[-=MoDyBaShA=-]

السلام عليكم و رحمة الله و بركاته
معلش يا جماعة انا عايز اعمل تعليق صغير بس على اللي بيحصل
انا مبدئيا ً كنت شهادات معادلة بس الكلام دا من سنتين و الحمد لله ربنا كرم و دخلنا حاسبات و معلومات عين شمس
اولا ً : نتيجة التنسيق في الشهادات المعادلة ظهرت في سنتي قبل الدراسة بحوالي اسبوع و نص بس ! و انا شايف ان لسه تقريبا حوالي اسبوعين و 3 ايام على الدراسة فاستنوا ال 3 ايام دي يمكن ربنا يفرجها عليكوا و على أختي !

ثانيا ً : انتوا ليه مستغربين ان النتيجة متأخرة اوي كدا ! ما كل حاجة اصلا ً بتحصل في تنسيق الشهادات المعادلة ملغبطة و مشاكل ملهاش اول من آخر !

طبعا ً الناس اللي جاية من السعودية بعضهم قابل المجموع الإعتباري الغريب اللي طلعلهم
بمعنى ان في ناس اعرفها مفروض تبقى جايبة 93 % كمجموع إعتباري من 410 درجة راحت جامعة القاهرة لقت المجموع 88 % اللهم لا حسد ! ليه ما تعرفش ! بيحسبوا بمزاجهم ولا ايه !

غير طبعا ً : الظرف اللي بتسحبه ب 500 جنيه على ما عرفت مع ان لطلاب الثانوية العامة بخمس المبلغ دا تقريبا ً
( تقريبا بيقولوا دول جايين من برة و معاهم على قلبهم قد كدا ! ما تيجي نسلخهم )

غير ان اصلا مصاريفك اول سنة بيبقى 10 أضعاف او اكثر بالنسبة للمصاريف العادية ! ( الكلام دا طبق من السنة اللي فاتت و الله اعلم ايه النظام السنة دي ! اعرف ناس معايا في حاسبات و معلومات دفعوا 1000 و شوية ! )

و عندك إن بطاقة الترشيح اصلا ً بتجيلك بعد الدراسة ! .. يعني بطاقة الترشيح بتاعتى جاتلي بعد 3 أسابيع من الدراسة شرفت على باب بيتنا ! !
و المشكلة انك مثلا ً اول ما بتتطلع النتيجة بتظهرلك بطاقة الترشيح على النت بتطبعها و بتدخل بيها مؤقتا ً .. بس امن الجامعة اللذيذ بتاع عين شمس من نص الإسبوع الثاني كانوا بيسألوا على بطاقة الترشيح اللي بتوصلك على البيت ! !طيب مفروض اجيبها منين .. اروح البريد ادور عليها ! !


فعموما ً : نصيحة مني و الله ما تستغربوش من اللي بيحصل علشان حصل معانا ، و إن شالله كل واحد يجيلو الكلية اللي كان نفسه فيها ، و نصيحة تانية !
حاولوا لو النتيجة إتأخرت عن كدا جمعوا نفسكوا ! إعملوا جروب على الفيس بوك مليان إحتجاجات .. ابعتوا لكل القنوات ...

و حاولو تتصلوا بمركز التنسيق تشوفوا ناوين النتيجة تتطلع إمتى ، و مفروض يبقى في معاد مؤكد بس هنقول ايه !

يبقى انت أكيد أكيد في مصر !