يا جماعة تنويه بس عشان تبقوا فاهمين كويس حاجة مهمة ...
التنسيق بيتم كالتالي ..
أولا : كل كلية في الجامعات المصرية بتقدم تقرير شامل و متكامل لوزارة التعليم العالي عن مدى استيعابها لأعداد معينة .
دا في مصر بيوقفوا لحد هنا طبعا في البلاد المتقدمة بتقوم الكليات بالتنسيق مع النقابات التابعة ليها الكليات عن عمل احصاءات عن احتياج سوق العمل كخطة حمسية و عشرية و خمس عشرية و عشرينية . و على اساسها بيحدد الأعداد المطلوبة من الثانوية العامة .
ثانيا : وزارة التربية و التعليم بتعمل احصائيات عن أعداد المتقدمين للثانوية العامة و تصورها عن نسبة النجاح و كم أعداد اللي ممكن يتقدموا من الثانوية العامة و بتبعتها لوزارة التعليم العالي عشان تبتدي الوزارة المعنية بدراسة هذه الأعداد و دراسة أعداد المقاعد التي يمكن للكليات استيعابها .
ثالثا : بعد السيناريو المتوقع لما تطلع نتيجة الثانوية العامة بيقسموها الى 3 مراحل و يبتدوا يوزعوها من كليات قمة لكيات قاع و الترتيب دا مش موجود الحمدلله الى في وطنا العربي اللي ماشاء الله عليه بصراحة .
رابعا : بعد ما يقسموا أعداد المقاعد و قبل عملية التنسيق الفعلية لطلاب الثانوية العامة بيقتطعوا أعداد معينة من المقاعد بتاعة كل الكليات مبنية على احصائيات السنوات السابقة لطلاب الشهادات المعادلة و طلاب الدبلومات الصناعية و غيرهم من طلاب الشهادات المختلفة.
خامسا : بعد التنسيق الفعلي ما يتم للثانوية العامة المصرية بيشوفوا كم تبقى من المقاعد الشاغرة او الفارغة و يضموها للأعداد المخصصة للشهادات اللي بعدها .
سادسا : تبدأ مرحلة التنسيق للشهادات الأخرى و هنا نختص الشهادات المعادلة عشان بس ترتاحوا و تفهموا و ما يجيش أي حد يقلقكوا .
تنسيق الشهادات المعادلة :
أولا : كل دولة عربية يتم التنسيق بين طلبة حاملي شهادتها على حدة (لوحدها)
لأن كل دولة عربية يخصصلها عدد معين من المقاعد في الكليات حسب نسبة عدد الطلاب المصريين المتقدمين
مثلا نقول عمان متقدم منها 10 مصريين (دا مثال توضيحي مش أكتر) فهنا مافيش مانع انهم يدوا ال 10 كلهم التخصص اللي هما عايزينه لأنهم مش هيشكلوا ضغط و اصلا كانوا حاطين للمتقدمين من عمان 80 مقعد منهم 20 طب و 20 هندسة و 40 باقي التخصصات لكن السنة دي مثلا اتقدم بس ال 10 دول فكلهم بيروحوا اللي هما عايزينه . بغض النظر عن مجموعهم الاعتباري (المعادل من قبل وزارة التعليم العالي)
لو كان المتقدم على سبيل المثال 300 طالب و طالبة من عمان هنا لا في عدد كبير يبقى هيعملوا احصائية عن مجاميعهم و يشوفوا أعلى مجموع و اللي بعده و اللي بعده و هكذا و لو كان مخصص 300 مكان مثلا لطلبة عمان أول 20 منها طب يبقى اول أعلى 20 مجموع هيروحوا طب و الطالب رقم 20 هو دا الحد الأدنى للطب اللي اتاخد من عمان .
و كل دولة عربية بيتم فيها الكلام بنفس الأسلوب .
توكلوا على الله و ما تقلقوش من اي حاجة و ان شاء الله ربنا يوفقكوا و يحفظكوا جميعا .
و النتيجة ان شاء الله قريبة و تم تأجيل الدراسة في الجامعات حتى 3 أكتوبر يعني ما تقلقوش كلكم هتلحقوا كل حاجة
قلبي معاكم و البتوفيق
|