اقتباس:
المشاركة الأصلية كتبت بواسطة Dr.memo
انا السنادي بإذن الله رايحه اولى جامعه
ولله الحمد لحد دلوقت مش عارفه انا داخله فين
اصل تنسيقي مرحله 3
لاني ف 3 ثانوي مجموعي نزل
انا علمي رياضه
ف 2 كنت جايبه مجموع وحش )80(
وف 3 بسبب مرض امي بالكانسر ومشاكل كتير من صنع الاستاذ بابا جبت 71
مع العلم اني من الفائقات بس الظروف واخدت مراكز كتير جدا ف مسابقات الرياضيات واكتر من مسابقه ع مستوى الجمهوريه
بس هو كان عاوزني زيه ادبي
وانا مليش ف الادبي خاااااااااااااالص
وكنت من المتفوقين بس الظروف ف الثانوي هي اللي قدرتلي ده
ورضيت والحمد لله
المهم
اول م ظهرت النتيجه والتنسيق
بدأ يتخانق ويقوللي انتي عاصيه مش بتحترميني وعايزه تدخلي علمي
ومتكبره
عايزني ادخل تربيه بالعافيه وانا مش حباها
وفاكرني متكبره عليها لانه فيها
والاستاذ عايزني ادخل اي كليه اشتغل ع طول منها اول م اتخرج
مش مهم ايه الكليه المهم عنده الراتب
وبدأ يخترعلي حاجات مستفزه مش مجالي ويقوللي انتي فاشله ومليش حق يكون عندك طموح او تحلمي
كان عايز يدخلني ف الاول خالص انتساب وافضل 4 سنين انتساب ونسافر انا وهو بيس ع الامتحانات وهو اللي يسافر يجيبلي الكتب
انا مش قادره اتحمل اقعد 4 سنين ف البيت
بعد فتره لقيته راجع يقوللي انا اللي هنسقلك مش انتي
اوعي تنسقي من غيري لانك هتشوفي نفسك ف الكليات وانتي ولا حجاجه وكلامي هو اللي هيمشي
راح كاتب اول رغبه معهد كومبيوتر ف محافظتي خاص
استغربت جدا انه هيدخلني خاص
بس اتاريه بيسمع كلام صاحبه حبيبه عشان بنته كانت ف المعهد ده
واكتشفت منها انه معهد فاشل وتجاري مش للكومبيوتر
حاولت اقنعه بمنحه ف جامعه خاصه رفض ومحبش اساسا يسمعني بيقوللي انتي شايفه نفسك ع ايه والمنحه لو م جبتيش امتياز هتروح منك وانا هتدبس ف مصاريفك ولأ هقعدك ف البيت ساعتها احسن لانك م الاول فاشله
بعد فتره رحنا لعمتي لانها جت م السفر وهي اقنعته بالمنحه
راح كلم لجنه المنح ووسايط عشان المنحه تفشل
وطلعتلي منحه ب 25 ف الميه
طبعا رفض وقاللي احسن المنحه راحت وقعد يضحك ومبسوط ع الاخر
وقاللي انه استحاله يخليني اطلع بره المحافظه حتى لو عند جدتي ف القاهره او عمتي هناك
ولو جتلي جامعه انتظام هيخليني ف البيت لحد م يلاقي طريقه عشان يجيبلي انتساب
لانه زمان كان انتظام وبالواسطه بقى انتساب
وعايزني اقعد ف البيت
يا إما ادخل زراعه خاصه هنا ف المحافظه عشان هو عارف ناس هتعينني اول م اتخرج
وانا مش عايزه زراعه مش حباها ابدا
ولو دخلت اي حاجه هو عايزها والله هفشل نفسي عشان اريحه
لاني كرهت اسلوبه المتسلط ده
معقول في كده
انا عمري م شفت اب يكره الخير لبنته
ويقوللي انتي ولا حاجه من غيري وشايف نفسه الناس كلها بتبوس رجله لمجرد انه مرتين قال خطبه ف جامع جمبينا
انا فعلا بكرهه
الله يخليكوا قولولي اعمل ايه مع بني ادم زي ده
حتى الكلمه رافض يسمعها مني
ع طوزل زعيق وشتايم وشخت
انا بجد تعبت
تعبت ومش عارفه اعمل ايه
انا بكرهه
|
السلام عليكم ورحمة الله وبركاته
ربنا يبارك فيكِ ويوفقك في حياتك الجديدة ويسعدك إن شاء الله
تعالي نتكلم شوية في موضوعك ونتكلم بالعقل والمنطق والإحساس والدين والواقع وكل اللي تحبيه
لإني بصراحة مش متقبل فكرة إن ده بلاء .. البلاء هيعيشك في جحيم ومش هيخليكي تنامي صدقيني
-: أولاً مقدمة لا بد منها ولازم تعرفيها قبل ما نتكلم :-
- في تصورى واللي الواقع بيقوله - كل أب في الكون ده نفسه يبقي عنده ابن او ابنه يفخر بيهم قدام أصحابه وأهله وجيرانه .. وبيعيش طول حياته يحاول يحقق الحلم ده .. بس لما ابنه او بنته بيخذلوه في حلمه - بعمد او بغير عمد - بينهار الأب .. ولكن رغم إنهياره بيحاول يفكر ف مستقبل كويس لابنه او لبنته يساعده في إنه يعيش حياة كريمة .. وبيحاول يبعده عن ( منطق ) و ( نمط ) المُغامرة
نيجي نقسم الموضوع
أولاً : لابد من الإعتراف إنك جبتي 80 % وانتي في علمي رياضة وده مجموع غير مُجدى في مجال زي ده .. ولنفترض حتي لو كملتي بدون مشاكل فسنة تالته أصعب مما تتخيلي عن سنة تانية .. تالته More Complicated - أكثر تعقيداً - بكتير عن تانيه وده طبعاً لوجود ( الفيزيا - ورياضة اتنين ) .. طيب ليس دفاعاً عن ( السيد الوالد ) فالراجل رغم كدا ورغم معرفته إن المجموع غير مُجدى ( لإنه بالطبع راجل متعلم وعارف المجاميع دلوقتي ) سابك تكملي .. مع إنك كان مفروض فرض تام تحولي أدبي ( وفكرتك عن الأدبي غلط طبعاً إنه مجرد حفظ وبتاع المُتخلفين لاء المجتمع اللي حواليكي هوا اللي خلاه كدا بس ) المهم مش هنسترسل في التعريف بالمجال الأدبي .. نرجع ( للسيد الوالد ) سابك تكملي وطبعاً بسبب ظروف عندك مقدرتيش تحققي .. إذن فمعادلة الثانوية وتجربتك بتاعت التعليم الثانوي تعتبر فشلت .. ومتزعليش لما نقول فشلت ما أنا فشلت كتير عادي وبفتخر جداً لإني بعد كدا عرفت ايه اللي مفروض يتعمل .. طيب حضرتك اخدتي القرار مرتين ومقدرتيش تحققي فيه .. ليه متجربيش تاخدي القرار اللي بيقولهولك ؟ يعني وفقاً لكلامك إن باباكِ قادر علي ( دخولك جامعة خاصة ) وده يُعني إنه ناجح في حياته العملية اللي بتنعكس عليها الماديات بالضرورة .. ما تسمعي كلام راجل ناجح المرادى .. جربي وبعد ما تخلصي وتشتغلي وتعملي فلوسك خدي اللي انتي عيزاه خاص ومش هيبقي فيه أي لوم عليكي .. وكدا مخسرتيش حاجة .. حتي لو هتكملي وانتي في بيتك مع زوجك - إن شاء الله -
ثانياً : طبعاً ده لا يُسقط علي والدك اللوم إنه فعلاً مخطئ في مُعاملتك .. لإن تربية البنات خصوصاً هو فن التعامل مع القوارير زي ما قال الرسول - صلي الله عليه وسلم - بس هقولك حاجة بردو .. رغم زعلي منه إنه بيعاملك كدا .. أد ما انا فرحان إنه خايف عليكي كدا .. والله خايف عليكي جداً .. وهتعرفي لما عيونك تتغير شوية في المستقبل .. لاحظي إنه مش مستني منك حاجة وإنه رباكي كل ده وهوا عارف إن هيجي واحد زي الشطور كدا ترتبطي بيه وتشيلي اسمه وخلاص مهمته انتهت .. - دور الأب والأم عظيم جداً - خدي بالك .
ثالثاً : والله المجال الأدبي شئ رائع .. ويارتني كنت عرفت كدا في بداية حياتي .. كنت بعلاقاتنا - الحمدلله - بقيت حاجة مرموقة جداً جداً في وقت قصير جداً .. لكن للأسف المجتمع كان لاعب في دماغي زي ما هوا لاعب في دماغك كدا بالظبط .. اقعدي اتكلمي معاه وشوفي نظام التربية واتكلمي معاه وشوفي نظام المعهد وقوليله رأيك بشويش وبهدوء .. الأب بيبقي مستني - زي ما بيسمع دايماً - ان البنوته حنينه علي ابوها وبيتضايق اوي لما بيحس إن كل أصحابه مثلاً عندهم بنات بيطيعوهم وهوا مش عارف يوجه بنته ..
رابعاً : زي ما قولتلك باباكي بيخاف عليكي جداً جداً ومش عايزك تغامري .. صدقيني اللي انتي عايزه تعمليه مُغامرة .. واديكي جربتيها قبل كدا لما كملتي في العلمى .. جربي الحياة والواقع من شخص عملي زي والدك قادر إنه يتحمل مصاريف خاصة وأدوية كانسر
خامساً وأخيراً : لو ضاقت بيكِ خالص صلي صلاة استخارة وادعي إن والدك ربنا يرشده للخير ليكي وإن شاء الله ربنا مبيخذلش حد طلبه بقلبه وإن شاء الله كل حاجة هتكون بخير
ربنا يبارك فيكِ وفي اللي تحبيه ويهدي اي حد بتكرهيه
ويشفي والدتك يارب بإذنه ويرحمها
لو فيه اي حاجة إخواتك هنا موجودين
مع السلامة