بعد العصارى ووسط السريس
جلست وبعد ما ملكنى التهييس
انطلقت بصوتى مادحا سنتريس*
فقلت:
مشربتش ميتها
منزلتش ترعتها
جربتش تجرى و تهرب من عض كلابها و قطتها
ما اكلتش درة نيلى
طب جرب و ادعيلى
و ان جالك امساك ابقى تعالى ساعتها و اشتكيلى
************
دور على اجزاخانه هاتلك منها شربة ملح
بعديها بحوالى ساعه هتلاقى ان الامساك بح
خلاص انسى و معلش
يا حبيبى متضايقش
اومال يحصل لك ايه لو اكلناك المش؟
فى بيوتها و اراضيها
فى طرومبة بتسقيها
اشرب منها و قابلنى لو مجالكش اسهال بعديها
************
شوفنا ناموس حوالينا
قطع لنا ايدينا
جربنا نخلص منه راح مخلص هو علينا
براغيتك تعبانا
ورمت افانا
تفضل لازقة فى هدومنا اصلها يا حرام جعانة
شربت من دمنا
بهدلت امنــــــا
صرخنا قالوا معلش مش واخدين على فرشنا
************
هى دى قريتنا
و كمان حكايتنا
لو نفسك روحلها دى مش مسئوليتنا
*قرية بمركز اشمون محافظة المنوفية و هى مسقط رأسى