السلام عليكم
اولا قبل ما اتكلم
لو كانت المشكلة فعلا ليه مش بنتكلم فصحى فانا اقدر اقولك
ان انت لو اتكلمت فصحى والله الناس بتضحك عليك
انا هكلمك عن نفسي
مثلا انا من زمان بقول كلام ومعرفش انه عربي فصحى
بص مثلا دى كنت مرة مع واحده صاحبتى
بالظبط كما حدث
انا : يا الله مش عارفه فيه ايه النهارده انفى مش طبيعيه حاسه انى داخله على دور زكام
صاحبتى : ههههههههههههههههه ايه انفى دى يا رحمة :D على كده انتى لما تيجي تتكلمى على ودانك بتقولى اذنى وعلى بقك بتقولى فمى ........... وقعدت تتريق شوية ....
لا وايه زكام دى كمااان . يا بنتى انا والله بشك فى مصريتك
انا : امال انتى بتقولى عليها ايه
صاحبتى : اسمها مناخير ومسكت لى انفى وقالتلى دى اسمها مناخير
انا : م ن ا خ ي ر ؟؟؟؟ ايه دى كلها ؟؟؟؟ يا حبيبتى انا ليه اتعب نفسى واقول الكلمة دى ما انفى اسهل ؟؟
صاحبتى : طيب يا استاذه رحمة .. ربنا يكملك بعقلك
انا : _طبعا بتريقه_ جزاكى الله خيرا على الدعاء
صاحبتى : ممكن اسال سؤال ؟؟؟
انا : اه طبعا اتفضلي
صاحبتي : ارد اقول ايه
انا : على ايه ؟؟
صاحبتي : يعنى لما حد يقوللى جزاكى الله خيرا يبقي ايه الرد ؟؟
غالبا كده انا قلتلها اسالى باباكى وسبتها ومشيت يا اما قلتلها قولى واياكم ومشيت وسبتها بردو..
**************
موقف تانى ..
انا وواحده صاحبتى غير الاولانيه
انا : شفتى موبايل 6600 نزل بكام
صاحبتى : بكام
بالف ومتين .. تخيلى
صاحبتى : يا شيخه ..
انا : اه يا بنتى ده انا شايفاها بعنيا
صاحبتى : شفتيها فين
انا : فى الجريده
صاحبتى : ايه الجريده دى اسمه جورنال <_<
انا : لا بقي اسمها جريده
صاحبتي : لا جريده دى بالعربي
نا : امال الصحيفه تبقي ايه ؟؟
صاحبتى : كفاية يا رحمة .. خلاص .. اسفه
***************
موقف اخر
انا وصاحبتى بنتفرج على بطولة كاراتيه لسن فوق واحد وعشرين سنة
صاحبتى : رحمة بصي الاتنين دول بيلعبوا على اول وتانى
انا : الماتش جامد ... يا رب
صاحبتى : يا رب ايه ؟
انا :
صاحب اللحية يكسب ..
..................
والباقى اكيد عرفتووووه
.............
والحوارات دى كتير جدا
ودى كلمات فما بالك اذا كانت جمل كامله بالفصحى(مع العلم انها احيانا بتحصل)
وفى الاخر طبعا انا اللى بطلع غريبه او بمعنى اصح مش طبيعيه وشوية من اصحابي فسروا ده على اساس انى اقمت فى دولتين قبل كده بره مصر لكن طبعا مش ده السبب
اللى انا بقي بستغربه جدا شكل وشوشهم دى حتى وصلت ل _ انا بشك فى مصريتك _
يعنى المصريين مش بيتكلموا عربي
على فكرة الموضوع ده دخل دماغي وباذن الله هحاول اجيب سبب ان احنا لا نعتبر اللغه العربية جزئا مننا
.............
عذرا على الاطالة والخروج قليلا عن الموضوع
جزاك الله خيرا يا خالد على الموضوع الاكثر من هام
* اه على فكرة علشان تبقي عارف الرد على جزاكم الله خيرا بتبقي بجزانا واياكم :P