الموضوع
:
كنت بتعمل ايه ؟! .. احكيلنا ..
عرض مشاركة واحدة
#
18
06-08-2009, 03:25 AM
MoHaMeD ELsHeRbEnY
world of optional
نجم العطاء
تاريخ التسجيل: Aug 2008
المشاركات: 7,407
معدل تقييم المستوى:
23
السلام عليكم ورحمة الله وبركاتة
اتمنى ان ربنا يوفقنى واقدر اكتب كل الى افتكرة
وينال رضاكم يارب
انا هقسم كلامى بطريقة غريبة شوية
هبدأ أكلم عن طفولة محمد الاول بصفة عامة
بس ربنا يسهل والوقت يسمح
بعيدا عن المقدمات دى
انا اسمى محمد الشربينى احمد
من دكرنس / دقهلية
اتولدت فى المنصورة
يوم 6/10/1991
فى نفس اليوم دة وعند نفس الدكتور
اتولد واحد اسمة محمد حمدى
فتحت عينى على الدنيا بعد اهلى عليه هوة
وهوة زى بالظبط
بدأنا نلعب مع بعض
وكان بيتهم جمب بيتنا على طول
كانو بيقولو اننا توأم فى كل حاجة
سبحان الله
والله حتى الشكل
المهم انا بطبيعتى اجتماعى اكتر
بعكس محمد خالص ودا الاختلاف الوحيد الى بينا فى الفترة دى
اتعرفت على كريم صاحبى عن طريق قرايبى وقاريبة
وبعده عرفت حلمى
وفضلنا احنا الاربعة
الحمد لله احنا الاربعة كان متوفر لينا كل حاجة اننا نتربى فى بيئة كويسة
مكناش محرومين من اى حاجة من الاخر يعنى
كنا مشهورين جدا فى المنطقة لاننا كنا بنحب بعض جدا
رحنا فى يوم بيت كريم
كان هناك ست قريبتة من بعيد كدة
فكنت انا ومحمد بس فقالت ياختى شوفى العيال شكل بعض وحلوين ازاى
بقى دول لسة عيال صغيرة واصحاب كدة
يا حلوتكم مش تشوفو الموكوس ابن بنتى محدش يعرفة ولا يعرف حد
سبحان الله تانى يوم اتخانقت انا ومحمد وكل واحد مشى فى طريقة تقريبا اسبوع
انا بيحكولى انى مكنتش بعمل اى حاجة غير انى اعيط
ومحمد بعدها تعب جامد جدا ودخل المستشفى واتحجز هناك يومين
احمد اخويا اخدنى ورحنا نزور محمد فى المستشفى
والحمد لله خف وطلع كويس
تقريبا بعدها باسبوع او اسبوعين
حاجة زى كدة
بدأنا نلتزم شوية فدخلونا الحضانة انا ومحمد وكريم وحلمى
اتعرفنا على محمود واحمد وناس كتير اوى لسة معايا لحد دلوقتى الحمد لله
كانت الحضانة دى احسن حضانة فى المنطقة كلها فى الفترة دى وكانت لسة جديدة
كان فيها كمبيوترات واحنا منعرفش دا اية اصلا
احنا كان اخرنا اتارى
فى يوم بنلعب فى الحوش فكان فية مراجيح والكلام دة
فانا بتمرجح ومحمد بيزقها كل واحد شوية كدة
فانا اقولة زق اوى وهوة يزق كل شوية يقولى مش خايف اقولة لا
فعملت فيها سبع رجالة فى بعض وهوة بيزق جامد قلت لة يابنى دا سهلة
طب اسيب ايدى واوريك
قالى اة ورينى
لسة بسيب ايدى ملقتش نفسى غير تحت المرجيحة
كان فية فرق بين المرجيحة والارض لان اصلا الحضانة كانت لسة جديدة
ومش متظبطة فانا بقى نزلت فى الفرق الى بين المرجيحة والارض دة
انا بابا تاجر مواد بناء وكدة فلما عرف جاب اسمنت وحاجات وظبط الحتة دى
وباقى الحوش كمان
كان عندنا دادة فى الحضانة عشان محدش يقول انى ابن وزير
لا دا فى الحضانة
اسمها طنط ام محمود
كنا كل يوم الصبح انا ومحمد وحد من عندنا او من عندهم يودينا
واحنا راجعين لو محدش جية ياخدنا يا اما طنط ام محمود بتروحنا كلنا
يا اما الابلة ايمان بتروحنى انا ومحمد فى ايدها
دى كانت الابلة بتاعتى طول فترة الحضانة طول الفترة دى حلمى وكريم مش قريبين مننا اوى
بعدها قربنا من حلمى وكريم اوى اوى اوى
فى يوم لقيت محمد بيقولى كريم بيتخانق فى الحوش
فرحنا فلقينا عيال كتير اوى بيضربو فية
كانت اول خناقة فى حياتى واحنا فى الحضانة
المهم اضربنا عشان العيال كانو كتير
رحنا عند الابلة ايمان كانت بتحبنى فبتقولى احكيلى الى حصل
معرفتش ارد ولا اى حد مننا عرف يرد
بس العيال التانية كانو ازكية اكلمو وطلعونا غلطانين
واحنا كل الى نقولة لا والله كذاب ومش عارفين نقول غير كدة
هههههههههههههه
المهم الابلة ايمان ضربتهم كلهم الا انا ومحمد
فبابا العيال دول جم الحضانة وقعدو يزعقو ويشتمو وكدة
وحصل شوية مشاكل المهم خلص الموضوع دة
واتنقلنا الابتدائى اولى ابتدائى
كنت باخد معايا 2 سندوتش ومحمد كذلك
وكنت باخد جنية مصروف ومحمد كان كدة
كل يوم واحنا مروحين بنرمى الساندوتشات فى جمب
وكان فية اكتر من كانتين بس كل واحد وزوقة
المهم كان موجود عم حنفى بيعمل حلاوة من الى هيا اول ما تتحط فى البوق دى
مش بتلاقيها عارفينها ولا اجيب لكم صورة ؟
كنا بنبقى مبسوطين اوى عشان اول ما ناكلها مش نلاقيها
كان بيبيع الواحدة بربع جنية الحرامى
ام هند
بدأ حوار الدروس اناكنت باخد درس مش خصوصى بس خارج المجموعة
فكان يجى المدرس يقول هنسقطكم لو مجيتوش المجموعة
المهم بابا وبابا محمد عملو شكاوى والكلام دة ومحدش كان بيستقصدنا تانى
واتظبطنا اوى من بعد الشكاوى دى فى المدرسة
كان حارس الامن قريب حلمى ويعرفنا وكدة
المهم كنا كل يوم نروح لة عاوزين نطلع ميرضاش
فجينا فى يوم اتفقنا اننا نسرق المفاتيح دى
هههههههههههه
طب نعمل اية
انا ومحمد هنقف تحت نراقب الطريق
وكريم وحلمى هيطلعو يجيبوة من الشقة بتاعتة
مكنش حد فيها على اساس بقى انهم لما هيعرفو ان المفاتيح اتسرقت
هيقولو خلاص سيبو البوابة مفتوحة
المهم تانى يوم لقينا القفل بتاع البوابة متغير
فى يوم رحت اعمل البتاع الى هوة وحدة صحية ولا مش عارف اية دة
عشان اخرج يعنى بدرى
فالمدير قالى انت مدفعتش المصاريف تقريبا كنت فى تانية ابتدائى او تالتة
ياخبر على الى حصل
انا مدفعتش فضييييييييييييييييييييحة
قعدت اعيط لحد ما روحت تانى يوم احمد اخويا وبابا جم بجد بهدلو المدير
لان انا كنت دافع وكدة
المدرسة عندنا كانت متقسمة زى حزبين كدة
المدير والشلة بتاعته الى واخدنها بالصدر
والمدرسين المحترمين
المهم انا ابن عمى مدرس عربى فى المدرسة
وكنا قاعدين فى الفصل سمعنا زعيق جامد برة
طلعنا لقينا اتنين مدرسين توأم بيضربو فى ابن عمى دة
اعمل اية اعمل اية
كان فصلنا فى الدور الارضى
فمحمد قالى بص همسك ايدك وانت تنزل لحد ما تطول الارض وحلمى هيشدنى عشان منزلش انا معاك
قلت لة طيب وفعلا نزلت كانت اول مرة اهرب
رحت جرى على البيت انا اخويا جزار قلت لة الاستاذ محمود بيتخانق مع الاستاذ حسينى والاستاذ حسن وبيخر دم
كان فاتح المحل قام منادى على ابنة وقالة خليك هنا واخد الشاطور وراح على المدرسة
مسك الحسينى وحسن قال لهم ورونى بتضربوة ازاى بقى
وكانت المدرسة كلها بتتفرج وانا اضحك اخويا بقى بيضرب الاستاذ
معتش هيقدر يكلمنى
وجت الشرطة وكان وقتها عمى لسة فى القسم بتاعنا
المهم ظبط المحضر بتاع احمد وخرج ومحصلش اى حاجة
جينا لـ 3 ابتدائى فى الامتحانات
كانو المراقبين بيجو لينا من بلد الاسطورة يعرفها اسمها ميت مجاهد
فالبلد دى لينا قرايب فيها وانا طبعا فاشل واصحابى افشل
فبعتنا لقرايبنا اسماء المراقبين الى جاين وكانو بيظبطوهم
اقسم بالله لحد النهاردة فيهم واحد اسمة الاستاذ طلعت بيقابلنى يقولى فاكر 3 ابتدائى
هههههههههههههههه
كانو بيجو يكتبو لينا والله فى الورقة
المهم الحمد لله كنا بننجح جت فى 5 ابتدائى كان عندنا انجليزى
ومدرس اسمة البحيرى بقى دا اسم دة
ودى سبب عقدتى فى الانجليزى من البداية
سالنى اسمك اية بالانجليزى معرفتش ارد
كان معاة خرزانة كبيرة اوى ضربنى على كتفى
جاب دم والله
فبقولة والله لهقول لاخويا
قالى ينعل ابوك لابو اخوك
المهم سكت لما الحصة خلصت جية محمود ابن عمى كان عندنا عربى
فحكيت لة وكانت ايدى بتجيب دم جامد وعاوزة تتخيط
فاخدنى خرجنى رحت لاحمد كان القميص كلة دم
فبيقولى اية دة قلت لة الاستاذ ضربنى
قالى استاذ مين
قلت لة البحيرى
فاخدنى ورحنا للدكتور مكنتش محتاجة خياطة اوى ربطها وظبطها
وبابا راح لاخو البحيرى دة لان باباة ميت
اخوة قالة هوة مش هيجيبها لبر وكلمتة بيقل ادبة فى الكلام
احمد اخويا كان واقف
قالة طب لو دخل المدرسة تانى انا هدبحهولك
وراح تانى يوم وقف دام المدرسة وطبعا مجاش
تالت يوم جية واحمد جية بعدة اتقابلو فى الشارع كان احمد اخويا معاة الى شغال معاة
المهم مسكو البحيرى دة خبطوة علقة صح ومن بعدها البحيرى دا انقطع اخبارة سافر السعودية باين
واحنا اتنقلنا الاعدادى بقى
كدة انا اكلمت بصفة عامة عن الطفولة كلها لحد الابتدائى
لسة ليا رد او اتنين ان شاء الله
ربنا يسهل الحال يارب
معلش طولت عليكم والكلام مش مترتب بس والله انا مش مجهز
الى كنت بفتكرة كنت بكتبة
طفولة متشردة
تصبحو على خير
__________________
لا اله الا الله ... محمد رسول الله
آخر تعديل بواسطة MoHaMeD ELsHeRbEnY ، 06-08-2009 الساعة
03:33 AM
MoHaMeD ELsHeRbEnY
مشاهدة ملفه الشخصي
زيارة موقع MoHaMeD ELsHeRbEnY المفضل
البحث عن المشاركات التي كتبها MoHaMeD ELsHeRbEnY