يوميات بيطراوي ......بقلم احمد الهواري
انا قريت كام حلقه من اليوميت دي وعجبتني جدااا بجد
هو كاتب اليوميات دكتور احمد الهواري طالب في بيطري القاهره الفرقه الرابعه تقريبا
وانا شفتها ع الفيس بوك علي جروب كده
وقلت اجيبهالكم تقروها معايا
هجيبلكو كل يوم حلقه ان شاء الله
الحلقه الاولي
كريم وشهرته كيمو طالب زكي ومحترم بس شقي وعنيه زايغه شويه بتاع اشتغالات اصحابه بيحبوه وبيحبهم ملوش شله معينه .. يعنى .. بتاع طنطيط هنا وهناك ومع دول شويه وهناك شوية واهي بتتقضا .. بيموت في حاجه اسمها التهريج وانه يعرف بنات جديده .. عشان كده ربنا كرمه من اوسع ابواابه ودخله كليه طب بيطري 
الواد رضي بالي ربنا قسمهولوا وقال توكلنا علي الله وقضي الخمس سنين واهو يتخرج والسلااااااام.......
...كريم خلص الثانويه بسرعه محسش بيها .. أصله كان بيقضي ايامه فيها علي.. اذاعه القراءن شويه .. ونجوم اف ام شويتين.. ومكنش بيذاكر كتير اخره يحل امتحانات ويركز في اجابتها ... !
المهم انه كان زي اي شاب دماغه في الجامعه والبنات والشلل والرحلات والدنيا الي مش بتخلص دى .. !!
الميزه في الواد كريم انه كان بيذاكر بمزاجه فكان لما يقعد ساعه بنفس كانه قعد 15 ساعه مذاكره ..ومكنش بيروح المدرسه الا عشان يفطر ويقعد مع اصحابه أويشربله سيجاره ولا حاجه .. 
الثانويه خلصت بدروسها .. بسلاطاتها .. ببابا غانوجها .. علي راي دبور ... ومجموعه صفى في الاخر علي 95.2% ... وفرح اوي وقال الحمد لله أصل ساعتها الامتحانات كانت صعبه فكان كله متاكد ان التنسيق هينزل في السنه دي.. وقال انا راشق في صيدله مرتاح ...
بس القدر هنا لعب لعبته !!
ووزير التربيه والتعليم ضحك علي كل الناس .. وعلي الجرايد .. والتليفزيون وكل الدنيا .. والتنسيق منزلش ... وررشق كيمو في كليه الطب البيطري جامعه القاهرة
كيمو مكنش في دماغه بقا.. اهي اي كليه والسلام .. وتكون برا المحافظه الي كان منها.. ان شا الله تكون في الهند.. بلد التكاتك ..عارفين التوكتوك ولا لأ ..
الكشف الطبي.. بدا وكيمو نزل البندر ( القاهره يعني ) طبعا اخد انتيمو معاه عشان يتفسحوا شويه .. وبشوفوا الدنيا .. ويتكلمو علي شارع الهرم شويه.. عشان يبقوا يحكوا لصحابهم اللي في محافظته ( شوف سبحان الله يا أخى المحافظه الي منها اصلا ..كانت وجه بحري فكان فيها خير يعني مش عارف ليه جي يبص في شارع الهرم )
المهم نزل الكشف الطبي وراح مستشفي الجامعه لقي نااااااااس كتيييييييير محدش عارف حد ولا حد عارف حاجه .......... دخل كيمو بجنتله علي انسان بشري
وقاله .. الكشف الطبي فين لو سمحت ؟
قال .. معرفش حاجه في المكان الزفت ده !!
بصله كريم ( بصه الي هيا الواحد بيبتسم بس سنانه باينه تحسس ان اللي ادامك اهبل ) قاله طيب شكرا
فرد عليه وساله انت طب بيطري ؟؟
فسرح كريم للحظه كده ...وقال في باله احنا هنبتدي غباء ولا ايه ....
اومال انا بساله ليه يعنى .. !!
المهم.. ضحكله ضحكه الغباء... وقال: اه يا ( .... )
قاله: عمرو اسمي عمرو
فرد كريم: اهلا يا مان وانا كريم
المهم مشيوا مع بعض عشان يسالوا أي حد... لقيوا بتاع بنتين وتلات ولاد ... بيقولوهم في صوت واحد اهلا بيكم في الكليه احنا سنه تانيه وجايين نقولكم ايه النظام في الكليه ...
( في خيال كريم... بيقول اششششطه اهي بدات تندع وجم كام بنت اهو وانا لسه مدخلتش الكليه شكلي هبقا هارون الرشيد يا معلم وطار من الفرح )
ولحسن حظه كانت البنات مقبوله ولبسهم مقبول ( انثي يعني )
بابتسامه امل كريم سال بنت من البنتين ..
انتي سنه تانيه ؟؟
فنط عمرو في الكلام بسرعه ( ماهو كان قرد بردوا ) ::
ياعم ماهو قالولك كلهم سنه تانيه
( وبص للبنت قال ايه الواد جامد وبتاع )
وقلها معلش اصله مستجد
فبصله كيمو وقاله .. بجديه .. ماشي يا عم المخضرم
ضحكت البنات ضحكه لذيذه ...ومن هنا بدات صداقه عمرو وكريم بحكم التهريج الي مكنوش مجهزين ليه ده ...
راحت بنت اتكلمت باسلوب رقيق في نوع من الوجاهه اهلا بيكم يا جماعه في كليه الطب البيطري اسمي بسنت في اللجنه الفنيه وجايين النهارده عشان نستقبلكم ونقولكم هتعملوا ايه في الكشف الطبي ...
فنط عمرو _ كالعاده بابتسامه عريضه .. وقال .. ................... .
بقولكوا ايه .. ما تيجوا نكمل الحلقه الجايه ان شاء الله ..
__________________
Veterinarian and proud to be so Veteriner ve gurur kadar olmak Vétérinaire et fier de l'être
Veterinario e fieri di esserlo
|