[محمد.فوكس]

تمام يا نهى شرحك كده انا بس هضيف الكلام بتاع الدليل..
معيار الساعة المعتمدة معمول عشان نقارن المقررات ببعضها...يعني بالبلدي كده في مقررات تقيلة و طويلة و في مقررات صغيرة بسيطة.. فعشان كده بنقول المقرر ده ساعة واحدة معتمدة و ده ساعتين و ده تلات ساعات...و انت عشان تتخرج من الكلية لازم تنجح في مقررات مقدارها يساوي140 ساعة معتمدة(ما تخافوش مش معناها مقررات كتير ده فيالترم الاول هتاخدو 15 ساعة يعملوا سبع مواد يعني ميخضكوش عدد الساعات).
النظام بيحتوي على كذا نوع من المقررات..
في اول حاجة اسمها متطلبات كلية و دي 25 ساعة معنمدة لازم تاخدها في اولى مفيهاش اختيار و كل شعبة من التلاتة بتختلف عن التانية في المقررات و بيشتركوا في بعص المقررات زي مقررات الكيمياء.
في حاجة اسمها متطلبات جامعة. .و دي بتبقى مواد ثقافة عامة مش علمية..و متطلبات الجامعة دي جزئين ..جزء منها اجباري و جزء منها تختار من بين كذا مادة.
الجزء الاجباري سبع ساعات ساعات (ساعتين لغة انجليزية-ساعتين لغة عربية-ساعة حقوق انسان-و ساعتين حاسب الي).
الجزء الاختياري بتختار 3 ساعات ساعات من بين مقررات كتير زي (مدخل قانون-مبادىء ادارة- محاسبة-مقدمة في علم الاثار-علم نفس-فسلفة..ألخ).
في حاجة كمان اسمها متطلبات القسم العلمي و دي بقى اهم و اكبر متطلبات..و هنا لازم تعرف انك هتتخصص في تخصصين واحد رئيسي و التاني فرعي يعني مثلا كيمياء/فيزياء يبقى كيمياء رئيسي و فيزياء فرعي بتدخل الرئيسي في تانية و الفرعي في تالتة.(و في حاجة اسمها شعبة خاصة او سبيشيال و دول الاوائل بقى بيتخصصوا حاجة واحدة بس و بتبقى مركزة على علم واحد).
نرجع لمتطلبات القسم العلمي و دي فيها تلات حاجات..
مقررات التخصص الرئيسي 66ساعة معتمدة منه42 اجباري و 24 انت بتختارهم من مقررات التخصص...
مقررات التخصص الفرعي 30 ساعة فيهم 18 اجباري و 12 بتختارهم من مقررات التخصص..
و اخر حاجة من متطلبات القسم العلمي حاجة اسمها مسار حر (يعني انت بتختارها بنفسك و مش شرط تكون علمية ولا شرط تكون في تخصصك لكن يستحسن انها تكون تخدم تخصصك).
عايز اقول كمان ان مش كل المقررات الاختيارية بتتعرض في كل فصل دراسي ولا حتى الاجبارية ده على حسب.
و كمان عايز اقول ان نتيجتك التراكمية بعد كل ترم هي اللي بتحدد عدد الساعات اللي مسموحلك تاخدها في الترم اللي جاي يعني لو تقديرك قليل بيتسمحلك بعدد ساعات اقل و الحد الاقصى لعدد الساعات للطالب في الترم 18 ساعة و الحد الادنى 12 ساعة...و بكده يبقى اللي نتيجته وحشة لو فضل كده هياخد مقررات اقل و بالتالي ممكن يتأخر في تكملة الـ140 ساعة فيقعد اكتر من 4 سنين ...(بس اطمنوا ده بيبقو الواقعين).
و ممكن العكس تقدر تخلص الـ140 ساعة في اقل من 4 سنين و انت و شطارتك.