[أسيل رزق]

المشاركة الأصلية كتبت بواسطة بنوته اهلاويه

اذيكم يا شباب المستقبل (بنات وولاد )

كنت قلت انا وايمان ان احنا هنعمل فكره لذيذه كده
-من رايي يعنى -
ان احنا هنجيب مشكله عجبتنا وبيعانى منها ناس كتير
ممكن يكون انا ممكن تكون انت
ونحاول نعالجها احنا مع بعض
وفى الاخر نجيب رأى جايب الخلاصه
المشكله دى بجد خلتنى اضايق واعتقد ان اى حد هيقراها هيحس انه قرفان اوى
من بلده من النظام من كل حاجه
اسيبكم معاها ونتناقش بعد كده

أنا عمري 21 سنة، أنا مخنوق من أهلي ومن الدنيا كلها.. ماعندكمش أهل سلف؟!
طبعا أنا ماقصدش.. مهما خنقوني فهم أولى بيّ وأنا أولى بيهم.. المشكلة إنهم فاكرين إني دايماً عايش في رغد المعيشة وإني تمام ومش ناقصني حاجة، بس يمكن عشان أنا بطلت أطلب منهم من زمان، من ساعة ما حسيت إنهم بيتطحنوا في الحياة عشان يأكلوني ويلبسوني!
أنا ناقصني إن حد يقول لي: "مالك؟ إيه اللي مزعلك؟ عملت إيه النهارده؟ مش نفسك تتجوز؟! إيه أخبار الكلية معاك؟" الكلية اللي أنا طالب فيها مع إيقاف التنفيذ، وماشي فيها بخطوات سلحفاة ومش بإيدي؛ لأني لا معايا آخد كورسات، ولا الكتاب نافع، ولا هو بينزل أول السنة ولا أنا معايا 60 جنيه أسبوعياً عشان أحضر محاضرات، ولو حضرت وسافرت فهل الدكتور كمان هييجي من الإسكندرية لدمنهور ولاّ لأ؟! ولو جِه، أنا هافهم منه وهو قرفان مني، ودايما فاكرنا أغبياء وبيتكلم بالقطارة؟؟
والله وأنا في سنة أولى كنت طالب مجتهد، وكنت باحضر وأذاكر وكمان كنت باشرح لزمايلي المحاضرات، لكن بصيت لقيت نفسي شايل في سنة أولى 10 مواد!! طيب كنت باذاكر ليه، ومقطّع نفسي على إيه؟ ومن ساعتها بقت الكلية الحلم الضائع.. وبعدين لمّا أخلصها وأروّح، فين أهلي؟ مش عايزين يفهموا كده طبعا، دايما بيسألوا: "أمال الناس اللي بتنجح دي بتنجح ازاي؟"، وأنا نفسي ألاقي أي رد عشان أقوله لهم بس مش عارف.
ازاي أهلنا بيطلبوا منا إننا نكون مثاليين وزي ابن فلان وبنت علان اللي هم شايفينهم حلوين. مايعرفوش اللي أنا أعرفه عنهم، وأهالينا أساساً مش مثاليين، ازاي أنا مش باعرف أقرأ واقول لك: "اقرأ".. ازاي؟!! كده حرام، علِّمني القراءة وبعدين ابقى عاقبني إني مش باقرأ. يعني وفّر لي ظروف الطالب الناجح وبعدين اسألني إنت بتسقط ليه.
واللي أكتر من كده إنهم كل شوية بيقولوا: "يا فاشل يا ساقط، إنت مش راجل، ومالكش لازمة"، تخيل؟! طيب لو ماليش لازمة ربنا كان خلقني ليه؟ وبعدين اللي في نفس سني بيعملوا إيه غير إنهم ياخدوا المصروف ويخرجوا يتفسحوا ويهزروا..
والله أنا عمري ما خرجت مع بنت، وأنا عندي واحد وعشرين سنة دلوقتي، ولا انبسطت! هافرح إمتى؟ لما أكون صاحب عيال؟! طول عمري في حالي وماليش دعوة بحد.. باشتري طقم واحد كل سنة ونص وراضي، مش عارف أدخل سينما وهي حبي الأول لأنها بتقعدني في البيت 3 أيام مانزلش عشان يكون معايا 12 جنيه أدخل بعشرة وأركب مواصلات وأشرب القصب قبل وبعد السينما وراضي..
طيب أجيب كريم للشعر منين وماكينة حلاقة منين، ولو اتهفّيت في عقلي وحبيت أحط بارفان؟؟! دي طلبات أساسية وبسيطة لكن..... بطلت سجاير عشان مش معايا تمنها وكمان عشان كنت باتخنق من الناس اللي بيطلبوا مني سجاير، وأنا مش باعرف أقول لأ!! أو أكدب، مش بُخل لكن لأنها بحساب يعني، وكده الجدول هيبوظ! ده أنا عشان أشتري كتاب عاجبني وأنا من مدمني القراءة باحسب ألف حساب، عشان أشتري الجورنال اللي بحبه وأنا مصروفي 4 جنيه، منهم جنيه للنت، والباقي مواصلات أو تمن كوباية عصير القصب اللي بيسعدني، أو باكو مناديل أو مصاريف استثنائية كتير قوي. وكمان زي ما بطلت التدخين بطلت أروح جيم؛ لأنه كان بـ2 جنيه.. مش حاجة يعني، بس كانوا بيفرقوا معايا جدا..
أنا باكون في أشد الحرج لما أركب مواصلة ويكون فيها حد أعرفه، أو هو راكب معايا وأنا مش معايا غير تمن نفر واحد، وأنا مش عايز حد يدفع لي.. باكون مش عارف أدفع لوحدي وكده هيقول عليّ كلام، أو هيظن ظنّ مش كويس، ولاّ أعمل عبيط! أنا مش عايز حد يدفع لي ويكون ليه جميل عليّ، ومن أكبر المشاكل اللي عندي بقى إني مش قادر أحب.. ماعنديش الإمكانيات إني أحب..
أنا مش عايز مصروف زيادة من أمي؛ لأنها كتّر خيرها لحد كده،. بس طالب منهم يحسوا بيّ، دايما فاكرين إني عايش مقضيها زي الشباب الهايف اللي مش فاهم حاجة عن الدنيا ولا عن بلده واللي حاصل فيها، كل كلامي ياخذوه باستهزاء، فعلا ماحدش بيحس بالإنسان غير نفسه، أنا مش عارف إيه الحل في البلد دي.. حسبي الله ونعم الوكيل.. مش لاقي حل.. كل ده وماحدش من أهلي -لا أبويا ولا أمي- حاسس بيّ، لأن الاثنين منفصلين، وأبويا مش بيسأل عليّ، وأمي الغلبانة عينيها طالعة عشان نلاقي نأكل، هي مدرسة بقالها 19 سنة، مدرسة أولى ومرتبها 290 جنيه، وأنا عندي أختين بنات، منهم واحدة في ثانوي وواحدة عايزة عريس وأنا ماعنديش أي أمل إن بكرة يتصلح..
سنة بتفوت وراء سنة وأنا حاسس إني باعجِّز وقلبي بقى كله تجاعيد وأنا عندي 21 سنة وعندي اكتئاب وكاره الدنيا.. والله ساعات بامشي في الشارع عايز أضرب الناس ويضربوا فيّ لحد ما أرتاح، بس أرجع أقول هم مالهم؟ إنت هتتجنن ولاّ إيه؟! كل ما أشوف البنات اللي ماشية خاربة الدنيا، والشباب اللي بيدخن السجاير الأجنبية اللي تمنها يساوي مصروف يومين ليّ وبيفكر النهاردة هنسهر فين وراكبين عربيات شبابي، ومعليين الكاسيت، وأنا واقف مستني الأوتوبيس أو الترام، وألاقي عربية مكيفة فيها كلب مطلع لي لسانه بيغيظني وبيقول لي: "أنا كلب بس واخد حقي، راكب عربية وإنت مش لاقي النقل العام يا (.....)". كل ده أبويا وأمي مش حاسين بيّ، ولا كمان أصحاب البلد اللي المفروض إنهم بيشتغلوا عندنا، هو ده اللي أنا طالبه..
طالب إن الناس كلها تحس ببعضها وماحدش يلوم على التاني غير لما يعرف ظروفه.. ولاّ ليه يلومه؟! طالما مش هيساعده، يسيبه في حاله عايش في اللي هو عايش فيه، ويوفر عليه حرقة الدم.. يا رب كلامي يوصل في وسط الزحمة.. حتى لو ما وصلش أديني اتكلمت وفضفضت مع الكمبيوتر يمكن يشوف لي حل!!

الشاب ده حاسس بمشكلته و حاسس بظروفه بس نفسه يبقى أحسن حال من كده لكن مش قادر
و واضح إن عنده نسبة من عدم الرضا و دى مشكلة كبيرة جداً لإن القناعة و الرضا فى الزمن ده مش بنلاقيهم كتير
هو من النوع اللى عايز دفعة قوية من حد علشان يشتغل و ينجح فى حياته و يكون لنفسه حياة مستقرة
بس ده مش هيجى إلا من إصراره لازم يكون عنده عزيمة أكتر
حال البلد تعبان ومفيش شغل بس ليه مانتعبش أكتر و نحفر فى الصخر
والدته مش هتسرق علشان يعيشوا كويس ولا إخواته بإيدهم يعملوا حاجة
هو اللى فى إيده المفتاح
هيتعب أوى بس معلش .. على الأقل يحس إنه ليه قيمة
المفروض يدور على شغل فى أى مكان حتى لو هيشتغل سباك .. بس المهم إن يكون معاه قرش حلال
و حتى لو المرتب مش هيصرف على أمه و اخواته على الأقل يصرف على نفسه
و يحمد ربنا إنه فى نعمة مش حاسس بيها .. مستواهم المادى الضعيف خلاه لا يمشى مع بنات و يبطل السجاير
و يا ريت لما ربنا يفتحها عليه مايرجعش تانى للغلط
محدش هيحس بمشكلته و حاله اللى عايش فيه إلا هو
أنا شفت شباب حالهم أسوء من حال الشاب ده
و طبعاً مانقدرش نقول غير ربنا يصلح حال الجميع
و نحمد ربنا على كل نعمة عايشين فيهل و لو بسيطة
الحمد لله على كل حال

أخيراً رديت .. ربنا يصبركم عليا
مشرفة فاشلة و النت بتاعها أفشل منها


سلام عليكم