمير زى باقى المواد
بس كان المفروض يبقى فيه اى نسبة تفكير للطالب المتميز
ده مايمنعش انى سعيدة جدا بكونه امتحان سطحى من الدرجة الاولى
الاقتصاد مش فاكرة اصلا كان عامل ازاى
اللى فاكراه انى من ساعة ما دخلت لحد ما خرجت مابطلتش كتابة
وسيبت السؤال الاختيارى
وكنت طالعة قلقانة لانى مالحقتش اقرا اللى كتبته اصلا
بس كنت حاسة انى عملت كويس
الاحصا كانت مسائل سهلة جدا
ودى المادة اللى بجد خنقتنى
كان نفسى ييجى امتحان فيه تفكير
لانى حليت المعاصر والنماذج والامتحانات القديمة
مفيش مسألة جت قدامى وماحليتهاش
وف الاخر الامتحان مالوش لازمة ..!!
يعنى حسيت انى تعبت فيها عالفاضى
بس الحمد لله انى عملت اللى عليا
العربى كان امتحان سهل ولما راجعت لقيت نفسى مش هاقل عن 29
وجبت 26 ونص مش فاهمة ليه
بس مش مضايقانى اوى
لانى قصرت ف مذاكرة العربى
يعنى بالنسبة لمذاكرتى دى الدرجة اللى استاهلها
بالنسبة للامتحان استاهل انى ماقلش عن 29
تقريبا المصحح كان عارف انى مش باذاكر عربى
الانجليش كان عادى زيه زى كل سنة مفيش جديد
