اصلا وقت الامتحان بدأ وحنا مش في اي لجنة ومش في الفصول اصلا يعني واقفين في الترقة بتاعة المدرسة قدام الفصول ومفيش حد نكلمه والراجل اللي كان بيقسم اللجان كان نظره ضعيف وكل شويه يقرأ أرقام الجلوس غلط وبعد يرجع يقول لا انتم مش في اللجنة دي انتم في لجنة كذاوكمان همه وزعوا الورق بعد ساعة الا ربع بعد ما كنا اتخنقنا مع المرقبين وشدينا معاهم احنا اتكلمنا بهدوء الاول مجبش نتيجة وبعدين زعقنا وعملنا كل اللي ممكن تتخيليه وفي ناس حتى شتموا المراقبين يعنى لولا كده كانوا وزعوا الورق متأخر كمان وفيه لجان من لجان الولاد قاموا ضربوا المراقبين عشان يخلوهم يوزعوا الورق ده يوم امتحان الكيمياء ده كان مهرجان بس ربنا سترها الحمد لله.
معتقدش اني قدرت اوصلك رايي في ردي اللي فات
انا ضد الجامعات الخاصة بالشكل اللي هيه موجوده بيه ده
لكن الي قصدي اقوله ان نظام التعليم اصلا مابيقيمش صح
عشان نقول ان اللي مجبش مجموع كلية معينة يبقى مش حينفع في الكلية دي
لان في ناس بتبقى جايبة مجاميع عالية وداخلة كليات قمة وبتبقى دخلاها بمزجهم عشان همه عايزين يدخلوها مش ضغط من الاهل بس برضه بيفشلوا فيها وبيسقطوا او بيتخرجوا مش عارفين حاجة
ده مش راجع لعيب فيهم همه ده راجع لعيب في نظام التعليم يعني لو كان نظام التعليم بيقيم صح كنت قلتلك فعلا ان اللي ميجبش مجموع كلية معينة يبقى مش حينفع فيها.
يعني انا ليه واحد صاحبتي ما شاء الله جايبه مجموع يدخلها اي كليه وهيه كانت عايزة تدخل طب وقدت في طب صاحبتي دي ماشاء الله مجتهدة و وذكية وكل حاجة بس هيه مؤمنة اوي بالسحر والحسد وحكايات الجن والكلام ده
وكانت احيانا تقعد تقول انها مبتذكرش عشان خايفة اننا نحسدها وكل حاجة تحصل بترجعها لاما للحسد لاما للجن وكمان مؤمنة بالوصفات الشعبية اكتر ما هيه مؤمنة بفايدة الطب( انا عارفة ان الحسد والسحر والجن مذكورين في القرآن بس مذكور في القرآن برضه "وما هم بضارين به من احدا الا بأذن الله"وكمان ربنا امرنا اننا نفكر في الاسباب العلمية عشان نفسر اللي بيحصل حولينا)
فتخيلي لما واحدة زي ديه تدخل طب حتعالج الناس بعد كده ازاي وهيه اصلا بترجع كل حاجة للحسد والسحر والحاجات دي قصدي انها ممكن تتفوق في الكلية وكل حاجة وربما تفكرها يتغير بعد كده الله اعلم بس الحاجة اللي متأكده منها ان لو كان نظام تعلمنا بيقيم صح كان حيهتم ان يصلح المفاهيم اللي عندها دي الاول قبل ما يسمحلها انها تدخل طب بل من البداية مكنتش المفاهيم دي حتبقى موجودة عندها.
حاجة تانية رضه عايزة اوضحها انا ليه اخويه الكبير في رابعة طب وبيقولي كل اللي اخدوه في الكلية لحد دلوقتي وله حاجة وله اي حاجة ممكن تساعدهم في الشغل وان الي عايز يتعلم بجد يبقى بعد التخرج وسمعت الكلام ده من ناس كتير في كليات مختلفة ان اللهمه درسوه في الكلية غير اللي لقوه على ارض الواقع بعد التخرج لان نظام التعليم في الكلية نفسه غلط .
يعني من الآخر هيه الحكاية خربانة من جميع الجوانب وما عدتش تستحمل تعديل لأ دي محتاجة نهد نظام التعليم كله ونبنيه تاني من الاول .
__________________
عندي دور برد جامد ربنا يستر وما تكونش انفلونزا خنازير
|