السلام عليكم ورحمة الله وبركاته
طبعا أنا قلتلكم المواد اللى هتاخدوها فى اعدادى
المشاركة دى هكلمكوا شوية عن المواد اللى هتمتحنوا فيها ميد تيرم التيرم الأول وهم:-
1-رياضة(جبر-تفاضل)
2-فيزياء
3-انتاج
4-استاتيكا
5-الرسم الهندسى
بس الأول أحب أقولكم على حاجة عن الأمتحانات
احنا عندنا فى اعدادى امتحانات غير امتحانات التيرم
يعنى هتمتحنوا حاجة اسمها امتحانات الميد تيرم(يعنى نصف التيرم)
وشفوى وعملى
وهكلمكم على كل أمتحان ومواده بالتفصيل
وهتقولوا أشمعنى أخترت امتحان الميد تيرم الأول
بمنتهى البساطة علشان ده أول أمتحان هتقابلوا فى الكلية
ندخل بقى فى المهم
1-رياضة
الرياضة عندنا متقسمة لفرعين زى ثانوى كنتوا بتاخدوا جبر وهندسة تحليلية وميكانيكا وتفاضل وتكامل
بس عندنا الجبر ليه دكتور (ياأما د.شريف ربيع ياأما د.حسين طبلية)والأتنين كويسين
والتفاضل ليه دكتور(ياأما د.ميرفت كوجك ياأما د. اعتدال)والأتنين برضه كويسين بس انت لو بتحب الشرح اللى واحدة واحدة وبراحة يبقى عليك ب د.اعتدال
انما لو بتقعد صاحى ومركز يبقى د.ميرفت هتلاقيها ممتااااااازة
هتاخدوا فىالجبر لغاية الميد تيرم
*الكسور الجزئية
*نظرية ذات الحدين
وفى
*المصفوفات
*المعادلات الخطية
بس اخر اتنين دول مش داخلين فى الميدتيرم غالبا
.................................................. ........................................
وهتاخدوا فى التفاضل
*الدوال المثلثية ومشتقاتها
*الدوال العكسية ومشتقاتها
*الدوال الأسية ومشتقاتها
*التفاضل اللوغاريتمى
وفى
*الدوال الزائديةومشتقاتها
*الدوال الزائدية العكسية ومشتقاتها
*التفاضل الضمنى والبارامترى
*مفكوك ماكلورين وتايلور
واخر اربعة دول مش بيدخلوا فى الميدتيرم
نيجى بقى لشوية حاجات عاوز أقولهالكم
*لازم تحضروا المحاضرات وتركزوا فيها لأن الأمتحان مش بيخرج عنها
*فى حاجة أسمها شيت (ورقة أو ورقتين فيهم مسائل)
ده بقى تجيبوا تحلوا كله هوه فى جزء كبير من المسائل بيتحل معاك سواء فى المحاضرة أو السيكشن واللى مايتحلش وانت مش عارف تحله اسأل محدش هيقولك حاجة
*كتاب التفاضل والتكامل مالهوش لازمة محدش كان بيحتاجه
انما كتاب الجبر كويس وممكن تفهم منه لوحده
والكتابين عاوز تجيبهم هاتهم مش عاوز محدش هيقولك حاجة
*فى ورق معيدين عاملينه بيبقى موجود فى المكاتب اللى جنب الكلية وناس كتير بتذاكر منه
أخيرا وليس أخرا الرياضة من أجمل المواد اللى فى اعدادى
وسهلة ومفيهاش أى تعقيدات خاااااااااالص يعنى على بلاطة كده مادة تقدير
انتظروا حديثنا عن الفيزياء
|