قضيه أحب أن أطرحها عليكم قد تزيل اللبس عن البعض خاصة اللى فى الهندسه بالفعل
إنك حاسس انك بتدرس حاجات مش هتفيدك لما تتخرج فى الشغل
يمكن الاحساس ده يجيلك لما تلاقى نفسك عمال بتدرس نظرى كتير جدا بالمقارنه بالفتات من العملى (دا إن وجد أساسا)...وده واقع بالفعل للأسف.....فالعملى شبه معدوم أساسا بكليات الهندسه....لأسباب كتيره زى:
1-قلة الامكانيات الماديه بالجامعه
(مع انى مش مقتنع بالسبب ده...بس هى دى حجتهم)
2-أعداد الطلبه الكتيره
3-ان النظرى هو الأهم (امتحان آخر السنه +الميدتيرم)
4-درجة العملى لاتمثل أكثر من
5% من المجموع الاجمالى إن لم تكن أقل
دا غير إن النظرى كله (متكوم) ورا بعضه فى اعدادى وأولى وتانيه .. وهتحس انك برضه مازلت غير مستوعب الأمور...ثم تفاجأ بتطبيقات كل النظرى اللى درسته فى السنين اللى فاتت (متكدس) فى تالته وبكالوريوس....طبعا ده سوء تنظيم للمناهج
وأتحدى أى مسؤول فى هيئة التدريس داخل الجامعه يقول غير كده....
لإن الصح هو:
إن كل سنه دراسيه يبقى التيرم الأول بتاعها نظرى ..... والتيرم التانى يكون تطبيقات هذا النظرى فى الحياه العمليه(نظرى +عملى)
س :
طب وإيه الحل؟
ج :
طبق العملى بنفسك وأمرك لله
س :
إزاى؟
بصوا ياشباب...أولا لازم نكون متفقين على مبدأ إن جملة (أصل احنا مخدناش الحاجه دى ) ملغية من قاموس المهندسين....يعنى أى تقنيه هندسيه فى مجال دراستك لازم هيكون عندك إن عاجلا أم آجلا فكره عنها...وبناء على الكلام ده هتكون دى خططك (لتطبيق العملى المعدوم فى الكليه) طوال الدراسه:
ملحوظه (سأركز على مهندس بقسم كهربا كمثال للتوضيح ):
1- أى جهاز كهربى فى البيت يبوظ ... فكه بنفسك وابدأ دور على سبب المشكله...ولو معرفتش .... خده على أقرب كهربائى واعرف منه المشكله وخليك قاعد معاه وهو بيصلحه ... ومره فى التانيه هتعرف معظم الأعطال الشائعه وعلاجها ويصبح لديك
(تراكم خبرات)
2- لو فيه حد بيبنى بيت جديد ... لازم تستغل الفرصه وتروح مع الكهربائى وهو بيركب توصيلات الكهربا
(مفيده جدا جدا)
3- ورشة لف المواتير مخزن هاااااائل للمعرفه بالآلات الكهربيه....لو تعرف تظبط لنفسك ساعتين زمن فى يوم أجازتك وتروح فيهم هناك يبقى انت ماشى على الطريق الصح
(يفضل للى رايح تالته)
4- التدريب الصيفى اللى المفروض تعمله فى الكليه مهم جدا وفرصه للاحتكاك بمحطات الكهرباء أو التوليد
(خد فكره عنها..هتوضحلك أمور كتير)
كلامى اللى انا قلته ده طبعا هيختلف من قسم للتانى ... بس أنا كنت بوضح طريقة تفكيرك تكون إزاى للدخول فى الجانب العملى لأنه لابد منه ..... بدل ماتسيب نفسك للكليه وتفاجأ انك اتخرجت من قسم كهربا....
وعمرك ما وصلت لمبه !
_______________
منتظر مداخلاتكم وتعليقاتكم ....تحياتى
الأمير الرقمى