[روميو]

المشاركة الأصلية كتبت بواسطة تسابيح النجوم

السلام عليكم ورحمة الله وبركاته

كل سنة وانتم طيبين ويارب تكونوا بخير دايما....
بصراحة أنا مرعوبة وبرده فرحانة ،عشان بقيت طالبة جامعية
وانا بجد مش عارفة أي حاجة وفي أي حاجة في الكلية
اللي أنا هدخلها ......
وحبيت أسألكم بقي هي معلومات عامة في كل الكليات

الكلية بوجه عام:::

(1) هو المذاكرة في الكلية تبقي زي الثانوي ولا ايه؟؟

والله على حسب يعنى لو ناوية على تقدير بقى وانك تكونى معيدة فى الكلية يبقى مذاكرة زى الثانوى لو ناوية تقضيها بتقدير مقبول يبقى عادى اخر شهر يكون مذاكرة جامدة
(2) ايه الفرق بين المعيد والدكتور؟؟

والله انا الى الان مش عارف بس على ما اعتقد ان المعيد بيكون بيدرس المادة بس للطلبة لكن التصحيح بيكون مع دكتور المادة ووضع الدرجات بس بجد انا ما فكرتش اسال السؤال ده
(3)وايه الفرق بين السكشن والمحاضرة؟؟
انا مش بحضر لا ده ولا ده عشان كده مش عارف الصراحة
(4)وهل فعلا الدكتور هو المتحكم فينا يعني منعرفش نستخدم اللماضة معاه!!

طبعا ما ينفعش اللماضة لانه ممكن يخليكى فى الكلية لحد لما تتطلعى معاش يعنى عاوزين الذوق والاحترام بس البنات الدكاترة معاهم كويسين مش زى الولاد الجنس الخشن يعنى
(5) هو انتم بتقعدوا في اول دسك ههههههههه

والله انا بقعد فى اخر ديسك عشان لو انام شوية ولا حاجة او العب بالموبايل ده لو انا تكرمت ودخلت احضر
(6) هو ايه اتحاد الطلبة دا ؟؟؟ وبيختاروا اللي فيه ع اساس ايه؟؟؟

اتحاد الطلبة هو صوت الطلبة للكلية والدكاترة واللى بيوصل مطالبهم واقترحاتهم والاختيار على اساس النشاط والتواجد فى مختلف وانشطة الكلية
ــــــــــــــــــ

الكتابة :::

دي بقي يعتبر اهم سؤال بالنسبة لي ....
هو احنا لازم نكتب كل كلمة الدكتور او المعيد يقولها ولا لا....
أصلي لما بكتب بسرعة مش بفهم حاجةمن خطي طبعا ....
ولا ممكن نسجل للدكتور ونخلص ..........

الكتابة بتكون فى النقط المهمة يعنى عناوين المواضيع والنقاط الهامة مش كل كلمة يقولها تتكتب تكتبى الحاجات اللى من خلالها تعرفى انتى هتذاكرى ايه وممكن التسجيل بس صعب وقليل من الدكاترة اللى بيعملها

الصداقة :::

بصراحة أنا خايفة اكلم حد في الكلية او اعرف ناس
مكنتش اعرفهم قبل كدا ... لان لما كنت راحة اقدم
كانت فيه بنات مغرورة ومتكبرة مش عارفة ع ايه يعني
وغير كدا اني لما كنت في المدرسة حصلي موقف مع واحدة
ومش هنساه عمري اكيد ...وكنت بعملها كويس
وطلعت في الاخر نفسيتها مش كويسة اطلاقا
بتحقد من غير داعي ....وانا محبش
اتعرض لموقف مرتين ........

بصى انا هقولك الجامعة عالم تانى غير المدرسة الجامعة عالم مفتوح ولاد وبنات من مختلف الطبقات والمستويات المادية والعلمية والتفكير برده اكيد فى الوحش والحلو بس انتى لازم تختارى كويس اللى هتكونى معاها صداقة لان الصداقة دى ممكن تساعدك على النجاح والتفوق وممكن العكس ودى احنا شوفناها كتير وانا جربت الحكاية دى بس حاولى تكونى صداقة من نفس الدفعة ميعنى سنة اولى حيكون احسن عشان هتكونوا بدائين مع بعض وهتقدروا تتاقلموا مع بعض على الجامعة والحياة الجامعية
ياريت ياجماعة حد يساعدني عشان أنا حاسه اني تايهة

ياترى بقى انتى لسه تايهة ولا ايه يارب اكون قدرت اساعد
لحد لما افتكر لكم أسئلة تانية

اسئلة تانية حرام عليكى كفاية هو انتى وخداها جد اوى كده ليه هو محدش دخل كلية غيرك يعنى اللى اتعلموا خدوا ايه اسالينى انا

في أمان الله

ربنا يوفقك يارب وتكونى سنة سعيدة وجميلة عليكى