[أسيل رزق]

السلام عليكم ورحمة الله وبركاته

دى أول مرة أدخل الموضوع و دخل دماغى جداً
و إن شاء الله مش هسيبه إلا لما أخلص كلام فيه

أولاً : أى إنسان فى الدنيا ليه مميزاته و عيوبه و يستحيل يكون فى إنسان شيطانى كامل
الإنسان إنسان علشان بيجمع بين الأتنين مع إختلاف معايير الخير و الشر و الإصلاح و الفساد من شخص لآخر

علشان كده مايصحش أبداً إننا نهاجم حد من دينا و عقيدتنا و نكفره .. و خصوصاً إن الناس دى توفاهم الله .. يعنى الضرب فى الميت حرام .. ربنا هو الوحيد اللى هيحاسبهم

ثانياً : لما قريت الأبطال اللى حضرتك بتتكلم عليهم إندهشت إنهم إخوان و إستنتجت من ده إن الموضوع إخوانى بشكل غير مباشر و ده يعنى إن الموضوع مخالف لقوانين القسم اللى بتنص على

3-يمنع منعا باتا وضع مواضيع تتعرض لاي حزب او جماعه دينيه

ثالثاً : أنا هحاول على قد ما أقدر أدافع عن الكلام الموجه ضد قاسم أمين بالذات لإنى قريت عنه كتير و شخصية من وجهة نظرى تستحق كل الإحترام و التقدير لإن دعوته لتحرير المرأة إتفهمت غلط فى عصره و واضح إن فى عقليات لسه بتعترض على كلامه حتى الآن .. نصيحة منى يا ريت تتفرجوا على مسلسل قاسم أمين بيدافع بشكل عقلانى عن دعوة قاسم أمين لتحرير المرأة و إزاى قدر يدافع عن آراءه و توضيحها بشكل مفهوم للمعارضين أو للشعب المصرى والشعوب العربية

رابعاً : لازم الموضوع يكون فى حيادية أكتر من كده .. لإن لو فضل على نفس الطريقة أنا هضطر آسفة إنى أقفله

و لى عودة للدفاع عن الكاتب المحترم قاسم أمين إن شاء الله