[أسيل رزق]

و عليكم السلام ورحمة الله وبركاته
إطمنى يا قمر معظم الأبهات و الأمهات كده
أنا مريت بنفس ظروفك دى و كنت دايماً بمشى بكلامهم و لما ماحققتش اللى كانوا بيحلموا بيه فيا
بدأت أشوف جو وحش منهم جداً و هما عاملونى وحش علشان فاكرنى إنى لما أشوف معاملتهم دى أحس بغلطى و أدخل الكلية أجيب أعلى التقديرات يعنى فاكرين إن الشدة والعنف و الغضب هيكون دافع ليكى فى التفوق
و طبعاً ده غلط كبير جداً لإنه بينمى جوا الواحد الفشل نفسه و يبدأ يقول لنفسه أنا فعلاً فاشل و مش ثقته فى نفسه بس هى اللى تضعف دا كمان بيكون فشل فعلى إنك تدخلى الكلية ولا قدر الله تفشلى فيها
لازم بجد تقعدى معاهم وتكلميهم و تقوليلهم دا قضاء و قدر و ده اللى ربنا كتبهولى و يمكن لو كنت جبت الموضوع اللى انتوا عايزينه و دخلت الكلية اللى انتوا عايزنى أدخلها كنت فشلت فيها أو حصلى شىء وحش
و قوليلهم إن معاملتهم ليكى دى مش هتجيب نتيجة إيجابية بالعكس فهميهم إنك بقيتى محبطة ومش عندك تأهيل نفسى لدخول الكلية ولا هتقدرى تتفوقى فيها
صدقينى لو فضلتى خايفة تواجهيهم أو علشان هما الكبار ماينفعش تكلمهيم يبقى هتدمرى نفسك بنفسك
انتى مش غلطانة و يمكن لو غلطانة فا مفيش حد معصوم من الخطأ كلنا بنغلط و مش عيب إننا نغلط لكن العيب إننا نستمر فى الغلط أو مانعرفش إيه غلطنا أصلاً
و قوليلهم إنك هتعملى اللى ربنا يقدرك عليه فى الكلية علشان تعوضى فرحتهم بيكى

محدش عارف الخير فين .. أنا كان ليا واحدة صحبتى أيام ثانوى كل شوية يقولولى فى البيت شايفة اهى جابت أكتر منك و دخلت كلية كويسة و لما جيت أتصل بيها لقيتها اللهم لا شماتة هتعيد السنة .. فا صدقينى مش كل من جاب مجموع كبير يبقى هيتفوق فى كليته و انتى مجموعك مش وحش ولا حاجة فى غيرك كتير ماقدروش يجيبوه

و صدقينى كل ده هيعدى و هيبقى مجرد ذكريات بعد كده
هما بيحبوكى و عايزين مصلحتك و خايفين عليكى بس أظهروا حبهم ليكى بطريقة غلط

و ماتحاوليش تزعلى نفسك أبداً و قولى الحمد لله على كل حال .. ده إختيار ربنا و أكيد هو اللى فيه الخير ليكى بإذنه تعالى

يا رب أكون قدرت أساعدك بحاجة بسيطة

و إن شاء الله ربنا يوفقك و يكرمك آخر كرم