بما إننا متفقين في بعض الحاجات فحعلق على نقط الاعتراض او الحياد
مادام كده يبقى لازم ان شاء الله يتعمل دراسة جديدة بين الاداريين لكل قسم
ونشوف مواضيعه وزواره ومشرفه ونقيم القسم يا يفضل يا يتشال
حتى لو كان زمان كويس يمكن دلوقتي الموضوع اختلف
قلنا الكلام ده قبل واتقال جاري المناقشة
محنا عارفين انه كل حاجة في المنتدى ده تحت المناقشة
بس التنفيذ بتاعكو ده امتى 
بس ممكن نغلي الاتنين خالص ونعتبر المواضيع السياسية نقاشية وتفضل في العام
حسب نوعية المواضيع اللى تتشاف في التقييم بعدين
على الأقل خلينا في العام دلوقتي لأنه لب المشكلة
ولو اتكلمنا في باقي الاقسام حنطلع مشاكل لا حصر لها
انا عن نفسي مش برتبط في كل المواضيع عندي بالقانون
بس حاجات من وجهة نظري بحس إنها مش في الصالح العام مش بطبق عليها القانون
والقوانين بغيرها حسب مزاجي بما يناسب مصلحة القسم
ومش من مصلحتي انقل مواضيع كتير لبره
ده اللى احنا محتاجين نتناقش فيه حالياً
ممكن برده انا مقلتش نقتصر على النقاشية فقط
في حاجات فعلاً مش نقاشية المفروض يبقى مكانها العام
بس انا قلت اخدها خطوة خطوة عشان مضربش على طول
هنا بقى اقول لحضرتك
لو كل واحد اعتبر نفسه قائد ليه وجهة نظره الخاصة
يبقى وجهات النظر حتتعارض وده طبيعة بشرية
واحنا معظمنا صغير ومش بقدر من الحكمة لتنسيق الامور بيننا
لذا عند وجود قانون مظبوط وحاسم
مش حيبقى فيه تعارض في الآراء ولا اختلاف وجهات نظر بعد كده
يعني مثلاً
قسم جرس الفسحة اللى لغوه
كان بيهتم بنوعية فكاهية من المواضيع ملهاش مكان دلوقتي
فطبيعي اي موضوع فكاهي حيحتار فيه جميع المشرفين زي ما حصل من اسبوع
مثال تاني
قسم لقاءات وحوارات ومسابقات
عايزين يلغوه مع بداية الدراسة
يعني حنقفل كل موضوع ترفيهي يتحط في المنتدى
على الرغم من نشاط القسم
يبقى كده حيفضل المنتدى قاصر فقط على المواضيع التعليمية والثقافية
وانا شايف إنه ده برده مش في المصلحة
بس رأي الاغلبية كان هو الغالب فانا حسكت
مش حينفع ارد على كل نقطة لوحدها غير لما احكي عن نقطة معينة
يمكن بعدها حكون فسرت جميع النقط اللى فوق ده
خلينا نكون متفقين على حاجتين
الموضوع اللى تعدى الصفحتين او التلاتة بيفقد لذته وموضوعيته
انا واحد لو دخلت موضوع في الصفحة الاولى برد
في الصفحة التانية حسب اهمية الموضوع
في الصفحة التالتة بيبقى في الحالات الحرجة فقط
الحاجة التانية إنه بحكم إننا بقينا في عصر السرعة
والواحد بقى عايز يخش ياخد المعلومة ويطير
فقد أصبحت الموضوعات الكبيرة منبوذة او يندر الاهتمام بها
فعشان تقولي ندمج ثقافتين والقدام بالجداد والكلام ده
معتقدش إنه سهل التنفيذ
الحاجة الوحيدة اللى ممكن تدمج بيها الثقافتين هي باختلاط أعضاء تلك الفترة بأعضاء هذه الفترة
ولما يكون النقاش بينهم في نفس اللقاء ساعتها حتتحقق الفايدة
اما بخصوص النقطة اللى بتقولي فيها مينفعش نرمي الثقافات السابقة او نضيع مجهودات السابقين
فخلاص
خليها موجودة واعمل الموضوع الجديد برده
بس هي هي
كده كده محدش حيروح للمواضيع ده
لكن اهم حاجة تحط الموضوع مرة تاني بشكل جديد
اقل حجماً لو كان طويلاً
بدون مشاركات ليفتح نقاش جديد واقبال عالي
كده اظن فسرت قصدي في الكلام اللى كان فوق
انا واحد بمل من المواضيع الدينية بسرعة مثلاً
لإنها بتكون كلها تقليدية وطويلة جداً ونصها آيات وأحاديث وكلهم بيوصلو لمعنى واحد
برده المواضيع السياسية والتاريخية الطويلة
نفس الاحساس بينطبق على المواضيع القديمة اللى ردودها كتير
انا واحد من عادتي مش برد على موضوع إلا لما اكون قريت كل ردوده
إلا نادراً جداً
على الأقل عشان مكررش وجهة نظري في الموضوع ويبقى الموضوع كإنه عمال يعيد نفسه
شكلي انا اللى طولت وبقيتو عايزين تضربوني
كفاية النهاردة لحد ما تقرو اللى اتكتب
وعشان اجهز للكلية
جزانا وإياكم
وكلانا يقول ما يراه في مصلحة المنتدى