[الأستاذة هدى]

ايه الصور الجميلة دى؟؟؟

انا داخلة وناوية اجيب كام صورة كدا اجنن الناس بجمال بورسعيد لاقيتكم عاملين الواجب وزيادة بارك الله فيكم

وطبعا الغالبية العظمى زعلت من البنت اللى بتتكلم عن الزبالة وكأنها ساكنة ف مزبلة مسكينة عاوزة اقولك لو خرجتى برة بورسعيد هتعرفى يعنى زبالة وقذارة وهتعرفى انك ف اجمل وارقى بلد فيكى يا مصر بس اللى ما يعرفش دايما يقول كده فمعلش بكرة تخرجى وتعرفى

والاستاذ اللى بيشم ريحة هوى بورسعيد والله كلامك صح الصح وانا داخلاها باشم هواها يدينى نشاط وسعادة غير عادى يمكن اللى بييجى علينا وماعاش فيها ما يحسش باللى احنا بنحس بيه لكن دى حقيقة والله العظيم .... واللى ييجى بورسعيد ويروح وييجى عليها وتنبهه لهواها يحس بيها دى شهادة صديقة قولتلها وانا داخلة معاها بورسعيد بعد ان اخذت نفس عميق من هواها عند مدخلها : " الله " شامة هواها ؟؟؟ فضحكت قالت : هوى ايه؟؟ مش شامة حاجة!! طبعا انا استغربت اوى مش شامة هواها ازاى دى؟؟؟؟
المهم
تعددت زياراتها لى ف بورسعيد فإذا بها تشهد فى احدى المرات تعبيرا عن حبها لبورسعيد :" والله يا هدى انا شميت هواها اللى كنتى بتحكى عنه هى فعلا هواها له ريحة جميلة تفرح "

اللهم بارك لنا فى بورسعيد ولا تحرمنا منها ابدا اللهم امين ...